ભારતના સંરક્ષણ મંત્રી રાજનાથ સિંહે ક્રેમ્લીનમાં રશિયાના પ્રમુખ પુતિનની મુલાકાત લીધી હતી. બંને નેતાઓ વચ્ચે થયેલી મંત્રણામાં મુખ્ય ભાગ તો સંરક્ષણ અને પ્રાદેશિક સલામતીનો રહ્યો હતો. રાજનાથ સિંહ ઇંડીયા-રશિયા ઇન્ટર ગવર્નમેન્ટસ કમિશન ઓન મિલિટરી એન્ડ મિલિટરી ટેકનોલોજી કોઓપરેશન (IRIGC-M&MTC)ની 21મી પરિષદમાં ભાગ લેવા અહીં આવ્યા હતા.
આ દરમિયાન તેઓ રશિયાના પ્રમુખ પુતિનને મળ્યા હતા. બંને નેતાઓએ સંરક્ષણ અને પ્રાદેશિક સલામતી વિષે સઘન ચર્ચા કરી હતી. રાજનાથ સિંહે વડાપ્રધાન નરેન્દ્ર મોદી તરફથી પ્રમુખ પુતિનને આપેલા ઉષ્માભર્યા અભિનંદનો પણ પાઠવ્યા હતાં. ભારતના સંરક્ષણ મંત્રી મોસ્કો પહોંચ્યા ત્યારે રશિયાના નાયબ સંરક્ષણ મંત્રી, એલેકઝાન્ડર ફોલિન અને ભારતના રાજદૂત વેંકટેશ કુમારે તેઓનું એરપોર્ટ પર સ્વાગત કર્યું હતું.
પ્રમુખ પુતિન સાથેની મુલાકાત દરમિયાન રાજનાથ સિંહે કહ્યું હતું કે, આપણા બંને દેશો વચ્ચેની મૈત્રી ઊંચામાં ઊંચા પર્વતથી પણ ઊંચી પહોંચી છે અને ઉંડામાં ઉંડા સમુદ્રથી પણ ગહરી બની રહી છે. આ પૂર્વે રાજનાથ સિંહે રશિયાના સંરક્ષણ મંત્રી આંદ્રે બેલોસોવ સાથે સઘન મંત્રણા કરી હતી.
આ પછી સિંઘે X પ્લેટફોર્મ ઉપર લખ્યું હતું કે, IRIGC- M&MTC વિષે રશિયાના સંરક્ષણ મંત્રી આંદ્રે બેલોસોવ સાથે ઘણી ફળદાયી મંત્રણા થઈ હતી. દરમિયાન દ્વિપક્ષીય સંબંધો વિષે પણ વ્યાપક ચર્ચા થઈ હતી. રાજનાથ સિંહે આ પૂર્વેના દિવસે કલીનીનગ્રાડ ખાતે ભારતની અદ્યતન ફ્રિગેટ આઈ.એન.એસ. તિશુલને તરતી મુકી હતી. તદ્દન અદ્યતન શસ્ત્રોથી સજ્જ તેવી આઈ.એન.એસ.તિશુલ તે એ શ્રેણીની 7મી ફ્રિગેટ છે.
