અમદાવાદ: પાલડીમાં ATS-DRIના સંયુક્ત દરોડામાં ઝડપાયું 90 કિલો સોનું- કરોડોની કેશ
અમદાવાદાના એક બંધ ફ્લેટમાંથી કરોડો રૂપિયાનું સોનું અને કરોડો રૂપિયાની કેશ મળી આવી છે. બાતમીના આધારે સરકારી એજન્સીઓએ કરેલા દરોડમાં અમદાવાદના પાલડી વિસ્તારમાં છૂપાવવામાં આવેલા કાળાનાણા ઝડપી પાડવા અંગે મોટી સફળતા હાથ લાગી છે. અમદાવાદ શહેરના પાલડી વિસ્તારમાં શેરબજાર ઓપરેટરના બંધ પડી રહેલા ફ્લેટમાંથી ડીઆરઆઈ અને એટીએસ દ્વારા દરોડા પાડવામાં આવ્યા છે. આ ફ્લેટમાંથી એજન્સીઓએ 90 કિલો સોનું અને જંગી રોકડ જપ્ત કરી છે.
અમદાવાદના પાલડી વિસ્તારમાં આવેલા એક બંધ ફ્લેટમાં દરોડો પાડી ATS અને DRIએ અંદાજે 90 કિલો સોનું જપ્ત કરાતા ખળભળાટ મચ્યો છે. બંને એજન્સીઓએ પૂર્વ બાતમીના આધારે દરોડો પાડતા આ મસમોટો મુદ્દામાલ મળી આવ્યો છે. જપ્ત કરાયેલા સોનાની કિંમત 78 કરોડ રૂપિયા થાય છે.
પાલડીમાં શેરબજાર ઓપરેટરના આવિષ્કાર એપાર્ટમેન્ટના ફ્લેટ નંબર 104માં બપોરે અઢી વાગ્યે 25 જેટલા અધિકારીઓએ દરોડા પાડ્યા હતા. આ ફ્લેટ મહેન્દ્ર શાહ અને મેઘ શાહ નામની વ્યક્તિઓએ ભાડે લીધો હતો. તેઓ પિતા-પુત્રનો સંબંધ ધરાવે છે. આ તપાસમાં હજુ પણ વધારે મુદ્દામાલ ઝડપાય તેવી શક્યતા છે. દરોડાની કાર્યવાહી દરમિયાન ચલણી નોટો ગણવા બે મશીન અને સોનાનું વજન કરવા ઈલેક્ટ્રિક વજન કાંટા પણ મંગાવવામાં આવ્યા છે.
મળતી માહિતી પ્રમાણે, શેરબજાર ઓપરેટર મેઘ શાહ અને તેના સાગરિતો ખોખા કંપનીઓના શેરના ભાવમાં ઉછાળો લાવીને કરોડો રૂપિયા ઘર ભેગા કરતા હતા. આ લોકોએ કાળું નાણું સોનામાં ફેરવ્યું હોવાની માહિતી મળી હતી.
એજન્સીઓને માહિતી મળી હતી કે, આ ફ્લેટમાં અંદાજિત 100થી કિલોથી વધુનું સોનું છુપાવ્યું છે. ત્યારબાદ અહીં ATS અને DRIએ સંયુક્ત દરોડા પાડ્યા હતા. આ દરમિયાન અંદાજિત 100 કિલો સોનું, અન્ય ઘરેણાં અને અંદાજિત રૂ. 70 લાખથી વધુ રોકડ મળી આવી છે. સૂત્રોના જણાવ્યાનુસાર, આ ઘટનામાં હવાલા વ્યવહારો પણ બહાર આવે તેવી શક્યતા છે. આ દિશામાં હાલ તપાસ ચાલી રહી છે.
આ પણ વાંચો- વડોદરા: રક્ષિત ચોરસિયાના કેસમાં ત્રણ ASIની ટ્રાન્સફર; જાણો કેમ?
