નેશનલ ઈન્વેસ્ટિગેશન એજન્સીએ અમદાવાદ પોલીસને સાથે રાખીને ઓપરેશન પુરૂં પાડ્યું
અમદાવાદ નજીક આવેલા સાણંદમાં મદ્રેસામાં કામ કરતા એક શંકાસ્પદ વ્યકિતની NIA (નેશનલ ઈન્વેસ્ટિગેશન એજન્સી)એ અટકાયત કરી પૂછપરછ હાથ ધરી છે. સૌથી ચોંકાવનારા સમાચાર તે છે કે, આ વ્યક્તિની આતંકી સંગઠન જૈશએ મોહમ્મદ સાથેના કનેકશનને લઈ પૂછપરછ કરવામાં આવી રહી છે.
NIA દ્વારા ઝડપી પાડવામાં આવેલા શંકાસ્પદ વ્યકિતનું નામ આદિલ હોવાનું સામે આવ્યું છે. હાલ આ વ્યક્તિને નેશનલ એજન્સી દ્વારા પૂછપરછ કરવામાં આવી રહી છે તેમાં પણ ખાસ કરીને જે સમગ્ર ઓપરેશન હાથ ધરાયું તેમાં અમદાવાદ જિલ્લા પોલીસને પણ સાથે રાખવામાં આવી હોવાની વિગતો હાલ સામે આવી રહી છે.
અમદાવાદ જિલ્લાના સાણંદ પાસે આવેલા એક મદરેસામાં નોકરી કરતા આદિલ નામનો એક વ્યક્તિ જૈશ એ મોહમ્મદ નામના આતંકી સંગઠન સાથે જોડાયા હોવાની વિગત સેન્ટ્રલ એજન્સીને મળી હતી. જેના આધારે તેણે અમદાવાદ જિલ્લા પોલીસની મદદ લઈને મોડી રાતે અટકાયત કરી છે. આ શંકાસ્પદ વ્યક્તિનું નામ આદિલ છે અને તે ઓનલાઈન પ્લેટફોર્મ મારફતે દેશ વિરોધી કૃત્ય કરતા આતંકી સંગઠન સાથે કનેક્ટ હોવાની વિગતો સૂત્રો પાસેથી જાણવા મળી રહી છે.
ઉલ્લેખનિય છે કે, પાછલા કેટલાક વર્ષોથી આતંકી સંગઠનના મૂળ ઓનલાઈન પ્લેટફોર્મ સુધી ફેલાઈ ગયા છે. જ્યાં અલગ-અલગ સોશિયલ મીડિયા પ્લેટફોર્મ સહિત ઓનલાઈન પ્લેટફોર્મ થકી જ યુવકોને આતંકવાદી સંગઠનો સાથે જોડવાનો કારસોઓ રચવામાં આવી રહ્યા છે.
યુવાઓને આતંકી સંગઠનમાં જોડવા સોશિયલ મીડિયાનો ઉપયોગ!
સોશિયલ મીડિયા ઉપર ગ્રુપ બનાવીને તેમાં લોકોને અલગ અલગ મોડ્યુલમાં વિચારધારા સાથે જોડીને તેઓને ધીમે-ધીમે આતંકી સંગઠનના વિચારસરણી તરફ લઈ જવામાં આવે છે. જે બાબતે અગાઉ પણ ઘણી વખત તપાસમાં ઓનલાઈન પ્લેટફોર્મથી જોડાયેલા આતંકીઓની કડી એજન્સીને મળી છે.
