વડોદરા: રક્ષિત ચોરસિયાના કેસમાં ત્રણ ASIની કરાઇ ટ્રાન્સફર; જાણો કેમ?
ગુજરાતના વડોદરામાં હોળી પ્રગટાવવાના સમયે હિટ એન્ડ રન કેસના આરોપી રક્ષિત ચૌરસિયાએ કારેલીબાગ વિસ્તારમાં આમ્રપાલી કોમ્પ્લેક્સ પાસે પોતાની કારથી ત્રણ ટુ-વ્હીલરને ટક્કર મારી હતી. આમાં એક મહિલાનું મોત થયું હતુ. તો ઘણા લોકો ઘાયલ થયા. અકસ્માતનો વીડિયો જોયા બાદ અભિનેત્રી જાહ્નવી કપૂરે પણ તેને ભયાનક ગણાવ્યો છે. સૌથી ખતરનાક વાત એ હતી કે અકસ્માત પછી ડરવા કે કોઈ અફસોસ દર્શાવવાને બદલે રક્ષિત ઉત્સાહથી બૂમો પાડી રહ્યો હતો. આજે કોર્ટે ફરી એકવાર તેના રિમાન્ડ લંબાવ્યા છે. આ સમય દરમિયાન તે લંગડાતો જોવા મળ્યો હતો. આ દરમિયાન વડોદરા પોલીસ કમિશનરે આ કેસમાં પ્રોટોકોલ તોડવા બદલ સજા તરીકે ત્રણ આસિસ્ટન્ટ સબ-ઇન્સ્પેક્ટર (ASI)ની અલગ અલગ વિભાગોમાં બદલી કરી છે.
14 માર્ચની રાત્રે હોળીકા દહન ઉજવણી દરમિયાન રક્ષિત ચૌરસિયા ખૂબ જ ઝડપે ગાડી ચલાવી રહ્યો હતો ત્યારે તેણે પોતાની કાર પરનો કાબુ ગુમાવ્યો અને ત્રણ ટુ-વ્હીલર્સને ટક્કર મારી જેમાં ઘણા લોકો ઘાયલ થયા હતા. 37 વર્ષીય હેમાલી પટેલ ધૂળેટીની આગલી સાંજે તેમના પતિ પૂરવ સાથે તેમની પુત્રી માટે રંગો ખરીદવા માટે બહાર ગયા હતા. તેઓ સ્કૂટર પર હતા ત્યારે રક્ષિત દ્વારા ચલાવવામાં આવતી કારે ટુ-વ્હીલરને ટક્કર મારી હતી. હેમાલીનું ઘટનાસ્થળે જ મોત નીપજ્યું અને પૂર્વાની હાલત ગંભીર છે. કારે વધુ બે ટુ-વ્હીલરને ટક્કર મારી હતી. એકમાં ભાઈ-બહેન વિકાસ, કોમલ અને જયેશ મુસાફરી કરી રહ્યા હતા, અને બીજામાં નિશા શાહ અને તેના બાળકો જૈનિલ અને રેન્સી મુસાફરી કરી રહ્યા હતા. ગંભીર ઇજાઓ થતાં તમામની સારવાર ચાલી રહી છે.
રક્ષિતે દાવો કર્યો હતો કે તે દારૂના નશામાં ગાડી ચલાવી રહ્યો ન હતો. તેણે મીડિયાને કહ્યું, “અમે એક સ્કૂટરને ઓવરટેક કરી રહ્યા હતા, અમે જમણે વળ્યા અને ત્યાં એક ખાડો હતો. તે દરમિયાન કાર બીજા વાહનને સ્પર્શી ગઈ અને એરબેગ ખુલી ગઈ. મારી આંખો બંધ થઈ ગઈ અને કાર નિયંત્રણ બહાર જતી રહી હતી.” તેણે કહ્યું કે તે 50 કિમી/કલાકની ઝડપે ગાડી ચલાવી રહ્યો હતો અને નશામાં નહોતો.
રક્ષિતે એવો પણ દાવો કર્યો હતો કે તે કોઈ પાર્ટીમાંથી પાછો ફરી રહ્યો નહતો. તે હોળી દહન કાર્યક્રમમાં હાજરી આપવા ગયો હતો. તેણે કહ્યું, “મને કહેવામાં આવ્યું હતું કે એક મહિલાનું મોત થયું છે અને કેટલાક લોકો ઘાયલ થયા છે. હું પીડિતોના પરિવારોને મળવા માંગુ છું, આ મારી ભૂલ છે.” આ કેસમાં પોલીસકર્મીઓની બદલી કરવામાં આવી છે કારણ કે આરોપી વ્યક્તિને કસ્ટડીમાં હોય ત્યારે કોઈ જાહેર નિવેદન આપવાની મંજૂરી હોતી નથી. પાછળથી ખબર પડી કે ટ્રાફિક વિભાગના ત્રણ ASIએ રક્ષિતને મીડિયા સુધી પહોંચવામાં મદદ કરી હતી.
રક્ષિત મૂળ ઉત્તર પ્રદેશના પ્રયાગરાજનો રહેવાસી છે. તે એમએસ યુનિવર્સિટીમાં કાયદાનો વિદ્યાર્થી છે અને હાલમાં તેની ઉંમર 20 વર્ષ છે. આ ઘટના પહેલા પણ તેમની ફરિયાદ પોલીસ સુધી પહોંચી હતી. ફતેહગંજના એક રહેણાંક એપાર્ટમેન્ટમાં હંગામો મચાવ્યા બાદ એક વકીલે શહેરના સયાજીગંજ પોલીસ સ્ટેશનમાં તેમના અને તેમના મિત્રો વિરુદ્ધ ફરિયાદ નોંધાવી હતી. આ ઘટના એક મહિના કરતા પણ ઓછા સમય પહેલા બની હતી. જોકે, લેખિત માફી માંગ્યા બાદ ફરિયાદ પાછી ખેંચી લેવામાં આવી હતી. બીજા એક વાયરલ વીડિયોમાં ખુલાસો થયો છે કે અકસ્માતની રાત્રે રક્ષિતે તેના મિત્ર પાસેથી બળજબરીપૂર્વક કાર ચલાવવા માટે લઈ લીધી હતી.
#WATCH | One woman has died, and four others are injured after an overspeeding four-wheeler rammed into a two-wheeler on 14th March
Gujarat: Vikas Kewalani, Vadodara Car accident victim, says, ” Two people from my society and I had gone out for refreshment. One of them was… pic.twitter.com/8HRauOVq1L
— ANI (@ANI) March 17, 2025
હાઇ સ્પીડ કારની ટક્કરમાં ઘાયલ થયેલા વિકાસ હાલમાં હોસ્પિટલમાં સારવાર હેઠળ છે. વિકાસે કારની ટક્કર સમયે શું બન્યું તેની દર્દનાક વાર્તા મીડિયા સાથે શેર કરી છે. વિકાસે જણાવ્યું કે અમે નાસ્તા માટે ઘરની બહાર ગયા હતા, મારા ભાઈ-બહેન અને સોસાયટીના બે લોકો પણ મારી સાથે હતા. હેમાલી પટેલનું મૃત્યુ થયું હતું અને તેમના પતિ પૂરબભાઈ પટેલની હાલત ગંભીર છે. વિકાસે કહ્યું કે રક્ષિત ચૌરસિયા આનંદના મૂડમાં હતો અને નશામાં પણ હતો. અમને ખબર નથી કે તેણે આવું કેમ કર્યું. એક સામાન્ય વ્યક્તિ ક્યારેય આવું નહીં કરે. તેણે આ બધું પોતાના આનંદ માટે કર્યું. તે શું બૂમો પાડી રહ્યો હતો તેના પુરાવા છે.
