Visavadar-Kadi election: વિસાવદર અને કડીમાં આવતી કાલે પેટા ચૂંટણી યોજાવાની છે. ત્યારે આ ચૂંટણીમાં હાલ રાજકારણ ચરમસીમાએ જોવા મળી રહ્યું છે. આક્ષેપ- પ્રતિઆક્ષેપની રાજનિતી બાદ હવે એક બીજાની પોલ પણ ખોલવામાં આવી રહી છે. ગઈ કાલે વિસાવદરના આપ ઉમેદવાર ગોપાલ ઈટાલિયાએ બે સ્ટીંગ ઓપરેશન કર્યા હતા જેમાં એકમાં આપના કાર્યકરોને પૈસાથી ખરીદવા અને દારુના જથ્થાનો પર્દાફાશ કરવામાં આવ્યો હતો. જ્યારે ભાજપ કોંગ્રેસ તેને આપની ગંદી રાજનિતીનો ભાગ ગણાવી રહ્યું છે તેવામા કડી અને વિસાવદરમાં કોનું પલડું ભારે છે તેને લઈને ધ ગુજરાત રિપોર્ટના વરિષ્ઠ પત્રકાર દિલીપ પટેલે વિસ્તૃતમાં માહિતી આપી હતી.

કડીમાં કમઠાણ 

કડીની વાત કરવામાં આવે તો કડીમાં ભાજપના દિગ્ગજ નેતા નીતિન પટેલ વિરુદ્ધ ફેસબુકમાં પોસ્ટ વાયરલ થઈ હતી. જેમાં કોંગ્રેસ નેતા અને પૂર્વ ધારાસભ્ય બળદેવજી ઠાકોરે નીતિન પટેલના કથિત 25,000 કરોડના કૌભાંડની અરજી સાથે પોસ્ટ મુકી હતી. ત્યારે બળદેવજી ઠાકોરને નીતિન પટેલે પણ જવાબ આપ્યો હતો. તેમણે કહ્યુ હતુ કે, મારી પાસે નામ સાથે પુરાવાઓ છે, બળદેવજી જો મને ચેલેન્જ કરશે તો પુરાવા રજૂ કરીશ. આમ કડીમાં આક્ષેપ પ્રતિઆક્ષેપની રાજનિતી ચાલી રહી છે.

 વિસાવદરમાં વિવાદ 

વિસાવદરની વાત કરવામાં આવે તો વિસાવદરમાં રાજકારણ ચરમસીમાએ જોવા મળી રહ્યું છે. વિસાવદરમાં ચૂંટણી જીતવા માટે સામ દામ દંડ ભેદની નીતિ આપનાવવામાં આવી રહી છે. જેમાં મતદારો તેમજ વિપક્ષના કાર્યકરોને લલચાવવાની કોશિશ કરવામાં આવી રહી છે. જ્યારે આ મામલે આપ દ્વારા તેનો પર્દાફાશ કરવામા આવી રહ્યો છે ત્યારે ભાજપ દ્વારા પોલીસ તંત્રનો ખોટી રીતે ઉપયોગ કરવામાં આવી રહ્યો હોય તેમ લાગી રહ્યુ છે. ગઈ કાલે આપ નેતા ગોપાલ ઈટાલિયા અને પ્રવિણ રામ દ્વારા જ બે સ્ટીંગ ઓપરેશન કરવામાં આવ્યા હતા તે મામલે પ્રવિણ રામને પોલીસ ઉઠાવી ગઈ હતી. આમ વિસાવદરમાં આપ ઉમેદવાર ગોપાલ ઈટાલિયા ભાજપ અને કોંગ્રેસ પર હાવી થઈ રહ્યા હોય તેવું લાગી રહ્યું છે. જો કે, અંતે કોણ બાજી મારે છે તે તો પરિણામ આવે ત્યારે જ ખબર પડશે…