Banaskantha Congress Internal Conflict: બનાસકાંઠા જિલ્લા કોંગ્રેસમાં સ્થાનિક સ્વરાજ્યની ચૂંટણીના પરિણામો જાહેર થયા બાદ ભડકો થયો છે. પક્ષના અગ્રણી નેતા દિનેશ પરમારે હાર માટે સીધો આક્ષેપ ધારાસભ્ય જીગ્નેશ મેવાણી પર લગાવ્યો છે. તેમણે મેવાણીને હારના મુખ્ય જવાબદાર ગણાવીને પક્ષમાં આકરા પ્રહારો કર્યા છે. દિનેશ પરમારના મતે, અગાઉ પ્રદેશ સંગઠન સમક્ષ રજૂઆત કરવા છતાં કોઈ યોગ્ય ધ્યાન આપવામાં આવ્યું નહોતું. તેમણે એવો ગંભીર આરોપ પણ લગાવ્યો છે કે ટિકિટ વહેંચણીની પ્રક્રિયામાં કોંગ્રેસને જાણીજોઈને હરાવવાનું મોટું કાવતરું રચવામાં આવ્યું હતું, જેમાં માત્ર જીગ્નેશ મેવાણીની નકારાત્મક રણનીતિએ જ કામ કર્યું છે.
વડગામમાં કોંગ્રેસનો રકાસ અને રાજીનામાની માંગ
વડગામ વિસ્તારમાં અનુસૂચિત જાતિ માટે અનામત રાખવામાં આવેલી પાંચેય બેઠકો પર કોંગ્રેસે કારમી હારનો સામનો કરવો પડ્યો છે. આ પરિણામો બાદ દિનેશ પરમારે દાવો કર્યો છે કે ધારાસભ્ય જીગ્નેશ મેવાણી હવે પ્રજાનો વિશ્વાસ અને જનાદેશ ગુમાવી બેઠા છે. બનાસકાંઠાની જનતા હંમેશા કોંગ્રેસની પડખે રહી છે અને અગાઉ જિલ્લા તેમજ તાલુકા પંચાયતમાં પક્ષનું જ શાસન હતું, પરંતુ હવે સ્થિતિ બદલાઈ રહી છે. પ્રજાના આકરા મિજાજને જોતા દિનેશ પરમારે મેવાણી પાસે નૈતિકતાના આધારે તાત્કાલિક રાજીનામાની માંગ કરી છે.
માનીતાઓને ટિકિટ આપવાના ગંભીર આક્ષેપો
દિનેશ પરમારના જણાવ્યા મુજબ, ૨૦૨૭ની વિધાનસભા ચૂંટણીના ડ્રેસ રિહર્સલ સમાન આ ચૂંટણીમાં લોકોએ જીગ્નેશ મેવાણીને સંપૂર્ણ રીતે નકારી દીધા છે. તેમણે આરોપ લગાવ્યો કે પક્ષમાં લાયક અને નિષ્ઠાવાન ઉમેદવારોના બદલે માત્ર પોતાના માનીતા અને ‘ચેલા-ચપાટા’ને ટિકિટો આપીને પક્ષને હરાવવાનું કામ કરવામાં આવ્યું છે. આ પ્રકારની મનસ્વી રીતે કરવામાં આવેલી ટિકિટ વહેંચણીને કારણે કોંગ્રેસના પાયા નબળા પડ્યા છે. દિલ્હીના હાઈકમાન્ડ અને પ્રદેશ સંગઠને આ ગંભીર બાબતની નોંધ લેવી જોઈએ, નહીંતર પક્ષને ભવિષ્યમાં વધુ નુકસાન વેઠવું પડી શકે છે.
વડગામ અને કોંગ્રેસના અસ્તિત્વને બચાવવાની અપીલ
કોંગ્રેસના આંતરિક વિવાદના પગલે દિનેશ પરમારે હાઈકમાન્ડ અને મોવડી મંડળને ભાવુક અપીલ કરી છે. તેમણે જણાવ્યું છે કે જો સમયસર વડગામ મતવિસ્તારને બચાવવા માટે કોઈ નક્કર પગલાં લેવામાં નહીં આવે, તો આ વિસ્તારમાં કોંગ્રેસનું અસ્તિત્વ જોખમમાં મુકાઈ જશે. પક્ષના જૂના અને વફાદાર કાર્યકરોમાં જીગ્નેશ મેવાણીની કાર્યપદ્ધતિને લઈને ભારે રોષ અને નારાજગી જોવા મળી રહી છે. હવે દિલ્હી દરબાર અને ગુજરાત પ્રદેશ કોંગ્રેસ આ ગંભીર આક્ષેપો પર કેવી પ્રતિક્રિયા આપે છે અને કેવા પગલાં ભરે છે તેના પર સમગ્ર રાજ્યના રાજકીય આલમની નજર ટકેલી છે.
