Adani Power Mundra Employee Protest: કચ્છના મુન્દ્રામાં આવેલા અદાણી પાવર પ્લાન્ટમાં કાયમી કર્મચારીઓ અને ટેકનિકલ સ્ટાફે નોકરી સંબંધિત પ્રશ્નોને લઈને વિરોધ શરૂ કર્યો છે. કર્મચારીઓનો આક્ષેપ છે કે વર્ષોથી કંપનીમાં સેવા આપ્યા બાદ હવે તેમને કોન્ટ્રાક્ટ પર કામ કરવા અથવા અન્ય રાજ્યમાં ટ્રાન્સફર થવા માટે દબાણ કરવામાં આવી રહ્યું છે. આ નિર્ણયના વિરોધમાં કર્મચારીઓ અદાણી પાવર પ્લાન્ટના મુખ્ય ગેટ પાસે અનિશ્ચિત મુદતનાં ધરણાં પર બેઠા છે. કર્મચારીઓની મુખ્ય માંગ છે કે તેમને મુન્દ્રા પ્લાન્ટમાં જ કાયમી નોકરી ચાલુ રાખવા દેવામાં આવે.
15થી 17 વર્ષ સેવા આપ્યા બાદ નોકરી અંગે ચિંતા
કર્મચારીઓના જણાવ્યા પ્રમાણે, તેમણે પોતાના જીવનનાં 15થી 17 વર્ષ અદાણી પાવર કંપનીને આપ્યાં છે. કેટલાક કર્મચારીઓ 15 વર્ષથી પણ વધુ સમયથી કાયમી ધોરણે કામ કરી રહ્યા છે. હવે તેમને બિઝનેસ પાર્ટનરના નામે કોન્ટ્રાક્ટમાં જોડાવા અથવા અન્ય રાજ્યમાં ટ્રાન્સફર થવાની વાત કરવામાં આવી રહી હોવાનો તેમનો આક્ષેપ છે.
કર્મચારીઓનું કહેવું છે કે અન્ય રાજ્યમાં ટ્રાન્સફર થયા બાદ કર્મચારીઓ પર એવી પરિસ્થિતિ ઊભી થાય છે કે તેઓ પોતાની નોકરી છોડવા મજબૂર બને અથવા તેમને નોકરીમાંથી દૂર કરવામાં આવે. લાંબા સમય સુધી એક જ કંપનીમાં કામ કર્યા બાદ વધતી ઉંમરે બીજી નોકરી શોધવી પણ મુશ્કેલ બને છે. આ કારણે કર્મચારીઓ પોતાના ભવિષ્ય અને પરિવારની આર્થિક સુરક્ષાને લઈને ચિંતિત છે.
પ્લાન્ટના મુખ્ય ગેટ પાસે કર્મચારીઓનાં ધરણાં
અદાણી પાવર કર્મચારી સંઘ અને ભારતીય મજૂર સંઘ સાથે જોડાયેલા કર્મચારીઓએ પોતાની માંગણીઓ માટે વિરોધ નોંધાવ્યો છે. કર્મચારીઓના જણાવ્યા મુજબ, પ્લાન્ટના મુખ્ય ગેટ પાસે સવારે 9 વાગ્યાથી સાંજે 5:30 વાગ્યા સુધી ધરણાં કરવામાં આવે છે. વિરોધમાં કર્મચારીઓના પરિવારજનો પણ જોડાયા છે.
કર્મચારીઓએ ગાંધીધામના લેબર કમિશનર અને મુન્દ્રાના ધારાસભ્ય સમક્ષ લેખિત રજૂઆતો કરી હોવાની વાત જણાવી છે. તેમના કહેવા પ્રમાણે, કાયદાકીય અને અન્ય માધ્યમોથી મેનેજમેન્ટ સુધી પોતાની વાત પહોંચાડવાના પ્રયાસો કરવામાં આવ્યા છે, પરંતુ હજુ સુધી સંતોષકારક જવાબ મળ્યો નથી.
2015 પછી ભરતી ઓછી થઈ હોવાનો આક્ષેપ
કર્મચારીઓએ એવો પણ આક્ષેપ કર્યો છે કે 2015 પછી તેમના સ્તરે નવી ભરતી ખૂબ ઓછી થઈ છે. પરિણામે, પ્લાન્ટમાં ઓછા કર્મચારીઓથી કામ ચલાવવામાં આવી રહ્યું છે. તેમના જણાવ્યા મુજબ, કાયમી કર્મચારીઓની જગ્યાએ કોન્ટ્રાક્ટ પર કામદારો રાખવામાં આવે છે, જ્યારે હાલના કાયમી કર્મચારીઓને અન્ય રાજ્યમાં ટ્રાન્સફર થવા માટે કહેવામાં આવે છે.
કર્મચારીઓનું કહેવું છે કે સ્ટાફની અછતને કારણે તેમને ઘણી વખત બેવડી ડ્યૂટી કરવી પડે છે. તેમ છતાં વીજ ઉત્પાદન અને પ્લાન્ટની કામગીરી પર અસર ન પડે તે માટે તેઓ પોતાની ફરજ નિભાવતા રહ્યા છે. હવે નોકરીની અનિશ્ચિતતાને કારણે તેમના પર માનસિક દબાણ વધી રહ્યું છે.
જય ભટ્ટે ગૌતમ અદાણીને કરી વિનંતી
અદાણી પાવર મુન્દ્રામાં છેલ્લા 15 વર્ષથી કાયમી કર્મચારી તરીકે કામ કરતા જય ભટ્ટે જણાવ્યું કે કંપનીમાં કાયમી નોકરી આપવા બદલ તેઓ ગૌતમ અદાણી અને કંપનીના આભારી છે. તેમણે અદાણી ગ્રુપ સતત પ્રગતિ કરે તેવી શુભેચ્છા પણ વ્યક્ત કરી હતી.
જોકે, જય ભટ્ટના જણાવ્યા પ્રમાણે, સ્થાનિક મેનેજમેન્ટના નિર્ણયોને કારણે કર્મચારીઓની નોકરી સામે ગંભીર પ્રશ્નો ઊભા થયા છે. તેમણે કહ્યું કે પરિવારને છોડીને અન્ય રાજ્યમાં નોકરી કરવા જવું તેમના માટે મુશ્કેલ છે. કર્મચારીઓ કંપનીને પોતાની મહેનત અને સમય આપતા રહ્યા છે, છતાં હવે તેમને નોકરી બચાવવા માટે ધરણાં કરવાની સ્થિતિમાં આવવું પડ્યું છે.
કર્મચારીઓની મુખ્ય માંગ શું છે?
કર્મચારીઓની મુખ્ય માંગ છે કે તેમને મુન્દ્રા પ્લાન્ટમાં જ કાયમી ધોરણે નોકરી ચાલુ રાખવાની તક આપવામાં આવે અને જ્યાં કર્મચારીઓની અછત છે ત્યાં કોન્ટ્રાક્ટના બદલે કંપનીના સીધા પગારપત્રક પર નવા કર્મચારીઓની ભરતી કરવામાં આવે.
કર્મચારીઓએ મેનેજમેન્ટ અને ગૌતમ અદાણીને તેમની રજૂઆતો પર સકારાત્મક વિચાર કરવા અપીલ કરી છે. હવે કંપની મેનેજમેન્ટ આ વિરોધ અંગે શું નિર્ણય લે છે અને કર્મચારીઓની માંગણીઓનો ઉકેલ ક્યારે આવે છે, તેના પર સૌની નજર રહેશે.
