• શુભમન ગિલ-શ્રેયસ ઐયર પછી બોલરોએ મચાવી તબાહી; ભારતે 13 વર્ષ પછી ઇંગ્લેન્ડને કર્યું ક્લીન સ્વીપ

IND vs ENG 3rd ODI Match: ICC ચેમ્પિયન્સ ટ્રોફી 2025 પહેલા રોહિત શર્માના નેતૃત્વ હેઠળની ભારતીય ટીમે શાનદાર રમત બતાવી છે. ટીમ ઈન્ડિયાએ ઘરઆંગણે રમાઈ રહેલી 3 મેચની ODI શ્રેણીમાં ઈંગ્લેન્ડને 3-0થી ક્લીન સ્વીપ કર્યું છે. શ્રેણીની ત્રીજી અને છેલ્લી મેચ બુધવાર (12 ફેબ્રુઆરી) ના રોજ અમદાવાદના નરેન્દ્ર મોદી સ્ટેડિયમ ખાતે રમાઈ હતી.

ભારતીય ટીમે આ મેચ 142 રનથી જીતી લીધી છે. આ પહેલા ટીમ ઈન્ડિયાએ શ્રેણીની પહેલી અને બીજી મેચ 4 વિકેટથી જીતી હતી. આ રીતે તેઓએ 13 વર્ષ પછી દ્વિપક્ષીય ODI શ્રેણીમાં ઈંગ્લેન્ડને ક્લીન સ્વીપ કર્યું છે.

આ પહેલા ઓક્ટોબર 2011માં ભારતીય ટીમે 5 મેચની ODI શ્રેણીમાં ઇંગ્લેન્ડની ટીમને 5-0થી ક્લીન સ્વીપ કરી હતી. તે સમયે પણ ઇંગ્લેન્ડની ટીમ ભારતના પ્રવાસે આવી હતી. આ વખતે પણ કંઈક આવું જ બન્યું છે. પરંતુ આ વખતે શ્રેણીમાં ફક્ત 3 ODI મેચનો સમાવેશ થતો હતો.

ઈંગ્લેન્ડની ટીમ 34.2 ઓવરમાં 214 રને પ્વેલિયન ભેગી

મેચમાં ટોસ હારીને પ્રથમ બેટિંગ કર્યા બાદ ભારતીય ટીમે 357 રનનો લક્ષ્યાંક રાખ્યો હતો. જવાબમાં, આખી ઇંગ્લેન્ડ ટીમ ફક્ત 34.2 ઓવરમાં 214 રનમાં ઓલઆઉટ થઈ ગઈ હતી. આમ તે 142 રનથી મેચ હારી ગઈ હતી. ઈંગ્લેન્ડ ટીમ માટે ગુસ એટકિન્સન અને ટોમ બેન્ટને સમાન 38-38 રન બનાવ્યા હતા.

જ્યારે બેન ડકેટે 34, જો રૂટે 24 અને ફિલ સોલ્ટે 23 રન બનાવ્યા હતા. જ્યારે ભારતીય બોલરોમાં, અર્શદીપ સિંહ, હર્ષિત રાણા, અક્ષર પટેલ અને હાર્દિક પંડ્યાએ 2-2 વિકેટ લીધી હતી. સ્પિનરો વોશિંગ્ટન સુંદર અને કુલદીપ યાદવને પણ એક-એક સફળતા મળી હતી.