Corona Update: ભારતમાં કોરોના વાયરસના કેસો ફરી એકવાર ઉછાળો આવ્યો છે.  કેન્દ્રીય આરોગ્ય મંત્રાલયના તાજેતરના આંકડા અનુસાર, છેલ્લા 24 કલાકમાં દેશભરમાં કોરોનાના 391 નવા કેસ નોંધાયા છે, જ્યારે 4 દર્દીઓના મોત થયા છે. આ સાથે, દેશમાં સક્રિય કેસોની સંખ્યા વધીને 5,755 થઈ ગઈ છે. નિષ્ણાતોએ નાગરિકોને સતર્ક રહેવા, માસ્ક પહેરવા, સામાજિક અંતર જાળવવા અને નિયમિત સેનિટાઈઝેશન જેવી સાવચેતીઓ અપનાવવા પર ભાર મૂક્યો છે.

મહારાષ્ટ્રમાં 114 નવા કેસ, એક મોત

મહારાષ્ટ્રમાં કોરોનાના 114 નવા કેસ નોંધાયા છે, જેના કારણે આ વર્ષે જાન્યુઆરીથી અત્યાર સુધીના કુલ કેસોની સંખ્યા 1,276 થઈ છે. રાજ્યમાં વધુ એક દર્દીનું મોત નોંધાયું છે, જેનાથી મૃત્યુઆંક 18 પર પહોંચ્યો છે.

કેરળમાં સૌથી વધુ નવા કેસ

કેરળમાં છેલ્લા 24 કલાકમાં 192 નવા કેસ નોંધાયા છે, જે દેશમાં સૌથી વધુ છે. આ ઉપરાંત, પશ્ચિમ બંગાળમાં 58 અને દિલ્હીમાં 30 નવા કેસ સામે આવ્યા છે.
ગુજરાતમાં 170 નવા કેસ, કોઈ મોત નહીં

ગુજરાતમાં છેલ્લા 24 કલાકમાં 170 નવા કોરોના કેસ નોંધાયા છે, જેનાથી રાજ્યમાં સક્રિય કેસોની સંખ્યા 717 થઈ છે. હાલમાં માત્ર 23 દર્દીઓને હોસ્પિટલમાં સારવારની જરૂર પડી છે, જ્યારે 694 દર્દીઓ હોમ આઈસોલેશનમાં છે. સારા સમાચાર એ છે કે છેલ્લા 24 કલાકમાં 68 દર્દીઓ સાજા થયા છે અને રાજ્યમાં કોઈ મોત નોંધાયું નથી.

કેન્દ્ર સરકારની તૈયારીઓ

કોરોનાના વધતા કેસોને ધ્યાનમાં રાખીને, કેન્દ્ર સરકારે તમામ રાજ્યોને હોસ્પિટલોમાં ઓક્સિજન, આઈસોલેશન બેડ, વેન્ટિલેટર અને આવશ્યક દવાઓની ઉપલબ્ધતા સુનિશ્ચિત કરવા સૂચના આપી છે. આ સાથે, સુવિધાઓની તૈયારી ચકાસવા માટે મોક ડ્રીલ યોજવાનો આદેશ પણ આપવામાં આવ્યો છે.

હળવા લક્ષણો, પરંતુ સાવચેતી જરૂરી

અહેવાલો અનુસાર, મોટાભાગના કેસોમાં દર્દીઓને હળવા લક્ષણો જોવા મળ્યા છે, અને તેમને હોમ આઈસોલેશનમાં રાખીને સારવાર આપવામાં આવી રહી છે. આ વર્ષે જાન્યુઆરીથી અત્યાર સુધીમાં દેશમાં કોરોનાથી 55 મોત નોંધાયા છે. 22 મેના રોજ દેશમાં સક્રિય કેસોની સંખ્યા 257 હતી, જેમાંથી ઝડપથી વધારો થઈને હવે 5,755 પર પહોંચી છે.

નિષ્ણાતો અને આરોગ્ય અધિકારીઓએ નાગરિકોને સાવચેતી રાખવા અને સરકારની માર્ગદર્શિકાનું પાલન કરવા અપીલ કરી છે, જેથી આ નવી લહેરને નિયંત્રણમાં રાખી શકાય.