વર્ષ 2019માં કોરોના વાયરસે આખી દુનિયાને હચમચાવી દીધી હતી, જેના કારણે લાખો લોકોના મોત થયા હતા અને ઘણા દેશોને લાંબા સમય સુધી તેની અસરનો સામનો કરવો પડ્યો હતો. વર્લ્ડ હેલ્થ ઓર્ગેનાઈઝેશન (WHO) એ તેને મહામારી જાહેર કરી હતી. આ મહામારી ચીનથી શરૂ થઈ હતી અને હવે ફરી એકવાર ચીનમાં એક નવો વાયરસ ફેલાઈ રહ્યો છે, જેના કારણે ચિંતા વધી ગઈ છે. ચીનમાં હ્યુમન મેટાપ્યુમોવાયરસ (HMPV)ના કેસ ઝડપથી વધી રહ્યા છે. સોશિયલ મીડિયા પર શેર કરવામાં આવેલા વીડિયો અને રિપોર્ટ્સ અનુસાર ચીનના કેટલાક વિસ્તારોમાં ઈમરજન્સી પણ જાહેર કરવામાં આવી છે.
હ્યુમનમેટાપ્યુમો વાયરસ શું છે?
હ્યુમન મેટાપ્યુમોવાયરસ એ શ્વસન સંબંધી વાયરસ છે, જે 2001 માં પ્રથમ વખત ઓળખવામાં આવ્યો હતો. આ વાયરસ ખાસ કરીને નાના બાળકો, વૃદ્ધો અને નબળી રોગપ્રતિકારક શક્તિ ધરાવતા લોકોને અસર કરે છે. તાજેતરમાં, ચીનમાં આ વાયરસના કેસમાં વધારો જોવા મળ્યો છે. જોકે, ચીનમાં કુલ કેટલા કેસ નોંધાયા છે તેની કોઈ સત્તાવાર માહિતી ઉપલબ્ધ નથી. પરંતુ જાપાનમાં 15 ડિસેમ્બરે સુધી 94,000 થી વધુ કેસ નોંધાયા હતા અને અત્યાર સુધીમાં ત્યાં કુલ 7,18,000 કેસ નોંધાયા છે.
વાયરસના લક્ષણો
HMPV ના લક્ષણો સામાન્ય ફ્લૂ અને કોરોના વાયરસ જેવા જ છે. તેમાં ઉધરસ, તાવ, નાક બંધ થવું અને શ્વાસ લેવામાં તકલીફ જેવા લક્ષણોનો સમાવેશ થાય છે. ગંભીર કિસ્સાઓમાં આ વાયરસ ન્યુમોનિયાનું કારણ બની શકે છે. વાયરસથી સંક્રમિત વ્યક્તિ સામાન્ય રીતે 3-6 દિવસ સુધી બીમાર રહી શકે છે. આ વાયરસ ખાંસી, છીંક અથવા સીધા સંપર્ક દ્વારા ફેલાય છે.
ચીનના વાયરસને લઈને ભારત સરકાર એલર્ટ
ચીનમાં આ વાયરસ ફેલાયા બાદ ભારત સરકાર પણ સતર્ક થઈ ગઈ છે. નેશનલ સેન્ટર ફોર ડિસીઝ કંટ્રોલ(NCDC)એ શ્વસન અને મોસમી રોગોની નજીકથી દેખરેખ શરૂ કરી છે. સરકારી સૂત્રોએ કહ્યું છે કે પરિસ્થિતિ પર નજીકથી નજર રાખવામાં આવી રહી છે અને નક્કર માહિતી મળતાં જ જરૂરી પગલાં લેવામાં આવશે. હાલમાં, ભારતમાં આ વાયરસનો કોઈ કેસ નોંધાયો નથી.
વાયરસને રોકવા શું કરવું
આ વાયરસ સામે રક્ષણ મેળવવા માટે, કોરોના વાયરસ જેટલી જ સાવચેતી રાખવાની જરૂર છે.
સાબુ અને પાણીથી નિયમિતપણે હાથ ધોવા.
ગંદા હાથથી આંખો, નાક અને મોંને સ્પર્શ કરવાનું ટાળો.
ચેપગ્રસ્ત વ્યક્તિથી યોગ્ય અંતર જાળવો.
જો તમે લક્ષણો અનુભવો છો, તો તમારી જાતને અલગ કરો.
છીંક અને ખાંસી આવતા લોકોથી અંતર જાળવો.
જો તમે બીમાર હો, તો ઘરે આરામ કરો અને અન્ય લોકો સાથે સંપર્ક ઓછો કરો.
