Narmada: નર્મદા જિલ્લાના ડેડીયાપાડામાં આમ આદમી પાર્ટી (AAP)ના ધારાસભ્ય ચૈતર વસાવા અને ભાજપના સ્થાનિક નેતાઓ વચ્ચે તાલુકા સંકલન સમિતિની બેઠક દરમિયાન તીવ્ર ઘર્ષણની ઘટના બની. આ ઘટનામાં ઉગ્ર બોલાચાલીથી શરૂ થયેલી ઝપાઝપી મારામારી સુધી પહોંચી, જેના પગલે ચૈતર વસાવાની ધરપકડ કરવામાં આવી. આ ઘટનાએ રાજકીય વર્તુળોમાં ભારે ચર્ચા જગાવી છે.
તાલુકા પંચાયતની બેઠકમાં ઉગ્ર ઝપાઝપી
ડેડીયાપાડાની પ્રાંત કચેરી ખાતે યોજાયેલી તાલુકા સંકલન સમિતિની બેઠકમાં ચૈતર વસાવા અને ભાજપ શાસિત તાલુકા પંચાયતના પ્રમુખ સંજય વસાવા વચ્ચે વિવાદ થયો હતો. મળતી માહિતી મુજબ ચૈતર વસાવાએ સાગબારા તાલુકાના પ્રમુખ ચંપાબેન વસાવાને અપશબ્દો બોલ્યા હતા. જ્યારે સંજય વસાવાએ આ મામલે વચ્ચે પડવાનો પ્રયાસ કર્યો, ત્યારે ચૈતરે તેમને લાફો માર્યો હોવાનો આરોપ છે. ચૈતરે કથિત રીતે એવું પણ કહ્યું કે, “હું ધારાસભ્ય છું, મારે કહ્યું તે પ્રમાણે કામ કરવાનું.” આ ઘટનાએ બેઠકમાં હાજર લોકોમાં રોષ ફેલાવ્યો, અને પરિસ્થિતિ વધુ તંગ બની.
Narmada: MLA ચૈતર વસાવાને પોલીસ ઉપાડી ગઈ #Narmada #ChaitarVasava #Dediyapadamla #ChaitarVasavaArrested #police #BJP #AAP #gujarat #Thegujaratreport pic.twitter.com/Zq969kz9AI
— The Gujarat Report (@TGujarat_Report) July 5, 2025
ધરપકડ પર સમર્થકોમાં રોષ
ઝપાઝપી બાદ પોલીસે ચૈતર વસાવાની ધરપકડ કરી, જેના કારણે તેમના સમર્થકોમાં ભારે આક્રોશ ફેલાયો. ચૈતરને લઈ જતી પોલીસ વાનને સમર્થકોએ ઘેરી લીધી, અને કેટલાક લોકો તો વાન પર ચડી ગયા હતા. સમર્થકોનો આક્ષેપ હતો કે ચૈતરની ધરપકડ રાજકીય દબાણ હેઠળ કરવામાં આવી છે. આ ઘટનાએ સ્થાનિક વિસ્તારમાં તણાવનું વાતાવરણ સર્જ્યું, અને પોલીસે પરિસ્થિતિને કાબૂમાં લેવા માટે ભારે બંદોબસ્ત ગોઠવ્યો છે.
