- વડોદરાના વાઘોડિયા તાલુકાના માડોધ રોડ પર બનેલી ઘટનાના સીસીટીવી સામે આવ્યા.
- બેફામ ડમ્પરને ટુ-વ્હીલર સવાર માતા – પુત્રીને અડફેટે લીધા હતાં.
Vadodara । બે દિવસ અગાઉ વડોદરાના વાઘોડિયા તાલુકામાં હિટ એન્ડ રનનો કિસ્સો બન્યો હતો. જેના સીસીટીવી હાલ સામે આવ્યા છે. બેફામ ડમ્પર હંકારનાર ચાલકે ટુ-વ્હીલરને ટક્કર મારતાં એક માસૂમ બાળકીનું મોત નિપજ્યું હતું.
બનાવની પ્રાપ્ત થતી વિગતો એવી છે કે, વાઘોડિયા તાલુકાના રવાલ ગામના વતની સ્નેહાલીબહેન પટેલના પતિ સાઉદી અરબમાં નોકરી કરી રહ્યાં છે. જ્યારે તેઓ હાલ 12 વર્ષની દીકરી કાવ્યા અને 10 વર્ષની દીકરી જીલ સાથે રહે છે.
બે દિવસ અગાઉ મોટી દીકરી કાવ્યાની તબિયત બગડતાં તેઓ ડોક્ટર પાસે દવા લેવા ગયા હતાં. દરમિયાનમાં માડોધર ગામે રહેતાં તેમના ભાઈ કૌશિક પટેલનો ફોન આવ્યો હતો. જેમાં તેમણે જણાવ્યું હતું કે, કાવ્યાને તેમને ત્યાં મૂકી જાય.
જેને પગલે સ્નેહાલી પટેલ ટુ-વ્હીલર પોતાની બંને દીકરીઓ સાથે માડોધર જવા માટે નિકળ્યા હતાં. તેઓ ગેલેક્સી સોસાયટી પાસેથી પસાર થઈ રહ્યા હતાં ત્યારે એક બેફામ ડમ્પર ચાલકે તેઓના ટુ-વ્હીલરને અડફેટે લીધું હતું અને લગભગ 50 મીટર સુધી તેઓ ઢસડાયા હતાં. અકસ્માત સર્જીને ડમ્પરચાલક ફરાર થઈ ગયો હતો. અકસ્માતને પગલે સ્નેહાલી પટેલ અને તેમની દીકરીઓને ગંભીર ઈજાઓ પહોંચી હતી.
બનાવને પગલે દોડી આવેલાં લોકોએ તેઓને તાત્કાલિક હોસ્પિટલ ખસેડ્યા હતાં. જ્યાં ટૂંકી સારવાર બાદ કાવ્યા પટેલનું મોત નિપજ્યું હતું. આ અંગે જાણ થતાં સ્નેહાલી પટેલના પતિ સાઉદી અરબથી તાત્કાલિક દોડી આવ્યા હતાં.
બનાવ અંગેની ફરિયાદને આધારે વાઘોડીયા પોલીસે ફરાર ડમ્પરચાલકની શોધખોળ હાથ ધરી છે. હાલ તો બનાવના સીસીટીવી ફૂટેજ પોલીસને હાથ લાગ્યા છે.
