Unseasonal Rain: રાજ્યમાં આજે તા. 19 થી 20 માર્ચ સુધી ગાજવીજ અને ભારે પવન સાથે વરસાદની આગાહીને પગલે રાજ્યમાં વરસાદી માહોલ ક્રિએટ થયો છે અને રાજ્યના અનેક વિસ્તારોમાં ભારે પવન સાથે કમોસમી વરસાદ થયાના અહેવાલ છે, સાથેજ સર્વત્ર ઠંડા પવનો ફૂંકાતા ઠંડક પ્રસરી ગઈ છે.
અપર એર સાઇક્લોનિક સર્ક્યુલેશન સિસ્ટમ અને વેસ્ટર્ન ડિસ્ટર્બન્સની અસરને પગલે રાજ્યમાં વરસાદી માહોલ જોવા મળી રહ્યો છે અને હળવો વરસાદ અને ભારે પવનો ફૂંકાઈ રહયા છે, આગામી 20 માર્ચ સુધી મહત્તમ તાપમાનમાં બેથી ત્રણ ડિગ્રી સેલ્સિયસ ઘટાડો રહેશે.
હવામાન વિભાગ દ્વારા બે દિવસ સુધી 25થી વધુ જિલ્લામાં વરસાદની આગાહી થઈ છે જેમાં આજે તા.19 માર્ચના બનાસકાંઠા, પાટણ, પંચમહાલ, ભરૂચ, સુરત, ડાંગ, તાપી, નવસારી, વલસાડ, દમણ, દાદરા નગર હવેલી, સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છ અને દીવમાં ભારે પવન અને ગાજવીજ સાથે કમોસમી વરસાદની આગાહી કરવામાં આવી છે.
જ્યારે આવતી કાલે તા. 20 માર્ચના બનાસકાંઠા, સાબરકાંઠા, અરવલ્લી,દાહોદ, મહીસાગર, કચ્છમાં કમોસમી વરસાદની આગાહી કરવામાં આવી છે, રાજ્યના કચ્છ અને મોરબી, સુરેન્દ્રનગર અને બનાસકાંઠા, પાટણ અને મહેસાણા, અમદાવાદ અને ગાંધીનગર, સાબરકાંઠા અને અરવલ્લી, મહીસાગર, પંચમહાલ, દાહોદ અને ખેડામાં યેલો એલર્ટ સાથે હળવાથી મધ્યમ વરસાદની આગાહી થઈ છે, દરમિયાન આજે સવારથીજ રાજ્યમાં હવામાનમાં પલટો આવ્યો છે અને અનેક વિસ્તારોમાં ભારે પવન અને વંટોળીયો ફૂંકાયો હતો અને વરસાદના અમી છાંટણા પડતા ઠંડક પ્રસરી છે.
વાવ-થરાદમાં ભારે પવન સાથે કમોસમી વરસાદ પડયાના અહેવાલ છે,વાવ અને થરાદ અને જિલ્લામાં મધરાત્રે વાતાવરણમાં અચાનક પલટો આવ્યો હતો,ભારે તોફાની પવન સાથે કમોસમી વરસાદ વરસ્યો હતો.
વાવ, સુઈગામ, ભાભર અને થરાદ સહિતના વિસ્તારોમાં મધરાત્રે ભારે પવન ફૂંકાવા સાથે વાતાવરણમાં પલટો આવ્યો હતો, અમદાવાદમાં ઠેરઠેર ધૂળની ડમરીઓ ઉડવા સાથે વાતાવરણમાં પલટો આવ્યો હતો.
અમદાવાદના ઉજાલા સર્કલ વિસ્તારમાં ધૂળની ડમરીઓ ઉડતા વિઝીબિલિટી ઓછી થઈ અને ઉજાલા અને વણઝર વિસ્તારમાં વીજળી ગુલ થઈ જતા અંધારપટ છવાયો હતો.
રાજ્યમાં વિસનગરમાં પણ ભારે પવન ફૂંકાતા અનેક દુકાનોના શેડ હોડિંગ તૂટ્યા હતા આ ઉપરાંત રાજ્યના સાબરકાંઠા જિલ્લામાં પણ વાતાવરણમાં પલટો આવ્યો હતો અને ભારે પવન ફૂંકાયો હતો,હિંમતનગરમાં વહેલી સવારે ભારે પવન ફૂંકાતા ધૂળની ડમરીઓ ઉડી હતી. કેટલાક વિસ્તારમાં વીજ પુરવઠો પણ ખોરવાઈ ગયાના અહેવાલો છે.
આમ રાજ્યમાં વરસાદી માહોલ જોવા મળી રહ્યો છે.
આ પણ વાંચો:
OIC: “ઇસ્લામિક વર્લ્ડ” એકજ ઝાટકે ખતમ; ઈઝરાયેલ-અમેરિકા સામે 57 દેશોનું સંગઠન “કાગનો વાઘ” સાબિત થયુ!
