‘ઇન્ડિયા’ બ્લોકના રાજ્યસભાના સાંસદોએ બુધવારે (11 ડિસેમ્બર) કહ્યું કે તેમના પાસે ઉપરાષ્ટ્રપતિ અને સભાના અધ્યક્ષ જગદીપ ધનખડને હટાવવા માટે નોટિસ જારી કરવા સિવાય અન્ય કોઈ વિકલ્પ બચ્યો નથી. વિપક્ષના સાંસદોએ ધનખડ પર સત્તારૂઢ પક્ષના પ્રવક્તા તરીકે વર્તન કરવાનો આરોપ લગાવ્યો.
કોંગ્રેસ અધ્યક્ષ અને રાજ્યસભામાં વિપક્ષના નેતા મલ્લિકાર્જુન ખડગેએ નવી દિલ્હીમાં ‘ઇન્ડિયા’ ગઠબંધનના અન્ય સાંસદો સાથે સંયુક્ત પત્રકાર પરિષદને સંબોધિત કરતા કહ્યું, ‘ઇતિહાસમાં પ્રથમ વખત અમારા પાસે એવા ઉપરાષ્ટ્રપતિ છે જે જાહેર મંચો પરથી વિપક્ષી પક્ષોની ખુલ્લેઆમ ટીકા કરે છે અને સત્તારૂઢ પક્ષના પ્રવક્તા તરીકે વર્તન કરે છે, અને ક્યારેક તો તેમને પણ પાછળ છોડી દે છે.
મંગળવારે (10 ડિસેમ્બર) ઇન્ડિયા બ્લોગે પક્ષપાતી વર્તન કરવાનો અને સભામાં વિપક્ષી અવાજોને સાંભળવા ન દેવાના તેમના નિર્ણયોને ઉલ્લેખ કરીને ધનખડને પદ પરથી હટાવવા માટે નોટિસ બહાર પાડી.
આ નોટિસની નિંદા કરતા કેન્દ્રીય સંસદીય કાર્ય મંત્રી કિરણ રિજિજુએ ધનખડનું બચાવ કરતા તેમને ‘નિષ્પક્ષ’ ગણાવ્યા.
બુધવારે (11 ડિસેમ્બર) પત્રકાર પરિષદમાં ખડગેએ કહ્યું કે નોટિસ જારી કરવાનો નિર્ણય વ્યક્તિગત દુશ્મનીને કારણે નહીં પરંતુ બંધારણીય પદની રક્ષા કરવા માટે લેવામાં આવ્યો છે.
ખડગે કહે છે, ‘મને આ કહેતા ખૂબ દુઃખ થાય છે કે ચેરમેનએ અમારા પાસે આ નોટિસ પર આગળ વધવા સિવાય કોઈ વિકલ્પ છોડ્યો નથી. છેલ્લા ત્રણ વર્ષમાં વિપક્ષને મહત્વપૂર્ણ મુદ્દાઓ ઉઠાવવા માટે સમય અને જગ્યા આપવાના બદલે, અધ્યક્ષે તેમનો એવો વર્તાવ કર્યો છે જેમ કે તેઓ શાળાના વિદ્યાર્થીઓ હોય. તે વિપક્ષી નેતાઓનો અપમાન કરવાનો કોઈપણ મોકો ચૂકતાં નથી.’
ભાજપ આરોપ લગાવી રહી છે કે વિપક્ષ સભા ચલાવવા દેતો નથી, જ્યારે ખડગે કહે છે કે ‘અધ્યક્ષ પોતે જ સૌથી મોટા વિક્ષેપ છે.’
વિપક્ષના નેતા કહે છે, ‘રાજ્યસભામાં સૌથી મોટા વિક્ષેપ અધ્યક્ષ પોતે છે. તે અન્ય લોકોને પાઠ ભણાવે છે અને અન્ય લોકોને બોલવાથી રોકીને સભાની કાર્યવાહી ન ચાલવા દેવાનો પ્રયાસ કરે છે. સભાના સંરક્ષક અને દરેક સભ્યના અધિકારોના રક્ષક તરીકે તેમની પાસેથી રાજકારણથી ઉપર ઉઠવાની અને તે સુનિશ્ચિત કરવાની અપેક્ષા રાખવામાં આવે છે કે તમામ સભ્યોની અવાજ સાંભળવામાં આવે.’
ખડગેએ કહ્યું કે ‘ધનખડ વિપક્ષી સભ્યો દ્વારા નિયમ 267 હેઠળ આપવામાં આવેલા નોટિસને ફગાવી દે છે, અને ટ્રેઝરી બેંચના સભ્યોને બોલવાની મંજૂરી આપે છે અને સભાની ગૌરવને ઠેસ પહોંચાડતા તેમને વિપક્ષ સામે અપમાનજનક ટિપ્પણી કરવા માટે ખુલ્લેઆમ પ્રોત્સાહિત કરે છે અને ઉશ્કેરે છે.’
કોંગ્રેસ અધ્યક્ષ આગળ કહે છે, ‘આ નોટિસ વ્યક્તિગત ફરિયાદો અથવા રાજકીય લડાઈ વિશે નથી. અમે ભારતના લોકો પાસે વિનમ્રતાપૂર્વક આ સમજવાની અપીલ કરીએ છીએ કે આ નોટિસ બંધારણ અને સંસદીય લોકશાહીનું રક્ષણ કરવા માટેના એકમાત્ર હેતુ સાથે ઊંડા વિચારવિમર્શ પછી દાખલ કરવામાં આવી છે.’
પ્રેસ કોન્ફરન્સમાં ફૌઝિયા ખાન (રાષ્ટ્રવાદી કોંગ્રેસ પાર્ટી (શરદ પવાર)), મનોજ ઝા (રાષ્ટ્રીય જનતા દળ), જયરામ રમેશ, સૈયદ નસીર હુસેન (કોંગ્રેસ), જાવેદ અલી ખાન (સમાજવાદી પાર્ટી), નદીમુલ હક, સાગરિકા ઘોષ (તૃણમૂલ કોંગ્રેસ), જ્હોન બ્રિટાસ (કમ્યુનિસ્ટ પાર્ટી ઓફ ઇન્ડિયા (માર્ક્સવાદી)) અને સંદોશ કુમાર પી (કમ્યુનિસ્ટ પાર્ટી ઓફ ઇન્ડિયા) સહિત ઇન્ડિયા ગઠબંધનના અન્ય સાંસદો પણ સામેલ થયા.
બંધારણના કલમ 67 (બી) હેઠળ, એક ઉપરાષ્ટ્રપતિને તેના કાર્યાલયમાંથી ત્યારે જ હટાવી શકાય છે જ્યારે તેના માટે એક પ્રસ્તાવ રાજ્યસભાના તત્કાલિન સભ્યોના બહુમતી દ્વારા પસાર કરવામાં આવે અને પછી લોકસભા દ્વારા તે પ્રસ્તાવ પર સહમતી નોંધવામાં આવે. પરંતુ આ પ્રસ્તાવ ત્યારે જ રજૂ કરી શકાય છે, જ્યારે તેને રજૂ કરવાની મંજુરી માટે ઓછામાં ઓછા ચૌદ દિવસની નોટિસ આપવામાં આવી હોય.
આ નોટિસ 10 ડિસેમ્બરે જમા કરવામાં આવી હતી, તેથી આ પ્રસ્તાવ આ સત્રમાં આવશે તે શક્ય નથી, કારણ કે શિયાળુ સત્ર 20 ડિસેમ્બરે સમાપ્ત થવાનું છે.
આ અંગે કોંગ્રેસ સાંસદ સૈયદ નસીર હુસેને કહ્યું કે જો આ સ્થિતિમાં નોટિસ સ્વીકારવામાં નહીં આવે, તો આ પર આગળ કેવી રીતે વધવું તે વિચારવામાં આવશે.
પ્રેસ કોન્ફરન્સ દરમિયાન ઇન્ડિયા બ્લોકના અન્ય સાંસદોએ પણ આ બાબતે ચિંતા વ્યક્ત કરી કે સભામાં વિપક્ષી સભ્યોની વાત કેવી રીતે સાંભળવામાં આવતી નથી.
રાજદ સાંસદ મનોજ ઝાએ કહ્યું, ‘આ કોઈ વ્યક્તિ સાથે નહીં પરંતુ એક બંધારણીય પદ સાથે સંબંધિત છે. આ વિપક્ષી અવાજોને સમાપ્ત કરવા અને વિપક્ષને અદૃશ્ય બનાવવા માટેના પ્રયાસ વિશે છે. આ નોટિસ લોકશાહીના મૂળ સિદ્ધાંતોની પુનઃસ્થાપન માટે છે.’
વિપક્ષી સાંસદોએ આ બાબતે પણ ચિંતા વ્યક્ત કરી કે સંસદ ટીવી માત્ર ટ્રેઝરી બેંચને જ બતાવી રહ્યું છે, વિપક્ષને નહીં.
ડીએમકેના સાંસદ તિરુચિ શિવાએ કહ્યું, ‘પહેલા જ્યારે ભાજપ વિપક્ષમાં હતી અથવા કોંગ્રેસ પણ વિપક્ષમાં હતી, ત્યારે જ્યારે પણ વિપક્ષના નેતા બોલવા માટે ઊભા થતા હતા, ત્યારે તેમને મંજુરી આપવામાં આવતી હતી, પરંતુ હવે જ્યારે પણ તેઓ બોલવાનું શરૂ કરે છે ત્યારે તેમને રોકી દેવામાં આવે છે, તેમનો માઇક બંધ કરી દેવામાં આવે છે.’
તેમણે કહ્યું, ‘સંસદની અંદર શું થઈ રહ્યું છે, લોકો જાણશે પણ નહીં કારણ કે સંસદ ટીવી માત્ર એક પક્ષને જ બતાવે છે. જનતાને નક્કી કરવા દો કે અમે જે કરી રહ્યા છીએ તે સાચું છે કે ખોટું. પરંતુ સંસદ ટીવી માત્ર ટ્રેઝરી પક્ષને જ બતાવે છે.’
