Assam journalist arrest: આસામ પોલીસે ગુવાહાટીના પાન બજારમાં વરિષ્ઠ ડિજિટલ મીડિયા પત્રકાર દિલવર હુસૈન મઝુમદારની ધરપકડ કરી છે. પોલીસે છેતરીને ઘા કર્યો હોવાના આક્ષેપ થઈ રહ્યા છે. જેથી આસામના રાજકારણ અને પોલીસબેડામાં ચકચાર મચી ગયો છે. આ ઘટનાનો પત્રકારો પણ વિરોધ કરી રહ્યા છે. આરોપ છે કે કરોડો રૂપિયાનું ભરતી કૌભાંડ અંગે આસામ કો-ઓપરેટિવ એપેક્સ બેંકના મેનેજિંગ ડિરેક્ટર દંબારુ સૈકિયાને પૂછપરછ કરવાનો પ્રયાસ કર્યા બાદ દિલવર ધરપકડ કરવામાં આવી હતી.
કેેવી રીતે થઈ પત્રકારની ધરપકડ
આસામ રાષ્ટ્રીય પરિષદ (AJP) સાથે સંકળાયેલી યુવા પાંખ, નેશનલ યુથ પાવર, બેંકમાં થયેલા કથિત કૌભાંડનો વિરોધ કરી રહી હતી. જેથી પત્રકાર દિલવર હુસૈન મઝુમદાર વિરોધ પ્રદર્શનને કવર કરવા માટે બેંક પરિસરમાં પહોંચ્યા હતા. તેમણે કૌભાંડ અંગે બેંકના મેનેજિંગ ડિરેક્ટરને પૂછપરછ કરવાનો પ્રયાસ કર્યો હતો. જો કે બાદમાં પોલીસે તેમને પાનબજાર પોલીસ સ્ટેશનમાં બોલાવ્યા અને ત્યારબાદ તેમની ધરપકડ કરી હતી. ગુવાહાટી પ્રેસ ક્લબે ધરપકડની સખત નિંદા કરી છે, તેને પ્રેસ સ્વતંત્રતા પર હુમલો ગણાવ્યો છે. ક્લબે આજે સવારે 11 વાગ્યે પોતાનો વિરોધ વ્યક્ત કરવા માટે વિરોધ સભાનું આયોજન કરવાની જાહેરાત કરી હતી.
પત્રકારોના અધિકારો પર તરાપ
આસામ કો-ઓપરેટિવ એપેક્સ બેંકના ડિરેક્ટર મુખ્યમંત્રી હિમંતા બિસ્વા શર્મા છે. બેંકના ચેરમેન ધારાસભ્ય વિશ્વજીત ફુકન છે. ધરપકડ કરાયેલ પત્રકાર ગુવાહાટી પ્રેસ ક્લબના સંયુક્ત સચિવ પણ છે. આ ધરપકડની વિવિધ મીડિયા અને નાગરિક અધિકાર સંગઠનો દ્વારા ટીકા કરવામાં આવી છે, જેનાથી આસામમાં પ્રેસ સ્વતંત્રતા અને પત્રકારોના અધિકારો અંગે ચિંતા વ્યક્ત કરવામાં આવી છે.
