Iran: એક તરફ અમેરિકા ઈરાન ઉપર ગમેત્યારે હુમલો કરે તેવી શકયતા વચ્ચે ઈરાનને ઘેરી લીધું છે અને ભારે તંગદિલીનો માહોલ છે ત્યારે બરાબર દક્ષિણ ઈરાનમાં આજે ગુરુવારે બપોરે ભૂકંપના જોરદાર આંચકા આવતા સુરક્ષા દળો એલર્ટ થઈ ગયા છે કારણકે જે રીતે ધરા ધ્રુજી તે જોતા ક્યાંક ઇરાને અણુ પરિક્ષણતો નથી કર્યું ને.. તે વાત આગની જેમ ફેલાઈ જતા અનેક અટકળો વહેતી થઈ છે.
જર્મનીના ભૂ-વિજ્ઞાન સંશોધન કેન્દ્ર (GFZ) અનુસાર, ભૂકંપની તીવ્રતા રિક્ટર સ્કેલ પર 5.5 નોંધાઈ હતી અને તેનું કેન્દ્રબિંદુ જમીનથી માત્ર 10 કિલોમીટરની ઊંડાઈએ હતું. ઓછી ઊંડાઈને કારણે તીવ્ર આંચકો આવતા લોકોમાં ભારે ગભરાટ જોવા મળ્યો હતો.
બીજી તરફ ઈરાને ગુપ્ત રીતે કોઈ ન્યુક્લિયર ટેસ્ટ કર્યો છે કે કેમ ? તે મામલે આંતરરાષ્ટ્રીય ચર્ચા તીવ્ર બનતા સુરક્ષા દળો એલર્ટ થઈ ગયા હતા.જોકે, સત્તાવાર રીતે આ વાતની કોઈ પુષ્ટિ થઈ શકી નથી, ઈરાન ઉપર અમેરિકા ગમેત્યારે હુમલો કરે તે સ્થિતિમાં આ ભૂકંપ આવતા આંતરરાષ્ટ્રીય એજન્સીઓ અત્યારે આ ડેટાનુ ગંભીરતાથી નિરીક્ષણ કરી રહી છે કે આ આંચકા કુદરતી હતા કે માનવસર્જિત.
બીજી તરફ ઈરાન સરકારે અસરગ્રસ્ત વિસ્તારોમાં ડિઝાસ્ટર મેનેજમેન્ટની ટીમોને હાઈ એલર્ટ પર રાખી છે.
લગભગ 35,000 ની વસ્તી ધરાવતું મોહર શહેર ભૂકંપના કેન્દ્રની નજીક છે. ફાર્સ પ્રાંતના અન્ય શહેરોમાં પણ હળવા આંચકા અનુભવાયા હતા. હાલમાં કોઈ મોટા નુકસાન કે જાનમાલના નુકસાનના અહેવાલ નથી પરંતુ તણાવપૂર્ણ સ્થિતિને જોતા સુરક્ષા એજન્સીઓ સતર્ક થઈ ગઈ છે.
ઈરાનમાં હાલની તંગ પરિસ્થિતિ અને તેના પરમાણુ કાર્યક્રમ અંગે ચાલી રહેલી ચર્ચાઓ વચ્ચે, કેટલાક લોકો સોશિયલ મીડિયા પર શું આ પરમાણુ પરીક્ષણ હતુ ? તે અંગે અટકળો વહેતી થઈ હતી. જોકે, નિષ્ણાતો અને આંતરરાષ્ટ્રીય એજન્સીઓ તે મામલે તપાસમાં લાગી છે અને મોટાભાગનાનું માનવું છે કે આ કુદરતી રીતે આવેલો ભૂકંપ હોઈ શકે છે.
