Lawrence Bishnoi DOJ charges: અમેરિકાના ન્યાય વિભાગ (DOJ) એ એક ઐતિહાસિક અને આક્રમક કાયદાકીય કાર્યવાહી શરૂ કરી છે, જેણે આંતરરાષ્ટ્રીય ગુનાખોરીના નેટવર્કને હચમચાવી દીધું છે. ‘ઓપરેશન હાર્ડ બોલ’ નામના આ અભિયાન અંતર્ગત, અમેરિકાએ ભારતના કુખ્યાત ગેંગસ્ટર લોરેન્સ બિશ્નોઈ અને તેના નજીકના સાથી ગોલ્ડી બરાડ પર સનસનાટીભર્યા આરોપો લગાવ્યા છે. આ તપાસમાં સામે આવ્યું છે કે આ ગેંગ માત્ર ભારતમાં જ નહીં, પરંતુ અમેરિકા, કેનેડા અને યુરોપ સુધી પોતાનું વિસ્તૃત નેટવર્ક ચલાવી રહી હતી. ન્યાય વિભાગના જણાવ્યા અનુસાર, આ ગેંગો દ્વારા રંગદારી, ટાર્ગેટ કિલિંગ, ડ્રગ્સની હેરાફેરી અને માનવ તસ્કરી જેવા ગંભીર ગુનાઓને અંજામ આપવામાં આવતો હતો. આ કાર્યવાહીમાં અત્યાર સુધી કુલ 37 આરોપીઓ વિરુદ્ધ ત્રણ અલગ-અલગ ચાર્જશીટ દાખલ કરવામાં આવી છે અને 24 લોકોની ધરપકડ કરવામાં આવી છે, જેમાંથી ઘણા કેલિફોર્નિયા સહિતના અમેરિકી રાજ્યોમાંથી ઝડપાયા છે.
હરદીપ સિંહ નિજરની હત્યાનો આરોપ
આ ચાર્જશીટમાં સૌથી ચોંકાવનારો મુદ્દો 18 જૂન 2023ના રોજ કેનેડામાં થયેલી શીખ અલગતાવાદી હરદીપ સિંહ નિજરની હત્યાનો છે. દસ્તાવેજોમાં નિજરની ઓળખ ‘H.S.N.’ તરીકે કરવામાં આવી છે. અમેરિકી તપાસ એજન્સીઓનો સ્પષ્ટ આરોપ છે કે આ હત્યાનું કાવતરું લોરેન્સ બિશ્નોઈ અને ગોલ્ડી બરાડના નિર્દેશ પર ઘડવામાં આવ્યું હતું. બ્રિટિશ કોલંબિયાના સરેમાં એક ગુરુદ્વારા બહાર થયેલી આ ગોળીબારની ઘટનાએ ભારત અને કેનેડાના રાજદ્વારી સંબંધોમાં ભારે તણાવ ઊભો કર્યો હતો. હવે અમેરિકા દ્વારા આ બાબતે સત્તાવાર રીતે આરોપીઓ પર આરોપ મૂકવો એ સાબિત કરે છે કે તપાસ એજન્સીઓ પાસે આ ગુના પાછળના માસ્ટરમાઇન્ડ્સ વિશે પાકા પુરાવા છે. ગોલ્ડી બરાડની ધરપકડમાં મદદરૂપ માહિતી આપનાર માટે અમેરિકી તપાસ સંસ્થા FBI દ્વારા 50,000 ડોલરના ઈનામની પણ જાહેરાત કરવામાં આવી છે.
The FBI is offering a reward of up to $50,000 in exchange for information leading to the arrest of Satinderjeet Singh who is wanted for his alleged involvement in the Lawrence Bishnoi Organized Crime Group, targeted in today’s “Operation Hard Ball.” The group is allegedly… pic.twitter.com/HAmfMHBI7G
— FBI Los Angeles (@FBILosAngeles) July 8, 2026
જેલની અંદરથી ચાલતું ક્રાઈમ સિન્ડિકેટ
ન્યાય વિભાગે લોરેન્સ બિશ્નોઈની કાર્યપદ્ધતિ પર ગંભીર ટિપ્પણી કરતા જણાવ્યું છે કે તે ભારતની જેલમાં બંધ હોવા છતાં અત્યંત આધુનિક ટેકનોલોજીનો ઉપયોગ કરીને પોતાનું સામ્રાજ્ય ચલાવી રહ્યો હતો. બિશ્નોઈ જેલમાં સ્મગલિંગ દ્વારા પહોંચાડવામાં આવેલા મોબાઈલ ફોન અને ઈન્ટરનેટ કોલિંગ ટૂલ્સનો ઉપયોગ કરીને હત્યા, ખંડણી અને ડ્રગ્સની હેરાફેરી જેવી ઘટનાઓનું સંચાલન કરતો હતો. આ નેટવર્ક માત્ર પંજાબ કે ભારત પૂરતું સીમિત ન રહેતા અનેક દેશોમાં ફેલાયેલું હતું. તે પોતે જેલમાં રહીને તેના સહયોગીઓ દ્વારા રાજકીય અને ધાર્મિક નેતાઓને નિશાન બનાવતો હતો, જે કાયદાના શાસન માટે એક મોટો પડકાર છે.
જગ્ગુ ભગવાનપુરિયા અને રવિન્દ્ર સિંહ ઢાંઢાનું નેટવર્ક
આ તપાસમાં બિશ્નોઈ ઉપરાંત જગ્ગુ ભગવાનપુરિયા અને રવિન્દ્ર સિંહ ઢાંઢાના ગેંગનું પણ નામ ખૂલ્યું છે. ભગવાનપુરિયા, જે પહેલા બિશ્નોઈનો સાથી હતો અને બાદમાં તેનો કટ્ટર પ્રતિસ્પર્ધી બન્યો, તેણે પણ અમેરિકા અને અન્ય દેશોમાં પોતાનું અલગ આંતરરાષ્ટ્રીય નેટવર્ક ઊભું કર્યું હતું. આરોપ છે કે આ ગેંગે ભારતના કેટલાક ભ્રષ્ટ સરકારી અધિકારીઓ સાથે સાંઠગાંઠ કરીને પોતાની તાકાત વધારી હતી અને પોલીસ એજન્સીઓને ખોટી માહિતી આપીને વિરોધીઓને હેરાન કર્યા હતા. બીજી તરફ, કેનેડામાં રહેતો રવિન્દ્ર સિંહ ઢાંઢા મોટા પાયે કોકેઈન અને મેથામ્ફેટામાઈન જેવા નશીલા પદાર્થોની તસ્કરીમાં સામેલ હોવાનો આરોપ છે. આ ડ્રગ્સની હેરાફેરી માટે ટ્રકો અને ખેતીના વાહનોનો ઉપયોગ કરીને અમેરિકાથી કેનેડા સુધીના સીમાવર્તી વિસ્તારોમાં મોટું નેટવર્ક ચલાવવામાં આવતું હતું.
.@USAttyEssayli addressed the media in Los Angeles today to announces arrests and criminal charges against members of India-based organized crime syndicates. Also addressing the press were @FBILosAngeles Assistant Director in Charge Patrick Grandy, @LAPDPoliceChief , and… pic.twitter.com/DgzXRe9RQZ
— US Attorney L.A. (@USAO_LosAngeles) July 7, 2026
પુલિશ અને ભ્રષ્ટાચારનો ગઠજોડ
ચાર્જશીટમાં એક ચોંકાવનારો કિસ્સો કેલિફોર્નિયામાં રહેતા ગુરલાલ સિંહ સાથે જોડાયેલો છે, જે દર્શાવે છે કે આ ગેંગસ્ટરો કેવી રીતે ભ્રષ્ટ અધિકારીઓ સાથે મળીને નિર્દોષ લોકોને ડરાવે છે. ગુરલાલે અમેરિકામાં રહેતા એક વ્યક્તિ પાસે ખંડણી માંગવા માટે પંજાબના એક અધિકારીનો સહારો લીધો હતો. જ્યારે તે વ્યક્તિએ પૈસા આપવાની ના પાડી, ત્યારે તે અધિકારીએ ભારતમાં તેના પરિવારના સભ્યો સામે ખોટા કેસ નોંધી દીધા. આ ઘટના એ વાતનો જીવંત પુરાવો છે કે આ આંતરરાષ્ટ્રીય ગેંગસ્ટરો ભૌગોલિક સીમાઓને ઓળંગીને ભારતની ન્યાયિક અને પોલીસ પ્રક્રિયાનો પણ દુરુપયોગ કરવામાં માહિર છે.
આંતરરાષ્ટ્રીય સહયોગ અને ભાવિ દિશા
આ કાર્યવાહી એટલા માટે મહત્વની છે કારણ કે ભારત સરકાર લાંબા સમયથી આંતરરાષ્ટ્રીય ગેંગસ્ટર નેટવર્ક સામે વૈશ્વિક સહયોગની માંગ કરી રહી હતી. હવે અમેરિકા દ્વારા લેવાયેલા આ પગલાં બાદ ભારત, કેનેડા અને અમેરિકા વચ્ચે ગુપ્તચર માહિતીનું આદાન-પ્રદાન વધુ ગાઢ બનશે. જોકે, તમામ આરોપીઓ હજુ સુધી દોષિત જાહેર થયા નથી અને આ માત્ર આરોપપત્ર છે, પરંતુ આ કાર્યવાહીથી ગેંગસ્ટરોમાં ચોક્કસપણે ફફડાટ ફેલાયો છે. એપ્રિલ 2025 પછી કેનેડા-ભારતના સુધરેલા સંબંધો અને હવે અમેરિકાની આ કાયદાકીય પહેલ, આંતરરાષ્ટ્રીય ગેંગસ્ટર નેટવર્ક માટે એક મોટો ફટકો સાબિત થશે.
આ પણ વાંચો:
