બજેટ સત્રના પાંચમા દિવસે અમેરિકામાંથી ભારતીયોને પરત મોકલવાના મુદ્દે સંસદમાં ભારે ઉહાપોહ થઈ ગયો છે. સંસદમાં કાર્યવાહીના પ્રારંભે જ વિપક્ષે અમેરિકાના નિર્ણયની ચર્ચા કરવા માગ કરી હતી. આ સાથે જ વિપક્ષના સાંસદોએ ‘સરકાર શરમ કરો’ના નારા લગાવ્યા હતા.
વિપક્ષ સાંસદોએ સંસદની બહાર હાથકડી પહેરીને પ્રદર્શન કર્યું હતું. કોંગ્રેસના નેતા કેસી વેણુગોપાલ હાથકડી પહેરેલા જોવા મળ્યા હતા. આ સિવાય રાહુલ ગાંધી, મલ્લિકાર્જુન ખડગે, શશિ થરૂર સહિત ઘણા સાંસદોએ વિરોધ પ્રદર્શન કર્યું.
જો કે ભારે હોબાળો થતાં લોકસભાની કાર્યવાહી બપોરે 2 વાગ્યા સુધી સ્થગિત કરવામાં આવી છે. વિપક્ષના સાંસદો બહાર આવ્યા અને સરકાર સામે વિરોધ પ્રદર્શન કર્યું. કેટલાક સાંસદોએ હાથમાં હાથકડી પહેરેલી જોવા મળી હતી. પોસ્ટરો પણ લહેરાવ્યા હતા જેના પર લખ્યું હતું- ભારત સાંકળોમાં બંધ, અમે આ અપમાન સહન નહીં કરીએ.
કોંગ્રેસના સાંસદ મણિકમ ટાગોરે કહ્યું કે અમેરિકામાંથી 100 થી વધુ ભારતીયોને હાંકી કાઢવાથી આખો દેશ આઘાતમાં છે. આ માનવ અધિકારોનું ઉલ્લંઘન છે. સરકાર આ અંગે ચૂપ કેમ છે? ભારતે આ અમાનવીય વર્તનની નિંદા કેમ ન કરી? વિદેશ મંત્રી એસ જયશંકર બપોરે 2 વાગ્યે રાજ્યસભામાં આ મુદ્દા પર જવાબ આપશે.
આ પણ લાઈવ જુઓ
