Bhavnagar Heavy Rain: ગુજરાતમાં હાલ વરસાદની મૌસમ જામી છે. ખાસ કરીને ભાવનગર જીલ્લો પાણી પાણી થયો છે. ભાવનગર જિલ્લામાં છેલ્લા બે દિવસથી અતિભારે વરસાદે જનજીવનને અસ્તવ્યસ્ત કરી દીધું છે. મેઘરાજાની ધડબડાટીથી નદીઓમાં નવા નીરની આવક થઈ છે, અને શહેરના મોટાભાગના વિસ્તારોમાં પાણી ભરાઈ ગયા છે. આ પરિસ્થિતિ અને હવામાન વિભાગના રેડ એલર્ટને ધ્યાનમાં લઈને ભાવનગરના જિલ્લા કલેક્ટર મનીષકુમાર બંસલે 18 જૂન 2025, બુધવારના રોજ જિલ્લાની તમામ શાળાઓ બંધ(Holiday)  રાખવા હુકમ કર્યો છે.

શાળા બંધનો નિર્ણય

જિલ્લા કલેક્ટર મનીષ બંસલે જણાવ્યું કે, અતિશય વરસાદના કારણે સાવચેતીના પગલારૂપે, 18 જૂન 2025ના રોજ પ્રી-પ્રાઈમરીથી ધોરણ 12 સુધીની તમામ શાળાઓમાં રજા જાહેર કરવામાં આવી છે. આ આદેશ સરકારી, ગ્રાન્ટેડ, અને ખાનગી શાળાઓ પર લાગુ પડશે. શિક્ષણ જગત સાથે સંકળાયેલા તમામને આ નિર્દેશનું પાલન કરવા અપીલ કરવામાં આવી છે.

ભાવનગર જિલ્લામાં અતિશય વરસાદના કારણે તારીખ 18/06/25ના રોજ સાવચેતીના પગલે તમામ શાળાઓ બંધ રહેશે : ડૉ. મનીષકુમાર બંસલ (જિલ્લા કલેક્ટરશ્રી, ભાવનગર)#GujaratRain #RainAlert #Monsoon2025 #WeatherUpdate #Bhavnagar pic.twitter.com/nHoQ2suhDL

— Gujarat Information (@InfoGujarat) June 17, 2025

હવામાન વિભાગની આગાહી

ભારતીય હવામાન વિભાગ (IMD) અનુસાર, ગુજરાતમાં 17 અને 18 જૂન 2025 દરમિયાન ભારેથી અતિભારે વરસાદની આગાહી કરવામાં આવી છે.

17 જૂન 2025 (મંગળવાર):

રેડ એલર્ટ: અમદાવાદ, આણંદ, ભરૂચ, સુરેન્દ્રનગર, બોટાદ, ભાવનગર, મોરબી, પોરબંદર, અને જૂનાગઢમાં અત્યંત ભારે વરસાદની આગાહી.

યેલો એલર્ટ: મહીસાગર, પંચમહાલ, દાહોદ, છોટા ઉદેપુર, નર્મદા, તાપી, અને ડાંગમાં ભારે વરસાદ.

રાજ્યના અન્ય જિલ્લાઓમાં ઓરેન્જ એલર્ટ સાથે અતિભારે વરસાદની શક્યતા.

18 જૂન 2025 (બુધવાર):

ઓરેન્જ એલર્ટ: સૌરાષ્ટ્ર, દક્ષિણ ગુજરાત, અને ઉત્તર ગુજરાતના 12 જિલ્લાઓમાં ભારે વરસાદની આગાહી. આમાં અરવલ્લી, મહીસાગર, દાહોદ, ડાંગ, નવસારી, વલસાડ, દાદરા અને નગર હવેલી, દમણ, પોરબંદર, જૂનાગઢ, ગીર સોમનાથ, દીવ, અમરેલી, અને ભાવનગરનો સમાવેશ થાય છે.

યેલો એલર્ટ: રાજકોટ, બોટાદ, સુરેન્દ્રનગર, અમદાવાદ, ગાંધીનગર, સાબરકાંઠા, ખેડા, પંચમહાલ, આણંદ, વડોદરા, છોટા ઉદેપુર, નર્મદા, ભરૂચ, સુરત, અને તાપીમાં ભારે વરસાદની શક્યતા.

પ્રભાવિત જનજીવન

ભાવનગરમાં સતત વરસાદને કારણે શહેરના નીચાણવાળા વિસ્તારોમાં પાણી ભરાઈ ગયા છે, અને જનજીવન પર ગંભીર અસર પડી છે. 16 જૂનના રોજ માત્ર 4 કલાકમાં 7 ઈંચ વરસાદ નોંધાયો હતો, જેના કારણે રસ્તાઓ, શાળાઓ, અને ઘરોમાં પાણી ભરાયા હતા. નદીઓમાં પાણીની આવક વધવાથી ગ્રામીણ વિસ્તારોમાં પણ સંકટની સ્થિતિ સર્જાઈ છે.

સરકારી પગલાં

જિલ્લા વહીવટીતંત્રે સ્થાનિક લોકોને સાવચેત રહેવા અને જરૂરી સાવચેતી રાખવા અપીલ કરી છે. શાળાઓ બંધ રાખવાનો નિર્ણય વિદ્યાર્થીઓ અને શિક્ષકોની સલામતીને ધ્યાનમાં રાખીને લેવાયો છે. વધુમાં, હવામાન વિભાગે નીચાણવાળા વિસ્તારોમાં પૂરની શક્યતા અને રસ્તાઓ બંધ થવાની ચેતવણી આપી છે, જેના કારણે સ્થાનિક તંત્ર દ્વારા બચાવ અને રાહત કામગીરીની તૈયારીઓ શરૂ કરવામાં આવી છે.