- ICC Ranking: શુભમન ગિલનો બેટિંગનો ચાલ્યો જાદુ, વિશ્વનો નંબર 1 બેટ્સમેન બન્યો
ટીમ ઈન્ડિયાના સ્ટાર ઓપનર શુભમન ગિલે પોતાના કરિયરમાં પહેલીવાર ODI રેન્કિંગમાં ટોચનું સ્થાન હાંસલ કર્યું છે. તે નવીનતમ ICC રેન્કિંગમાં નંબર 1 બની ગયો છે. તેણે પાકિસ્તાનના સ્ટાર બેટ્સમેન બાબર આઝમને હરાવ્યો છે. શુભમન ગિલ 796 રેટિંગ પોઈન્ટ સાથે નંબર 1 પર પહોંચ્યો, જ્યારે બાબર આઝમ 773 રેટિંગ સાથે બીજા સ્થાને સરકી ગયો. બાબર આઝમ ન્યુઝીલેન્ડ અને દક્ષિણ આફ્રિકા સામેની ત્રિકોણીય શ્રેણીમાં નિષ્ફળ ગયો હતો, જેના કારણે તેને હારનો સામનો કરવો પડ્યો હતો. બીજી તરફ શુભમન ગિલે ઇંગ્લેન્ડ સામેની ODI શ્રેણીમાં શાનદાર પ્રદર્શન કર્યું હતું, જેમાં તેણે 2 અડધી સદી અને એક સદી ફટકારી હતી.
શુભમન ગિલ નંબર 1 ને લાયક છે
શુભમન ગિલે વર્ષ 2019 માં પોતાનું ડેબ્યૂ કર્યું હતું અને આ ખેલાડીએ અત્યાર સુધીમાં ફક્ત 50 ODI મેચ રમી છે અને આટલી ઓછી મેચોમાં જ આ ખેલાડી નંબર 1 ના સ્થાન પર પહોંચી ગયો છે. ગિલનો રેકોર્ડ તેને ODI રેન્કિંગમાં ટોચ પર લઈ જાય છે. આ ખેલાડીએ 60 થી વધુની સરેરાશથી 2587 રન બનાવ્યા છે. જેમાં ગિલે 7 સદી અને 15 અડધી સદી ફટકારી છે. ગિલે વનડે ક્રિકેટમાં બેવડી સદી પણ ફટકારી છે. ગિલ વનડેમાં સૌથી ઝડપી 2500 રન બનાવનાર ખેલાડી પણ છે. આ જ કારણ છે કે ગિલ નંબર 1 ODI બેટ્સમેન બનશે તે નક્કી કરવામાં આવ્યું હતું.
બાબર-ગિલ ચેમ્પિયન્સ ટ્રોફીમાં પણ ભાગ લેશે
શુભમન ગિલ પણ 2023 ના નવેમ્બર મહિનામાં નંબર 1 ODI બેટ્સમેન બન્યો હતો પરંતુ બાબરે તેની પાસેથી તે સ્થાન છીનવી લીધું. હવે ફરી એકવાર આ ખેલાડી બાબરને હરાવવામાં સફળ રહ્યો છે. જોકે, આ રેન્કિંગ જાળવી રાખવા માટે શુભમન ગિલને ચેમ્પિયન્સ ટ્રોફીમાં સારું પ્રદર્શન કરવું પડશે. આ ગિલ હાલમાં અદ્ભુત ફોર્મમાં છે અને જો તે ચેમ્પિયન્સ ટ્રોફીમાં સારા એવા રન બનાવશે તો તે બાબરથી ઘણો આગળ નીકળી જશે.
નવીનતમ ODI રેન્કિંગ
શુભમન ગિલ પ્રથમ સ્થાને છે, બાબર આઝમ બીજા સ્થાને છે. રોહિત શર્મા ત્રીજા નંબર પર છે. હેનરિક ક્લાસેન એક સ્થાન ઉપર આવીને ચોથા સ્થાને પહોંચી ગયા છે. ન્યૂઝીલેન્ડનો ડેરિલ મિશેલ પાંચમા સ્થાને પહોંચી ગયો છે. વિરાટ કોહલી છઠ્ઠા નંબર પર છે. હેરી ટેક્ટર 7મા સ્થાને છે અને ચરિત અસલંકા 8મા સ્થાને છે. શ્રેયસ ઐય્યર 9મા ક્રમે પહોંચી ગયો છે. શે હોપ 10મા નંબરે છે.
આ પણ વાંચો-Rajkot: દારુનો મોટો જથ્થો પકડાયા પછી ભાયાવદરના PI સહિત 3 પોલીસ સસ્પેન્ડ
