kutch: ચુસ્ત પોલીસ બંદોબસ્ત અને હજારો લોકોની હાજરીમાં વકીલે મહંત પર કર્યો જીવલેણ હુમલો, જાણો કઈ વાતનો બદલો લીધો

kutch: રાજ્યમાં કાયદો અને વ્યવસ્થા કથળી રહી છે ખુલ્લેઆમ દાદાગીરી અને હુમલાની ઘટનાઓ સામે આવી રહી છે ત્યારે આવો વધુ એક કિસ્સો સામે આવ્યો છે. જેમાં કચ્છ જિલ્લાના નખત્રાણામાં હજારો લોકોની હાજરીમાં મહંત પર જીવલેણ હુમલો કરવામા આવ્યો છે. આ મામલે એક વકીલ સહિત સાત લોકો સામે ફરિયાદ નોંધવામાં આવી છે.

સમૂહલગ્નના સ્ટેજ પર મહંત પર જીવલેણ હુમલો

મળતી માહિતી મુજબ ગઈકાલે કચ્છ જિલ્લાના નખત્રાણા તાલુકાના નાગલપર ગામ નજીક ગુરુ ગરવા સમાજના 18મા સમૂહલગ્નમાં આમંત્રિત કુકમા આશ્રમના મહંત પર જાહેરમાં જીવલેણ હુમલો કરવામાં આવ્યો હતો. જેમાં મહંત રામગિરિ મહારાજને સ્ટેજ પર સન્માન સમયે માંડવીના વકીલ રમણિક ગરવાએ હજારો લોકોની હાજરીમાં મહંત પર હીચકારો હુમલો કર્યો હતો.

આરોપીઓએ અગાઉ આપી હતી ધમકી

આ મામલે જાણવા મળી રહ્યું છે કે, આ સમૂહલગ્નમાં વિઘ્ન ઊભું કરવા આરોપીઓએ અગાઉ વ્હોટસએપ ગ્રુપોમાં ભડકાઉ લખાણ લખીને સમૂહલગ્નમાં આવનારા મહેમાનોનું અપમાન અને ઝઘડો કરવાની ધમકીઓ આપી હતી આ મામલે સમાજના હોદ્દેદારોએ ચાર દિવસ અગાઉ જ પશ્ચિમ કચ્છ એસ.પી. તેમજ નખત્રાણના પોલીસ અધિકારીઓને રજૂઆત કરી હતી. જે બાદ પોલીસ-બંદોબસ્ત પણ ગોઠવાયો હતો છતાં પણ આરોપીએ સ્ટેજ પર આવીને મહંત પર હુમલો કર્યો હતો.

#Kutch: સમૂહલગ્નના સ્ટેજ પર આવી શખ્સે મહંતને ફડાકા ઝીંકી દીધા#Kutch #Nakhtarana #Nakhtarana #AttackOnMahatma #GuruGarvaSamaj #CrimeNews #viralvideo pic.twitter.com/79Fgua8jHn

— The Gujarat Report (@TGujarat_Report) May 13, 2025

હુમલા બાબતે નોંધાઈ ફરિયાદ

આ મામલે મહંતની હત્યાના પ્રયાસ બદલ માંડવીના વકીલ રમણિક ગરવા તથા તેના સાગરીત વિશાલ રવિલાલ ગરવા (રહે. મિરજાપર, ભુજ), દીપક તુલસી ગરવા (રહે. અંગિયા, નખત્રાણા), પ્રકાશ દેવજી ગરવા (રહે. મથલ, નખત્રાણા), ભદ્રેશ ભવાનભાઈ ગરવા (રહે. માધાપર, ભુજ), ધવલ હિરાભાઈ દવે (રહે. નખત્રાણા) અને ભરત પુંજાભાઈ ગરવા (રહે. નખત્રાણા) સામે નખત્રાણા પોલીસ મથકે ફરિયાદ દાખલ કરવામા આવી છે.

એક વર્ષ અગાઉ થઈ હતી માથાકુટ

એક વર્ષ અગાઉ પણ મહંતે આપી હતી ફરિયાદ આ ઘટના બાદ મહંતે ફરિયાદમાં જણાવ્યું હતુ કે, એકાદ વર્ષ અગાઉ રમણિકે તેમના આશ્રમ ખાતે આવીને માથાકૂટ કરી હતી આ મામલે તેની સામે પધ્ધર પોલીસ મથકે ફરિયાદ નોંધાવી હતી.