Mehsana Chandrakant Patel Viral Audio: સત્તાધારી ભારતીય જનતા પાર્ટીની અંદર ચાલતી જૂથબંધી અને આંતરિક ખેંચતાણ વધુ એક વખત જાહેરમાં આવી ગઈ છે. મહેસાણા જિલ્લા ભાજપ સંગઠનમાં છેલ્લા કેટલાક દિવસોથી ચાલી રહેલા એક વિવાદાસ્પદ ઓડિયો કાંડે પક્ષની શિસ્તના લીરેલીરા ઉડાડી દીધા છે. ગુજરાતના પૂર્વ નાયબ મુખ્યમંત્રી અને ભાજપના વરિષ્ઠ કદાવર નેતા નીતિન પટેલ વિરુદ્ધ અત્યંત ખરાબ અને અપમાનજનક ભાષાનો ઉપયોગ કરતો એક ઓડિયો સોશિયલ મીડિયા પર વાયરલ થતાં મહેસાણાના રાજકારણમાં મોટો ગરમાવો આવી ગયો છે. આ ઓડિયોમાં કોઈ સામાન્ય કાર્યકર નહીં પરંતુ ભાજપના જ વોર્ડ નંબર ૮ ના કોર્પોરેટર અને જિલ્લા ભાજપના મહામંત્રી ચંદ્રકાંત પટેલનો અવાજ હોવાનું સામે આવતા સંગઠનની આબરૂ ધૂળધાણી થઈ છે. આ મામલે પક્ષની અંદરનો અસંતોષ હવે સપાટી પર આવી ગયો છે.
નીતિન પટેલનો મીડિયા સમક્ષ મોટો બ્લાસ્ટ
લાંબા સમયની ચુપકીદી બાદ પૂર્વ નાયબ મુખ્યમંત્રી નીતિન પટેલે પોતે મીડિયા સમક્ષ આવીને પક્ષના જ પદાધિકારીઓ સામે મોરચો ખોલ્યો છે અને મોટો ઘટસ્ફોટ કર્યો છે. નીતિન પટેલે તીખા સૂરે જણાવ્યું કે, તેમના વિરુદ્ધ અત્યંત અભદ્ર ભાષા બોલનાર ચંદ્રકાંત પટેલને જ્યારે પક્ષે કોર્પોરેટરની ટિકિટ આપી અને તેઓ ચૂંટાઈ પણ આવ્યા, ત્યાં સુધી તેમને આ ઓડિયોના કરતુતોની કોઈ જ જાણ નહોતી. એટલું જ નહીં, નીતિન પટેલ જેવા વરિષ્ઠ નેતાને સંપૂર્ણપણે અંધારામાં રાખીને ચંદ્રકાંત પટેલને જિલ્લા ભાજપના મહામંત્રી જેવો મોટો હોદ્દો પણ આપી દેવામાં આવ્યો હતો. નીતિન પટેલના આ નિવેદનથી સ્પષ્ટ થાય છે કે મહેસાણા ભાજપમાં જૂના જોગીઓને હાંસિયામાં ધકેલીને સત્તાની નવી ગોઠવણો ચાલી રહી છે.
૫ વર્ષ જૂનો ઓડિયો બોમ્બ પણ ફૂટ્યો
વિવાદ અહીં જ નથી અટકતો, નીતિન પટેલે પક્ષના મોવડી મંડળ સામે વધુ એક નવો રાજકીય બોમ્બ ફોડતા જણાવ્યું કે, ગઈકાલે તેમને એક બીજો પાંચ વર્ષ જૂનો ઓડિયો પણ હાથ લાગ્યો છે. આ ચોંકાવનારા જૂના ઓડિયોમાં કોર્પોરેટર ચંદ્રકાંત પટેલ ભાજપના સત્તાવાર ઉમેદવારને જ ચૂંટણીમાં હરાવવા માટે અંદરખાને પદ્ધતિસરની ગોઠવણ અને વાતો કરી રહ્યા છે. નીતિન પટેલે આ બંને ઓડિયોના મજબૂત પુરાવા ભાજપના પ્રદેશ મહામંત્રી અને જિલ્લા પ્રભારી સહિત પક્ષના ઉચ્ચ મોવડી મંડળને સોંપી દીધા છે. તેમણે પક્ષના વરિષ્ઠ નેતાઓનું અપમાન કરનાર અને પક્ષ વિરોધી કામગીરી કરીને પીઠમાં છરો ભોંકનાર આવા તત્વો સામે તાત્કાલિક કડકમાં કડક શિસ્તભંગની કાર્યવાહી કરવાની માંગ કરી છે.
પક્ષની અંદર ચાલતા આ છૂપા રાજકીય યુદ્ધ પાછળ નીતિન પટેલે આશંકા વ્યક્ત કરી છે કે કોર્પોરેટર ચંદ્રકાંત પટેલ પોતાની વ્યક્તિગત હેસિયતથી નહીં, પરંતુ પક્ષમાં બેઠેલા કોઈ અન્ય મોટા માથા અથવા જૂથને રાજી કરવા માટે માત્ર એક મોહરું કે ‘હાથો’ બન્યા હોઈ શકે છે. આજના સમયમાં ટેકનોલોજી અને સોશિયલ મીડિયાનો દુરુપયોગ કરીને પ્રતિષ્ઠિત નેતાઓની રાજકીય કારકિર્દી ખતમ કરવાના આ આખા ષડયંત્રને તેમણે સખત શબ્દોમાં વખોડી કાઢ્યું હતું. નીતિન પટેલે ચંદ્રકાંત પટેલ સાથે કોઈ પણ વ્યક્તિગત અદાવત હોવાનો ઈન્કાર કરતા જણાવ્યું કે, “મારે તેમની સાથે કોઈ દુશ્મની નથી, ઉલટાનું તેમના વ્યવસાયને જમાવવામાં ભૂતકાળમાં મેં મારી સત્તા પર રહીને ખૂબ મોટી મદદ કરી હતી.”
આ આંતરિક જૂથબંધી અને ગાળાગાળીનો વિવાદ સરેઆમ ચોકે ચડતા જ મહેસાણા જિલ્લા ભાજપ પ્રમુખ ગીરીશ રાજગોરે ડેમેજ કંટ્રોલ કરવા માટે દોડધામ કરવી પડી છે. તેમણે સત્તાવાર નિવેદન આપતા સ્વીકાર્યું છે કે વાયરલ ઓડિયોમાં કોર્પોરેટર ચંદ્રકાંત પટેલનું નામ સ્પષ્ટપણે બહાર આવ્યું છે. પક્ષની આબરૂ બચાવવા તેમણે કહ્યું કે, “શિસ્તના નારા લગાવતી ભારતીય જનતા પાર્ટીમાં આવા વર્તનને સાંખી લેવાશે નહીં. ચંદ્રકાંત પટેલને હવે પક્ષ તરફથી ભવિષ્યમાં કોઈ પણ નવો હોદ્દો આપવામાં આવશે નહીં.” સંગઠન દ્વારા આ મામલે તપાસ કમિટી બેસાડીને કોર્પોરેટર પાસે લેખિત ખુલાસો મંગાશે અને હાઈકમાન્ડના માર્ગદર્શન મુજબ આગળની કાર્યવાહી કરાશે. જો કે, આ ઘટનાએ સાબિત કરી દીધું છે કે ભાજપમાં બધું સમુસૂતરું નથી અને સત્તાની લડાઈ ચરમસીમાએ છે.
આ પણ વાંચો:
