
PM Modi FICCI Speech: નવી દિલ્હીના ભારત મંડપમ ખાતે FICCIની વાર્ષિક સામાન્ય સભામાં વડાપ્રધાન નરેન્દ્ર મોદીએ ઉદ્યોગપતિઓને કર્મચારીઓના પગાર અને રોજગાર વધારવા અંગે સવાલ કર્યા બાદ રાજકીય વિવાદ શરૂ થયો છે. કોંગ્રેસે આ નિવેદનને સરકારની આર્થિક નીતિઓની નિષ્ફળતા છુપાવવાનો પ્રયાસ ગણાવ્યો છે. પાર્ટીનો આરોપ છે કે મોંઘવારી, બેરોજગારી અને ખાનગી રોકાણમાં ઘટાડા જેવા મુદ્દાઓ માટે જવાબદારી સ્વીકારવાને બદલે વડાપ્રધાન ઉદ્યોગજગતને સવાલ કરી રહ્યા છે
19 નવેમ્બરે FICCIના કાર્યક્રમમાં મોદીએ કહ્યું હતું કે સરકારે કોર્પોરેટ ટેક્સ ઘટાડ્યો અને વ્યવસાય માટે અનુકૂળ વાતાવરણ ઊભું કર્યું હોવા છતાં કંપનીઓએ કર્મચારીઓના પગાર તથા રોજગારની તકોમાં કેટલો વધારો કર્યો છે? આ નિવેદન બાદ કોંગ્રેસ અધ્યક્ષ મલ્લિકાર્જુન ખડગે, મહાસચિવ જ્યરામ રમેશ અને મહારાષ્ટ્ર કોંગ્રેસના નેતા વિજય વડેટ્ટવારે વડાપ્રધાન પર પ્રહાર કર્યા હતા.
ખડગેએ કહ્યું, 12 વર્ષ બાદ વડાપ્રધાન જાગ્યા
કોંગ્રેસ અધ્યક્ષ મલ્લિકાર્જુન ખડગેએ વડાપ્રધાનના નિવેદન પર પ્રતિક્રિયા આપતાં કહ્યું કે મોદી 12 વર્ષના શાસન બાદ હવે ઉદ્યોગપતિઓને રોજગાર અને પગાર અંગે સવાલ કરી રહ્યા છે. તેમણે આરોપ લગાવ્યો કે સરકાર પોતાની નિષ્ફળતાઓની જવાબદારી ઉદ્યોગજગત પર નાખી રહી છે.
ખડગેએ કહ્યું કે કોંગ્રેસે હંમેશાં સમાન તક ધરાવતા વ્યવસાયિક વાતાવરણની હિમાયત કરી છે. તેમના મતે, મોદી સરકારે કેટલાક પસંદગીના ઉદ્યોગપતિઓને ફાયદો પહોંચાડ્યો છે, જ્યારે MSMEs અને નાના વેપારીઓને મુશ્કેલીઓનો સામનો કરવો પડ્યો છે.
તેમણે દાવો કર્યો કે સ્વસ્થ સ્પર્ધાના અભાવે નવીનતા અને ઉત્પાદનની ગુણવત્તા પર અસર થઈ છે. ખડગેએ બેરોજગારી, મોંઘવારી અને બચતમાં ઘટાડા અંગે પણ સરકારને ઘેરી હતી. તેમણે ‘મેક ઇન ઇન્ડિયા’ અભિયાન પર સવાલ ઉઠાવીને કહ્યું કે ભારતની આયાત પરની નિર્ભરતા હજુ પણ ચિંતાનો વિષય છે.
FICCIમાં મોદીએ ઉદ્યોગપતિઓને શું કહ્યું હતું?
19 નવેમ્બરે FICCIની વાર્ષિક સામાન્ય સભાને સંબોધતાં વડાપ્રધાન મોદીએ જણાવ્યું હતું કે 2014માં કોર્પોરેટ ટેક્સનો મૂળ દર 30 ટકા હતો, જે સરકારે ઘટાડીને 22 ટકા કર્યો છે. આ ઉપરાંત વ્યક્તિગત આવકવેરામાં પણ રાહત આપવામાં આવી છે અને 12 લાખ રૂપિયા સુધીની આવકને કરમુક્ત કરવામાં આવી છે.
મોદીએ ઉદ્યોગપતિઓને સવાલ કર્યો હતો કે સરકાર તરફથી આટલી રાહતો મળ્યા બાદ કંપનીઓએ કર્મચારીઓના પગારમાં વધારો કર્યો છે કે નહીં અને નવી નોકરીઓ ઊભી કરી છે કે નહીં?
તેમણે ઉદ્યોગજગતને સંબોધતાં કહ્યું હતું કે, “મેં 12 લાખ રૂપિયા સુધીની આવકને કરમુક્ત કરી છે. પરંતુ શું તમે તમારા કર્મચારીઓના પગારમાં વધારો કર્યો છે? શું તમે કર્મચારીઓની સંખ્યામાં વધારો કર્યો છે? નહીં! તમારી ભૂખ એટલી વધારે છે કે તમારું પેટ જ ભરાતું નથી.”
વડાપ્રધાને GSTના દરમાં ઘટાડો, ટેક્સ રિટર્ન અને રિફંડની સરળ પ્રક્રિયા તથા વ્યવસાય કરવાની સરળતા માટે સરકારનાં પગલાંનો પણ ઉલ્લેખ કર્યો હતો. તેમણે ઉદ્યોગપતિઓને સ્થાનિક રોકાણ વધારવા, કૃષિ અને ફૂડ પ્રોસેસિંગ ક્ષેત્રમાં તકોનો લાભ લેવા તથા આયાત પરની નિર્ભરતા ઘટાડવાની અપીલ કરી હતી.
જ્યરામ રમેશે સરકારની આર્થિક નીતિઓ પર ઉઠાવ્યા સવાલ
કોંગ્રેસના મહાસચિવ અને સંચાર પ્રભારી જ્યરામ રમેશે 20 નવેમ્બરે પ્રેસ કોન્ફરન્સ કરીને કહ્યું કે વડાપ્રધાનનું FICCIમાં આપેલું ભાષણ તેમની બેચેની અને નિરાશા દર્શાવે છે. તેમણે મોંઘવારી, બેરોજગારી અને ખાનગી રોકાણની ધીમી ગતિને સરકારની નીતિઓ સાથે જોડ્યાં હતાં.
રમેશે કોંગ્રેસના 2024ના લોકસભા ચૂંટણી ઢંઢેરા ‘ન્યાય પત્ર’નો ઉલ્લેખ કરતાં કહ્યું કે પાર્ટીએ આવકમાં સ્થિરતા, રોજગારની અછત, ખાનગી રોકાણમાં ઘટાડો અને આર્થિક અસમાનતા જેવા મુદ્દા અગાઉથી ઉઠાવ્યા હતા. તેમના જણાવ્યા અનુસાર, ત્યારે મોદીએ કોંગ્રેસના ઢંઢેરાને ‘અર્બન નક્સલ’ વિચારધારા ધરાવતો ગણાવ્યો હતો, પરંતુ હવે તેઓ પોતે ઉદ્યોગપતિઓને પગાર અને રોજગાર વધારવા અંગે સવાલ કરી રહ્યા છે.
રમેશે એવો પણ કટાક્ષ કર્યો કે વડાપ્રધાન પોતાની સરકારની આર્થિક નિષ્ફળતાઓનો દોષ બીજાઓ પર નાખી રહ્યા છે.
બે કરોડ નોકરીઓનું વચન કોણે આપ્યું હતું?
મહારાષ્ટ્ર વિધાનસભામાં કોંગ્રેસ વિધાનમંડળ પક્ષના નેતા વિજય વડેટ્ટવારે પણ વડાપ્રધાનના નિવેદનની ટીકા કરી હતી. તેમણે સવાલ કર્યો કે દર વર્ષે બે કરોડ નોકરીઓ આપવાનું વચન ઉદ્યોગપતિઓએ નહીં, પરંતુ વડાપ્રધાને આપ્યું હતું.
વડેટ્ટવારે આશરે 16 લાખ કરોડ રૂપિયાની લોન માફીનો મુદ્દો ઉઠાવીને કહ્યું કે રોજગાર ઊભા કરવાની જવાબદારી સરકારની છે. તેમણે વડાપ્રધાનને અત્યાર સુધી રોજગાર વધારવા માટે લેવામાં આવેલા પગલાં અંગે જવાબ આપવા કહ્યું હતું.
તેમણે રાહુલ ગાંધીનો ઉલ્લેખ કરતાં કહ્યું કે રોજગારના મુદ્દે રાહુલ ગાંધી વિદેશમાં વાત કરે ત્યારે ભાજપ વિરોધ કરે છે, પરંતુ હવે વડાપ્રધાન પોતે ઉદ્યોગપતિઓને રોજગાર વધારવા અંગે સવાલ કરી રહ્યા છે.
નોટબંધી, GST અને ચીન સાથેની વેપાર ખાધનો મુદ્દો
જ્યરામ રમેશે નોટબંધી અને GSTની અમલવારીને પણ નાના ઉદ્યોગોની મુશ્કેલીઓ માટે જવાબદાર ગણાવી હતી. તેમણે દાવો કર્યો કે નોટબંધીથી MSME ક્ષેત્રને નુકસાન થયું છે. ગુજરાતના સ્ટેનલેસ સ્ટીલ ઉદ્યોગનું ઉદાહરણ આપતાં તેમણે કહ્યું કે ત્યાં લગભગ એક તૃતીયાંશ MSME એકમો બંધ પડ્યાં છે.
રમેશે ચીન સાથેની વેપાર ખાધ અંગે પણ ચિંતા વ્યક્ત કરી હતી. તેમના જણાવ્યા અનુસાર, નાણાકીય વર્ષ 2026-27માં આ ખાધ આશરે 150 અબજ ડૉલર સુધી પહોંચી શકે છે. તેમણે આરોપ લગાવ્યો કે વધતી આયાતથી નાના અને મધ્યમ ઉદ્યોગો પર દબાણ વધી રહ્યું છે.
કોંગ્રેસે ઉદ્યોગજગતમાં ભય અને દબાણનું વાતાવરણ હોવાનો પણ આરોપ લગાવ્યો હતો. તપાસ એજન્સીઓના કથિત ઉપયોગ અને પસંદગીના મોટા ઉદ્યોગપતિ જૂથોને મળતા ફાયદા અંગે રમેશે સવાલો ઉઠાવ્યા હતા. આ તમામ મુદ્દાઓ પર કોંગ્રેસે સરકારની નીતિઓની જવાબદારી નક્કી કરવાની માગ કરી છે.
આત્મનિર્ભરતા માટે ઉદ્યોગજગતને મોદીની અપીલ
FICCIના સંબોધનમાં મોદીએ દવાઓ, સ્ટીલ અને એલ્યુમિનિયમ જેવા ક્ષેત્રોમાં આયાત ઘટાડવા પર ભાર મૂક્યો હતો. તેમણે કહ્યું કે ભારત ફાર્મસી ક્ષેત્રે ઓળખ ધરાવે છે, છતાં API, બલ્ક ડ્રગ્સ અને દવાઓના મધ્યવર્તી ઉત્પાદનોની આયાત કરે છે. ભારતીય કંપનીઓએ આ વસ્તુઓનું સ્થાનિક ઉત્પાદન વધારવું જોઈએ.
વડાપ્રધાને વિશિષ્ટ સ્ટીલ અને એલ્યુમિનિયમ ઉત્પાદનોનું ઉત્પાદન વધારવા તથા કૃષિ અને ફૂડ પ્રોસેસિંગ ક્ષેત્રમાં રોકાણ કરવાની અપીલ પણ કરી હતી. તેમના જણાવ્યા અનુસાર, વૈશ્વિક કૃષિ નિકાસમાં ભારતનો હિસ્સો આશરે 2થી 2.5 ટકા છે. તેમણે ઉદ્યોગપતિઓને આગામી 20 વર્ષનાં રોકાણના નિર્ણયો લેતી વખતે ‘ઇન્ડિયા ફર્સ્ટ’ને પ્રાથમિકતા આપવા કહ્યું હતું.
આમ, FICCIમાં વડાપ્રધાનના નિવેદન બાદ રોજગાર, પગાર, ખાનગી રોકાણ, કરરાહત અને ઉદ્યોગજગતની જવાબદારી જેવા મુદ્દાઓ ફરી ચર્ચામાં આવ્યા છે. સરકાર અને ખાનગી ક્ષેત્ર રોજગાર સર્જનમાં કેટલી જવાબદારી નિભાવે છે તે મુદ્દે હવે રાજકીય ચર્ચા વધુ તેજ બની છે.







