Rameshwar Sharma: મધ્ય પ્રદેશના ભોપાલમાં જન્માષ્ટમીના કાર્યક્રમ દરમિયાન BJP ધારાસભ્ય રામેશ્વર શર્માના એક નિવેદનથી રાજકીય વિવાદ ઊભો થયો છે. રવિવાર, 6 સપ્ટેમ્બરે કરૌંદ વિસ્તારમાં યોજાયેલી મટકી ફોડ સ્પર્ધા દરમિયાન શર્માએ કહ્યું હતું કે, ‘કરૌંદ ચોકડીથી મિસાઇલ છોડો તો કાજી કેમ્પમાં જઈને પડે.’ ભોપાલનો કાજી કેમ્પ મુસ્લિમ બહુમતી ધરાવતો વિસ્તાર હોવાથી નિવેદન સામે રાજકીય અને સામાજિક સ્તરે સવાલો ઉઠ્યા છે.
ઇસ્લામાબાદના કાજી કેમ્પની સ્પષ્ટતા
વિવાદ વધ્યા બાદ હુઝૂર વિધાનસભાના ધારાસભ્ય રામેશ્વર શર્માએ સ્પષ્ટતા કરી કે તેમનો સંદર્ભ ભોપાલના કાજી કેમ્પનો નહોતો, પરંતુ ઇસ્લામાબાદના કાજી કેમ્પનો હતો. જોકે, તેમના વિરોધીઓએ દાવો કર્યો કે ઇસ્લામાબાદમાં ‘કાજી કેમ્પ’ નામનો કોઈ વિસ્તાર નથી. ઇન્ટરનેટ પર ઉપલબ્ધ માહિતીમાં પણ ઇસ્લામાબાદમાં આવા વિસ્તારનો ઉલ્લેખ મળતો નથી.
કાર્યક્રમમાં પાકિસ્તાન અને આતંકવાદનો ઉલ્લેખ
મટકી ફોડ કાર્યક્રમમાં શર્માએ હિન્દુ એકતા, રાષ્ટ્રવાદ, પાકિસ્તાન અને આતંકવાદ અંગે અનેક ટિપ્પણીઓ કરી હતી. તેમણે કહ્યું કે જે લોકો ભારતની ધરતીનું અનાજ અને પાણી વાપરે છે, તેમણે દેશ પ્રત્યે વફાદારી દર્શાવવી જોઈએ. તેમણે અશફાક ઉલ્લા ખાન અને એપીજે અબ્દુલ કલામ જેવા વ્યક્તિઓનો ઉલ્લેખ કરતાં કહ્યું કે દેશ માટે કામ કરનારાઓને સન્માન મળશે, જ્યારે આતંકવાદી બનનારાઓ સામે કડક કાર્યવાહી કરવાની વાત કરી.
एक तरफ संघ के सरसंघचालक मोहन भागवत जी कहते हैं “मुसलमानों से नफरत करने वाला हिंदू हो ही नहीं सकता”, दूसरी तरफ भाजपा विधायक भोपाल के काजी कैंप पर मिसाइल दागने की बात करते हैं।
यही है भाजपा और संघ का असली दोहरा चरित्र।
रामेश्वर शर्मा जी जैसे व्हाट्सऐप यूनिवर्सिटी से इतिहास-भूगोल… pic.twitter.com/ieCrAH74Ri
— Rahul Raj | राहुल राज (@rahulraj_kisaan) September 6, 2026
સર્જિકલ સ્ટ્રાઇક અને મિસાઇલનો ઉલ્લેખ
શર્માએ વડાપ્રધાન નરેન્દ્ર મોદી અને સર્જિકલ સ્ટ્રાઇકનો પણ ઉલ્લેખ કર્યો. તેમણે કહ્યું કે એક સમય એવો હતો જ્યારે ભારત મિસાઇલ બનાવી શકતું નથી તેવી વાતો થતી હતી, પરંતુ હવે ભારત મિસાઇલ બનાવે છે. આ સંદર્ભમાં તેમણે ફરી કરૌંદ ચોકડીથી મિસાઇલ છોડીને કાજી કેમ્પ સુધી પહોંચાડવાની વાત કરી હતી. ત્યારબાદ તરત જ તેમણે સ્પષ્ટતા કરી કે તેઓ ભોપાલના કાજી કેમ્પની નહીં, પરંતુ ઇસ્લામાબાદના કાજી કેમ્પની વાત કરી રહ્યા હતા.
‘ઇસ્લામાબાદમાં મટકી ફોડ થશે’
શર્માએ હિન્દુ સમાજને વધુ સંગઠિત થવાની અપીલ કરતાં કહ્યું કે મટકી ફોડ જેવી પ્રવૃત્તિઓને આગળ લઈ જવી જોઈએ. પાકિસ્તાનનો ઉલ્લેખ કરતાં તેમણે કહ્યું કે એક દિવસ લાહોર, ઢાકા અને ઇસ્લામાબાદમાં પણ મટકી ફોડ કાર્યક્રમો યોજાશે. તેમના કહેવા પ્રમાણે, ઇસ્લામાબાદમાં મટકી ફોડવા માટે પહેલાં ત્યાંની ‘મટકી’ ફોડવી પડશે. તેમણે આતંકવાદીઓ અંગે આક્રમક ભાષાનો ઉપયોગ કરતાં કહ્યું કે આતંકવાદ સામે ભારત કડક જવાબ આપશે.
કોંગ્રેસે મુખ્યમંત્રી પાસે કાર્યવાહીની માંગ કરી
નિવેદન સામે કોંગ્રેસે મધ્ય પ્રદેશના મુખ્યમંત્રી ડૉ. મોહન યાદવ પાસે કાર્યવાહી કરવાની માંગ કરી છે. કોંગ્રેસના મીડિયા કો-ઓર્ડિનેટર અબ્બાસ હાફિઝે કહ્યું કે સત્તાધારી પક્ષના ધારાસભ્ય દ્વારા જાહેર કાર્યક્રમમાં પોતાના શહેરના એક વિસ્તારનું નામ લઈને મિસાઇલની વાત કરવી ગંભીર બાબત છે. તેમણે સવાલ કર્યો કે જો શર્માનો ઉલ્લેખ ખરેખર ઇસ્લામાબાદ માટે હતો તો ત્યાં ‘કાજી કેમ્પ’ ક્યાં આવેલું છે.
કોંગ્રેસે મુખ્યમંત્રીને સ્પષ્ટતા કરવાની માંગ કરી છે કે શું સરકાર આવા નિવેદનને સ્વીકારશે અને શું ધારાસભ્ય સામે કોઈ કાર્યવાહી કરવામાં આવશે.
રોકાણકારોને આમંત્રણ વચ્ચે નિવેદનથી વિવાદ
આ વિવાદ એવા સમયે થયો છે જ્યારે મુખ્યમંત્રી મોહન યાદવ UAEના પ્રવાસે છે. સોમવારે દુબઈ વર્લ્ડ ટ્રેડ સેન્ટરમાં યોજાયેલી AIM કોંગ્રેસ-2026માં તેમણે વૈશ્વિક રોકાણકારોને મધ્ય પ્રદેશમાં રોકાણ કરવા આમંત્રણ આપ્યું. તેમણે રાજ્યની કનેક્ટિવિટી, ઔદ્યોગિક આધાર અને રોકાણલક્ષી નીતિઓનો ઉલ્લેખ કરીને સરકાર તરફથી સંપૂર્ણ સહયોગની ખાતરી આપી.
કોંગ્રેસે સવાલ કર્યો છે કે એક તરફ સરકાર વિદેશી રોકાણકારોને રાજ્યમાં રોકાણ માટે આમંત્રિત કરી રહી છે અને બીજી તરફ સત્તાધારી પક્ષના ધારાસભ્યના આવા નિવેદનો રાજ્યની છબી અને સામાજિક વાતાવરણ પર કેવી અસર કરશે.
શર્માના અગાઉના નિવેદનો પણ વિવાદમાં રહ્યા છે
રામેશ્વર શર્મા અગાઉ પણ વિવાદિત નિવેદનોને કારણે ચર્ચામાં રહ્યા છે. 2024ની લોકસભા ચૂંટણી દરમિયાન તેમણે નરેન્દ્ર મોદી ત્રીજી વખત વડાપ્રધાન બન્યા બાદ લાહોરમાં બેઠેલા મુલ્લા-મૌલવીઓ પણ ‘વંદે માતરમ’ બોલશે તેવી ટિપ્પણી કરી હતી. રાજગઢની એક ચૂંટણી સભામાં તેમણે કોંગ્રેસ નેતા દિગ્વિજય સિંહને હરાવીને ‘સીમા પાર ઇસ્લામાબાદ મોકલવા’ની વાત પણ કરી હતી.
જૂન 2026માં UCC અંગેની ચર્ચા દરમિયાન મુસ્લિમ પરિવારો અને બાળકોની સંખ્યા અંગેની તેમની ટિપ્પણી પણ વિવાદમાં આવી હતી.\
