- ગયા વર્ષે દેશના આ રાજ્યમાં સૌથી વધુ લોકોને ફટકારાઇ મૃત્યુદંડની સજા; 564 કેદીઓ ફાંસીની રાહે
દેશમાં ફક્ત જઘન્ય ગુનાઓના કેસમાં જ ગુનેગારને મૃત્યુદંડની સજા આપવામાં આવે છે. નેશનલ લો યુનિવર્સિટીના તાજેતરના અહેવાલમાં એ પણ ખુલાસો થયો છે કે 2024 માં સતત બીજા વર્ષે સુપ્રીમ કોર્ટે મૃત્યુદંડના કોઈ પણ કેસની પુષ્ટિ કરી નથી. ગયા વર્ષે સુપ્રીમ કોર્ટમાં આવા 6 કેસ આવ્યા હતા, જેમાંથી કોર્ટે 5 કેસને આજીવન કેદમાં ફેરવી દીધા હતા, જ્યારે એક કેસમાં ગુનેગારને નિર્દોષ જાહેર કરવામાં આવ્યો હતો. જ્યારે વર્ષ 2024માં નીચલી અદાલતોએ અલગ-અલગ કેસોમાં 139 લોકોને મૃત્યુદંડની સજા ફટકારી છે.
500થી વધુ કેદીઓ મૃત્યુદંડની સજાની રાહ જોઈ રહ્યા છે
રિપોર્ટમાં કહેવામાં આવ્યું છે કે નીચલી અદાલતો દ્વારા આપવામાં આવેલી મૃત્યુદંડની સજામાં 87 હત્યાના કેસ અને 35 જાતીય ગુનાઓ સંબંધિત કેસોનો સમાવેશ થાય છે. વર્ષ 2023માં નીચલી અદાલતો દ્વારા 122 મૃત્યુદંડની સજા સંભળાવવામાં આવી હતી, જેમાં જાતીય ગુનાઓ સંબંધિત 58 કેસ અને હત્યા સંબંધિત 40 કેસનો સમાવેશ થાય છે. હાલમાં દેશની વિવિધ જેલોમાં 564 કેદીઓ છે જેમને મૃત્યુદંડની સજા ફટકારવામાં આવી છે, આ આંકડો છેલ્લા બે દાયકામાં સૌથી વધુ છે.
રિપોર્ટ અનુસાર, વર્ષ 2019થી દેશની જેલોમાં મૃત્યુદંડની સજા મેળવનારા કેદીઓની સંખ્યામાં વધારો થયો છે. આ સંદર્ભમાં 2019 માં આવા કેદીઓની સંખ્યા 378 હતી, જ્યારે 2020માં આ આંકડો વધીને 404, 2021 માં 490, 2022 માં 539, 2023 માં 554 અને 2024 માં 564 થયો. વર્ષ 2024માં યુપીમાં સૌથી વધુ 34 લોકોને મૃત્યુદંડની સજા ફટકારવામાં આવી હતી. આ પછી કેરળ (20) અને પશ્ચિમ બંગાળ (18) આવે છે. ગયા વર્ષે દિલ્હી, જમ્મુ અને કાશ્મીર, ત્રિપુરા અને આસામમાં કોઈને પણ મૃત્યુદંડની સજા ફટકારવામાં આવી ન હતી.
2022માં 4 લોકોને આપવામાં આવી હતી ફાંસી
DWમાં પ્રકાશિત થયેલા અહેવાલમાં જણાવાયું છે કે વૈશ્વિક સ્તરે 115 થી વધુ દેશોએ મૃત્યુદંડને સંપૂર્ણપણે નાબૂદ કરી દીધો છે. આ ઉપરાંત, 9 દેશો એવા છે જ્યાં યુદ્ધ અપરાધો સિવાય કોઈપણ કેસમાં મૃત્યુદંડ આપવામાં આવતો નથી. જોકે, 55 દેશોમાં હજુ પણ મૃત્યુદંડની જોગવાઈ છે અને ભારત આ યાદીમાં સામેલ છે. દેશમાં છેલ્લી વખત વર્ષ 2020માં નિર્ભયા કેસના ચાર દોષિતોને ફાંસી આપીને મૃત્યુદંડની સજા આપવામાં આવી હતી.
દેશની હાઈકોર્ટની વાત કરીએ તો હરિયાણા, પંજાબ, ઝારખંડ અને તેલંગાણાએ ગયા વર્ષે 9 લોકોની મૃત્યુદંડની સજાની પુષ્ટિ કરી છે. રિપોર્ટમાં મૃત્યુદંડની સજા પામેલા કેદીઓની સંખ્યામાં વધારો થવાનું કારણ નીચલી અદાલતોમાં મૃત્યુદંડની સજા પામેલા કેદીઓની સંખ્યા વધુ હોવાનું અને હાઈકોર્ટમાં તેમની સામેની અપીલોનો ધીમો નિકાલ હોવાનું જણાવાયું છે.
ચીન-અમેરિકામાં આ રીતે આપવામાં આવે છે સજા
ભારતનો પડોશી દેશ ચીન મૃત્યુદંડના આંકડા છુપાવવા માટે જાણીતો છે. અંદાજ મુજબ વર્ષ 2022માં અહીં એક હજારથી વધુ લોકોને મૃત્યુદંડની સજા ફટકારવામાં આવી છે. ચીનમાં મૃત્યુદંડની સજા પામેલા વ્યક્તિને ગોળી મારી દેવામાં આવે છે અથવા ઘણા કિસ્સાઓમાં ઘાતક ઇન્જેક્શન આપીને મારી નાખવામાં આવે છે. તેવી જ રીતે સાઉદી અરેબિયા વિશ્વનો એકમાત્ર એવો દેશ છે જ્યાં માથું કાપીને મૃત્યુદંડની સજા આપવામાં આવે છે. 12 માર્ચ, 2022ના રોજ અહીં એક સાથે 81 લોકોને મૃત્યુદંડની સજા આપવામાં આવી હતી, જે દેશના ઇતિહાસમાં સૌથી વધુ છે.
ઉત્તર કોરિયા મૃત્યુદંડ આપવા માટે કુખ્યાત છે. તે વિશ્વના ચાર દેશોમાંનો એક છે જ્યાં મૃત્યુદંડ જાહેરમાં આપવામાં આવે છે. જાસૂસીથી લઈને હત્યા, બળાત્કાર અને રાજકીય વિરોધ સુધી અહીં દરેકને મારી નાખવામાં આવે છે. એટલું જ નહીં મૃત્યુદંડની સજા પામેલા લોકોના મૃતદેહ તેમના પરિવારોને પણ સોંપવામાં આવતા નથી. તેવી જ રીતે અમેરિકામાં 27 રાજ્યો એવા છે જ્યાં મૃત્યુદંડની જોગવાઈ છે. 2022 સુધીમાં લગભગ 250 આવા કેદીઓ મૃત્યુદંડની રાહ જોઈ રહ્યા છે. અમેરિકામાં ફાંસી ઉપરાંત, વીજળીના આંચકા, ગોળીબાર, ઝેરી ગેસ અને ઝેરના ઇન્જેક્શન દ્વારા પણ મૃત્યુદંડની સજા આપવામાં આવે છે.
