અજબ ગજબ : વરસાદ પડે ત્યારે પોશ વિસ્તારો પણ પાણીમાં ગરક થઈ જાય છે. લોકોની કાર તરવા લાગે છે, ઘરમાં પાણી ઘૂસી જાય છે. ચોમાસામાં ધોધમાર, મૂશળધાર, અનરાધાર વરસાદ પડે ત્યારે ઝુંપડપટ્ટીઓ અને ચાલીઓમાં પાણી ફરી વળતાં હોય છે. કારણ કે ત્યાં સુવિધા નથી હોતી. ત્યાં સગવડ નથી હોતી. પણ હવે ખાલી આવી જગ્યાઓ જ વરસાદમાં તારાજ નથી થતી. કરોડો રૂપિયાના ફ્લેટ વેચાતા હોય એવા વિસ્તારોમાં પણ રસ્તા પાણીમાં ડૂબી જાય છે. ઘરમાં પાણી ઘૂસી જાય છે. ગુરુગ્રામની સ્થિતિ અત્યારે એવી જ છે. અહીંયા 1-1 કરોડ રૂપિયાના ફ્લેટ વેચાય છે પણ સમસ્યા ઝુંપડપટ્ટીના રહીશોને હોય એવી જ. વરસાદ પડે ત્યારે ચાલીઓમાં રહેતા લોકોને જેવી મુશ્કેલી પડે, એવી જ મુશ્કેલી કરોડો રૂપિયાના ફ્લેટધારકોને પડે છે.
ગુરુગ્રામમાં બુધવારે રાત્રે ધોધમાર વરસાદ પડ્યો હતો. એમાં આખું શહેર થંભી ગયું હતું. મુખ્ય મુખ્ય માર્ગો તો પાણીમાં ડૂબી જ ગયા હતા પણ એક મહિલા ઑફિસેથી ઘરે આવી ત્યારે એની કાર અડધી પાણીમાં ડૂબી ગઈ હતી. ઘરમાં ગઈ તો ફર્નિચર તરતું હતું. આખા ઘરમાં કાદવકીચડ થઈ ગયો હતો. એ મહિલાનું ઘર ગુરુગ્રામના સૌથી મોંઘા ગોલ્ફ કોર્સ રોડ વિસ્તારમાં છે. મહિલાએ સોશિયલ મીડિયા પર વીડિયો મૂકીને સ્થિતિ બતાવી. ઘરમાં ઘુંટણસમાં પાણી ભરાયેલાં હતાં. અહીંયા 100 કરોડ સુધીમાં ફ્લેટ વેચાય છે. શહેરમાં સામાન્ય ફ્લેટની કિંમત પણ 1-1 કરોડ રૂપિયા છે, ત્યાં આ હાલત છે.
ગુરુગ્રામમાં સતત 4 કલાક ધોધમાર વરસાદ પડ્યો એમાં શહેર ડૂબી ગયું હતું. મહિલાએ કહ્યું કે હું ઑફિસથી પાછી આવી ત્યારે કાર પાણીમાં તરતી હતી. ઘરની સ્થિતિ જોઈને હું ભાંગી પડી. વીડિયોમાં એ મહિલા કહે છે કે આ પાણી નથી, ઇમોશનલ ડેમેજ છે. મારી પાસે આ માટે કોઈ શબ્દો નથી માત્ર પીડા છે. હવે બોલો, કરોડો રૂપિયામાં ફ્લેટ વેચાતા હોય ત્યાં જ આવી હાલત હોય તો ચાલીઓ ને ઝુંપડપટ્ટીમાં આવું હોય તો એમાં શી નવાઈ! સોશિયલ મીડિયામાં એ મહિલાનો વિડીયો જોઈને ઘણા લોકોએ આ જ બળાપો ઠાલવ્યો.
ગુરુગ્રામના ટૅક્ પ્રોફેશનલ અરુણ માથુરિયાએ પણ X પર આવો જ બળાપો કાઢ્યો હતો. અરુણે પોતાની તરતી કારનો વીડિયો મૂકીને સવાલ કર્યો કે ગુરુગ્રામમાં પાયાની સુવિધા છે કે નહીં, એ જોયા-જાણ્યા વિના જ લોકો કઈ રીતે 10 કરોડ રૂપિયાનો ફ્લેટ લઈ લેતા હશે? માત્ર અડધી કલાક વરસાદ પડ્યો અને રસ્તા પાણીમાં ડૂબી ગયા. ગુરુગ્રામ જાણે પરપોટો હોય એમ રોકાણકારો અને એનઆરઆઇ લોકોએ એમાં રોકાણ કરીને હવા ભરી હોય એવું લાગે છે. ગુરુગ્રામ પાસેનાં ઘરોનાં ભાડા અંગે બળાપો કાઢતાં અરુણ કહે છે કે જો તમે ગુરુગ્રામ નજીકની સોસાયટીમાં ભાડે રહેવા ઇચ્છો તો મકાનમાલિક 60થી 80 હજાર રૂપિયા ભાડું માગે છે. આટલાંબધાં ભાડાં ભર્યા પછી ને 8થી 10 કરોડ રૂપિયાનો ફ્લેટ ખરીદ્યા પછી પણ જો આવી જ સ્થિતિ હોય તો અહીંયા કોણ રહેવા આવે! ગુરુગ્રામમાં જમીન અને મકાનના ભાવ અતિશય રીતે વધી ગયા છે. રોજેરોજ ટ્રાફિક જામ થાય છે એમાં હવાની ગુણવત્તા વિશે તો વાત કરવા જેવું જ નથી.
એક યુઝરે કહ્યું કે ગુરુગ્રામમાં મકાનોના ભાવ દુબઈ જેવા છે પણ ચોમાસામાં ગુરુગ્રામ પૂરગ્રસ્ત ગામડાં જેવું થઈ જાય છે. ચોમાસામાં ગુરુગ્રામમાં લોકોને ઘૂંટણસમાં પાણીમાં કારને ધક્કા મારવા પડતા હોય છે. દર વર્ષે ચોમાસામાં વરસાદ પડે ને દર વર્ષે સ્થાનિકોએ વેઠવું પડતી હોય છે. આટઆટલી સમસ્યાઓ છતાં શહેર શીખતું નથી.
