• સુરત: આડાસંબંધની શંકામાં 14 વર્ષના બાળકની કરપીણ હત્યા

સુરતના સાયણમાં વિચિત્ર કહી શકાય તેવો હત્યાનો બનાવ બન્યો છે. આડા સંબંધના વહેમમાં 14 વર્ષના બાળકની તેના પાડોશી દ્વારા નિર્મમ હત્યા કરવામાં આવી છે. આરોપી વિજય વસાવાએ પોતાની પત્ની સાથે મૃતક કિશોરના આડા સંબંધનો વહેમ રાખીને આ કૃત્ય આચર્યું હોવાનું કહેવામાં આવી રહ્યું છે.

મળી રહેલી માહિતી અનુસાર, બાળકની સવારના સમયે હત્યા કરી દેવામાં આવી હતી. જ્યારે મૃતક કિશોર આરોપી વિજય વસાવાના ઘરે ગયો હતો. તે સમયે કિશોર આરોપીની પત્ની સાથે ઊભો હતો. આ દરમિયાન ઘરે આવેલા વિજય વસાવાએ બંનેને સાથે જોતાં ગુસ્સામાં આવી ગયો અને એકાએક ચપ્પુ લઈને બાળક ઉપર હિચકારો હુમલો કરી દીધો હતો. આરોપીએ બાળક પર ઉપરાછાપરી ઘા ઝીંક્યા અને તેને મોતને ઘાટ ઉતારી ફરાર થઈ ગયો.

બાળકની હત્યાના સમાચાર મળતા જ ઓલપાડ પોલીસ ઘટનાસ્થળે પહોંચી ગઈ હતી. પોલીસે આરોપી વિજય વસાવા વિરુદ્ધ હત્યાનો ગુનો નોંધી તેને પકડવા માટે અલગ-અલગ ટીમો બનાવી છે. આ ઘટનાથી સમગ્ર સાયણ પંથકમાં ભારે ચકચાર મચી ગઈ છે અને મૃતક કિશોરનો પરિવાર શોકમાં ડૂબી ગયો છે. પોલીસે આરોપીની ધરપકડ માટે વ્યાપક તપાસ શરૂ કરી છે.