સુરત શહેર, જે ટેક્સટાઇલ અને ડાયમંડ હબ તરીકે વિશ્વભરમાં જાણીતું છે, તે હવે એક અનોખી ઘટનાને લઈને ચર્ચામાં છે. શહેરની BRTS (બસ રેપિડ ટ્રાન્ઝિટ સિસ્ટમ) બસ, જે સામાન્ય રીતે મુસાફરોની ભીડ અને ધક્કામુક્કી માટે જાણીતી છે. 9 ઓગસ્ટે પાર્ટીનો એક અદ્ભુત ડીજે પાર્ટીનું કેન્દ્ર બની. જેનો એક વીડિયો ખૂબ વાયરલ થઈ રહ્યો છે. મુંબઈની પ્રખ્યાત મહિલા ડીજે કીબોના સંગીતના તાલે યુવક-યુવતીઓએ 18 કિલોમીટરના રૂટ પર ડાન્સનો જલસો માણ્યો. પરંતુ આ રોમાંચક નજારો હવે વિવાદનું કારણ બન્યો છે, કારણ કે આ આયોજન માટે યોગ્ય પરવાનગી લેવામાં આવી ન હતી.
સુરતઃ શહેરમાં એક વીડિયો વાઈરલ થતાં વિવાદ સર્જાયો..
BRTS બસની અંદર ડીજે સાથે ડાન્સનો વીડિયો વાયરલ…..
કિડ લોકલ સંસ્થાએ પરવાનગી વિના બસમાં કરી પાર્ટી..
રીલ્સ અપલોડ થતાં મનપા દ્વારા તાત્કાલિક પગલાં લેવાની ફરજ પડી..#SuratNews #BRTSBusParty #ViralVideo #SuratUpdate #viralvideoシ pic.twitter.com/ytqE41IiNH— B India (@buletin_india) August 23, 2025
જો તમે આ દિવસે BRTS બસમાં ચડ્યા હોત, તો તમને લાગ્યું હોત કે તમે કોઈ વિદેશી શહેરની પાર્ટી બસમાં છો. લાલ કલરના બોયકટ વાળ, ટ્રેન્ડી એસેસરીઝ, વેસ્ટર્ન આઉટફિટ્સ અને ગળામાં હેડફોન સાથે ડીજે કીબો બસમાં ડીચક…ડીચક…ના બીટ્સ પર માહોલ જમાવી રહી હતી. યુવકો હાથમાં ડ્રિંક્સ લઈને ડાન્સના તાલે ઝૂમી રહ્યા હતા, જ્યારે કાળા ગોગલ્સ અને પાર્ટી વેરમાં સજ્જ યુવતીઓ ઇમ્પ્રેસિવ ડાન્સ મૂવ્સ કરી રહી હતી. બસની બહાર વાહનોનો ઘોંઘાટ હતો, પરંતુ અંદર ગોવાની બીચ પાર્ટીની ફીલ ઊભી થઈ હતી. આ નજારો એટલો આકર્ષક હતો કે રસ્તા પરથી પસાર થતા વાહનચાલકો પણ આશ્ચર્યથી આ તમાશો જોતા રહી ગયા.
SMCએ શું કહ્યું?
આ ડીજે પાર્ટીનો વીડિયો જ્યારે સોશિયલ મીડિયા પર ‘કિડ લોકલ’ નામની સંસ્થા દ્વારા રીલ્સના રૂપમાં પોસ્ટ કરવામાં આવ્યો, ત્યારે તે ઝડપથી વાયરલ થયો. લોકો આ અનોખા જલસાની ચર્ચા કરવા લાગ્યા, પરંતુ આ સાથે જ એક વિવાદ પણ ઊભો થયો. સુરત મહાનગરપાલિકા (SMC) અને સિટીલિંકના અધિકારીઓનો દાવો છે કે આવી પ્રવૃત્તિ માટે કોઈ પરવાનગી આપવામાં આવી ન હતી. પરિવહન ચેરમેન સોમનાથ મરાઠેએ જણાવ્યું કે આ બાબતે તેમને અધિકારીઓ દ્વારા કોઈ જાણકારી આપવામાં આવી ન હતી, જે ગંભીર બેદરકારી દર્શાવે છે.
‘કિડ લોકલ’એ સંસ્થાએ શું કહ્યું?
‘કિડ લોકલ’ સંસ્થાના ગગન ઢીંગરાએ દાવો કર્યો કે તેમણે SMC અને સિટીલિંક પાસેથી તમામ જરૂરી પરવાનગીઓ લીધી હતી. તેમનું કહેવું છે કે આ આયોજન યુવાનોમાં BRTS બસને પ્રમોટ કરવાનો એક પ્રયાસ હતો, નહીં કે કોઈ ડીજે પાર્ટી. તેમણે એમ પણ જણાવ્યું કે મુસાફરો 25 રૂપિયાની ટિકિટ લઈને બસમાં ચડ્યા હતા અને આ ઇવેન્ટ સવારે 10થી બપોરે 1 વાગ્યા સુધી યોજાઈ હતી, જેમાં કોઈને હેરાન કરવાનો ઈરાદો ન હતો. જોકે, મનપા અધિકારીઓએ આ દાવાને નકારી કાઢ્યો અને જણાવ્યું કે આવી કોઈ શરતો આધીન પરવાનગી આપવામાં આવી ન હતી.
કાર્યવાહી
BRTS બસ જેવી જાહેર વાહન વ્યવસ્થામાં આવી પ્રવૃત્તિઓ માટે સ્પષ્ટ નિયમો અને પરવાનગીની જરૂર હોય છે. આ કિસ્સામાં, પરવાનગીના અભાવે આ આયોજન ગેરકાયદેસર ગણાયું છે. સિટીલિંકના જનરલ મેનેજર પ્રવીણ પ્રસાદે જણાવ્યું કે ‘કિડ લોકલ’ સંસ્થા છેલ્લા ચાર-પાંચ મહિનાથી તેમનો સંપર્ક કરી રહી હતી અને તેમનો હેતુ યુવાનોને BRTS તરફ આકર્ષવાનો હતો. જોકે, તેમણે સ્વીકાર્યું કે આ આયોજન નિયમોનું ઉલ્લંઘન કરે છે, અને તેમણે આયોજકોને વીડિયો અપલોડ ન કરવા જણાવ્યું હતું, જેનું પાલન થયું ન હતું.
ટ્રાન્સપોર્ટ કમિટીના ચેરમેન સોમનાથ મરાઠેએ આ ઘટનાને ગંભીર ગણાવી અને આસિસ્ટન્ટ મેનેજર (ઓપરેશન્સ) ચૈતલ પ્રજાપતિને કોન્ટ્રાક્ટમાંથી છૂટા કરવા તેમજ જનરલ મેનેજર પ્રવીણ પ્રસાદ પાસે ખુલાસો માગવાની ભલામણ કરી છે. ઉપરાંત, ‘કિડ લોકલ’ સંસ્થા સામે કાયદેસર કાર્યવાહી શરૂ કરવામાં આવી છે, અને પોલીસ કમિશનરને ફરિયાદ કરવામાં આવી છે. મરાઠેએ એમ પણ જણાવ્યું કે BRTS બસો સરકારી કાર્યક્રમો સિવાય ખાનગી આયોજનો માટે ફાળવવાનો કોઈ ઠરાવ નથી, અને આવી બેદરકારી માટે જવાબદાર અધિકારીઓને સસ્પેન્ડ કરવા જોઈએ.
લોકોની પ્રતિક્રિયાઓ
આ ઘટનાનો વીડિયો સોશિયલ મીડિયા પર વાયરલ થતાં લોકોમાં મિશ્ર પ્રતિક્રિયાઓ જોવા મળી. કેટલાકે આને યુવાનોની ક્રિએટિવિટી અને નવીનતાનું ઉદાહરણ ગણાવ્યું, જ્યારે અન્ય લોકોએ જાહેર વાહનોમાં આવી પ્રવૃત્તિઓને નિયમોનું ઉલ્લંઘન ગણાવી ટીકા કરી. વીડિયોમાં દેખાતા નોર્મલ મુસાફરો પણ આ ઇવેન્ટનો આનંદ માણતા જોવા મળ્યા, જે ‘કિડ લોકલ’ના દાવાને ટેકો આપે છે કે તેમનો ઈરાદો મુસાફરોને હેરાન કરવાનો ન હતો.
‘કિડ લોકલ’ એક એવી સંસ્થા છે જે લોકલ વસ્તુઓ અને સેવાઓને પ્રમોટ કરવા માટે કામ કરે છે. ગગન ઢીંગરા નામના યુવકના નેતૃત્વમાં આ સંસ્થા સોશિયલ મીડિયા પર બે લાખથી વધુ ફોલોઅર્સ ધરાવે છે. આ પહેલાં પણ તેમણે ‘લોચા રેવ’ નામે ડીજે પાર્ટી યોજીને સુરતી લોચાને પ્રમોટ કર્યો હતો. આ વખતે તેમનો હેતુ BRTS બસને યુવાનોમાં લોકપ્રિય બનાવવાનો હતો, પરંતુ પરવાનગીના અભાવે આ પ્રયાસ વિવાદમાં ફસાયો.
આ પણ વાંચો:
Ahmedabad: BRTS કોરિડોરમાં કાર, ટુ વ્હીલર વચ્ચે ભયંકર અકસ્માત, બે લોકોના દર્દનાક મોત
Trump Tariff: મોદી મિત્ર ટ્રમ્પનો ભારત પર 50 ટકા ટેરિફ લાગુ, ભારતની કેટલી તૈયારઓ?
Gujarat: AAP નેતા ગોપાલ ઇટાલિયા BJP નેતાના પગે કેમ પડી ગયા?, જુઓ
Jamnagar: અંબાણી ક્યાંથી પ્રાણીઓ પકડી લાવે છે?, અનંત અંબાણીનું વનતારા શંકાના ઘેરામાં કેમ આવ્યું?
Ahmedabad: મોદીના બંદોબસ્ત માટે આવેલા બે મહિલા કર્મચારીઓના મોત કેવી રીતે થયા?
Lover Death: પ્રેમિકા સાથે સંબંધ બનાવતી વખતે પરણિત પુરુષનું મોત, કોર્ટે પ્રેમિકાને કેમ દંડ ફટકાર્યો?
