અમદાવાદમાંથી એકવાર ચોંકાવનારો તોડકાંડ સામે આવતા ખળભળાટ મચી ગયો છે. આ તોડ એક સસ્પેન્ડેડ કોન્સ્ટેબલે કરતાં પોલીસ વિભાગની બદનામી થઈ રહી છે. પોલીસ વિભાગના કર્મચારીઓની જ વર્તમાન સમયમાં કટકી-લાંચ-હપ્તાખોરી સહિતના અનેક ગુનાઓમાં સંડોવણી સામે આવી રહી છે. હવે એક વખત ફરીથી સસ્પેન્ડેડ કોન્સ્ટેબલ લેવલના પોલીસ કર્મચારીએ એક વેપારી પાસેથી 50 લાખ રૂપિયા પડાવી લીધા છે.
સસ્પેન્ડેડ પોલીસ કોન્સ્ટેબલ આકાશ પટેલે ક્રાઈમ બ્રાન્ચના નામે રૂપિયા 50 લાખનો તોડ કર્યો છે. જે અંગે મિહીર પરીખ નામના વ્યકિતએ ફરિયાદ નોંધાવી છે. આરોપીઓએ ફરિયાદી વેપારીને સામે ક્રાઇમ બ્રાન્ચમાં ફોરેન કરન્સીનો કેસ થયો છે તેવું જણાવી તેને ધમકાવ્યો હતો, અને તે કેસના સમાધાનના નામે ડરાવીને તેની પાસેથી 50 લાખ રૂપિયા પડાવ્યા હતા.
મળતી માહતી અનુસાર, આરોપી આકાશ પટેલે પોલીસ તરીકેની ઓળખ આપીને વેપારી મિહીર પરિખ સામે ક્રાઇમ બ્રાન્ચમાં કેસ થયો છે. આ કેસમાં 10 થી 15 વર્ષ જેલમાં રહેવું પડશે તેવું કહીને ત્રણ શખ્સોએ કેસના પતાવટની વાત કરી હતી. જેમાં આરોપીઓએ પહેલા તો 5 કરોડ રૂપિયાની માંગ કરી હતી, પરંતુ બાદમાં 50 લાખ રૂપિયામાં પતાવટ કરી હતી. જે મામલે વેપારીએ આકાશ પટેલ સહિત ત્રણ લોકો સામે ફરિયાદ નોંધાવી છે.
ઉલ્લેખનીય છે કે, આકાશ પટેલ પહેલા પાલડી પોલીસ સ્ટેશનમાં કોન્સ્ટેબલ તરિકે ફરજ બજાવતો હતો. આ દરમિયાન તે લોકો પાસે તોડ કરતો હતો અને સતત વિવાદમાં રહેતો હતો, જેથી તેને બદલી પાલડીથી અન્ય પોલીસ સ્ટેશનમાં કરવામાં આવી હતી. પરંતુ આકાશે ત્યાં પણ પોતાનું પોત પ્રકાશ્યું હતું અને પોતાનો ગોરખધંધો ચાલુ રાખ્યો હતો. બાદમાં અમદાવાદમાં થયેલા કાર કૌભાંડમાં તેનું નામ બહાર આવતા તેને સસ્પેન્ડ કરવામાં આવ્યો હતો. તેમ છતાં તે પોતે પોલીસ હોવાનો રોફ જમાવી લોકો પાસે તોડપાણી કરી રહ્યો છે.
