Sweden School Firing: સ્વીડનના ઓરેબ્રો શહેરની એક શાળામાં અંધાધૂંધ ગોળીબારની ઘટના ઘટી હતી. જેમાં લગભગ 10 લોકો માર્યા ગયા અને ઘણા ઈજાગ્રસ્ત થયા છે. પોલીસ ઘટનાસ્થળે પહોંચી ગઈ હતી. આ વિસ્તારને કોર્ડન કરી દેવામાં આવ્યો હતો.
આ ઘટના મંગળવારે બપોરે લગભગ 1 વાગ્યાની આસપાસ બની હતી. આ ગોળીબારમાં 10 લોકો ઘાયલ થયા છે. જોકે, હાલમાં તેમની સ્થિતિ વિશે કોઈ માહિતી જાહેર કરવામાં આવી નથી. પોલીસે સ્થાનિક લોકોને શાળાની નજીક ન જવાની અપીલ કરી છે, જેથી તપાસ અને સુરક્ષા કાર્યમાં કોઈ અવરોધ ન આવે. ઓરેબ્રો શહેર સામાન્ય રીતે શાંત અને સલામત સ્થળ માનવામાં આવે છે, પરંતુ આ ઘટનાથી વિસ્તારમાં ભયનું વાતાવરણ સર્જાયું છે.
ઘણું નુકસાન થયું: સ્વીડન પોલીસ
ઓરેબ્રોના સ્થાનિક પોલીસ વડા રોબર્ટો ફોરેસ્ટે કહ્યું કે નુકસાન ખૂબ વધારે હોવાથી અમે હાલમાં વધુ માહિતી આપી શકતા નથી. મૃતકની ઓળખ મેળવવાની કામગીરી ચાલી રહી છે. અત્યાર સુધીની તપાસમાં જાણવા મળ્યું છે કે આ એક આતંકવાદી હુમલો છે. પોલીસનું માનવું છે કે એક જ હુમલાખોરે આ ઘટનાને અંજામ આપ્યો છે. પોલીસને હજુ સુધી શંકાસ્પદ હુમલાખોર વિશે કોઈ માહિતી મળી નથી. હજુ સુધી કોઈ સંગઠન સાથે હુમલાખોરોનો સંબંધ જાહેર થયો નથી.
હુમલા પાછળનું કારણ અકબંધ
ઓરેબ્રો શહેર સ્વીડનની રાજધાની સ્ટોકહોમથી લગભગ 200 કિલોમીટર દૂર છે. એવું કહેવામાં આવી રહ્યું છે કે આ ઘટના ત્યારે બની જ્યારે મોટાભાગના વિદ્યાર્થીઓ શાળામાં હતા. હાલમાં એ સ્પષ્ટ નથી કે આ હુમલામાં વિદ્યાર્થીઓ ઘાયલ થયા છે કે નહીં અને એ પણ ખબર નથી કે હુમલા પાછળનું કારણ શું છે? હાલમાં પોલીસ સમગ્ર ઘટનાની તપાસ કરી રહી છે.
