UP News: ઉત્તર પ્રદેશના નોઈડાના સેક્ટર-126 પોલીસ સ્ટેશન વિસ્તારમાં સોમવારે રાત્રે પાર્કિંગને લઈને થયેલી બબાલે ઉગ્ર સ્વરુપ ધારણ કરી લીધું હતુ. જેમાં એક યુવાનને કારથી કચડી નાખ્યો. આ ઘટનામાં બલવિંદર સિંહ નામના યુવાનને ગંભીર ઈજા થઈ હતી, તેના બંને પગ તૂટી ગયા. આ સમગ્ર ઘટનાનો વીડિયો સામે આવ્યો છે. નોઈડા પોલીસે તાત્કાલિક કાર્યવાહી કરી અને ઘટનાના 12 કલાકની અંદર બે આરોપીઓ – વિપિન ભાટી ઉર્ફે અંશુ અને મોનુ ભાટીની ધરપકડ કરી.

વિવાદનું કારણ શું?

આ ઘટના સેક્ટર-126 પોલીસ સ્ટેશન વિસ્તારમાં સુપરનોવા નજીક બની હતી. પોલીસના જણાવ્યા અનુસાર, પાર્કિંગને લઈને થયેલા વિવાદમાં વિપિન ભાટી અને મોનુ ભાટીએ ઇરાદાપૂર્વક તેમની ગ્લેન્ઝા કાર (HR 51 CL 4800)થી બલવિંદર સિંહને ટક્કર મારી હતી. ટક્કર એટલી ગંભીર હતી કે બલવિંદર સિંહ રસ્તા પર પડી ગયો અને ગંભીર રીતે ઘાયલ થયો. આરોપીઓએ ઘાયલોને જાનથી મારી નાખવાની ધમકી પણ આપી અને ઘટનાસ્થળેથી ભાગી ગયા. આ સમગ્ર ઘટનાનો વીડિયો સોશિયલ મીડિયા પર વાયરલ થયો હતો.

ગ્લેન્ઝા કાર સાથે આરોપીઓની ધરપકડ

માહિતી મળતાં જ પોલીસે તાત્કાલિક કાર્યવાહી શરૂ કરી દીધી હતી. મંગળવારે જ, વિપિન ભાટી (23 વર્ષ) અને મોનુ ભાટીને પુષ્તા રોડ સેક્ટર-94 નોઈડાથી તેમની ગ્લેન્ઝા કાર સાથે ધરપકડ કરવામાં આવી હતી. પોલીસ પૂછપરછ દરમિયાન, એવું બહાર આવ્યું છે કે વિપિન ભાટી બુલંદશહેર અને ફરીદાબાદનો રહેવાસી છે, જ્યારે મોનુ ભાટી ગૌતમ બુદ્ધ નગર અને નવી દિલ્હીનો રહેવાસી છે.