ગુજરાતમાં વારંવાર દુષ્કર્મની ઘટનાઓ પ્રકાશમાં આવતી હોય છે. હવસખોરો નાની બાળકીઓ સાથે દુષ્કર્મ કરતાં જરાય ખચકતાં નથી. ત્યારે વડોદરા જીલ્લામાં કોર્ટે એક મહત્વનો ચૂકાદો આપ્યો છે.
વડોદરા જિલ્લાના સાવલી પોલીસ સ્ટેશન હદમાં વર્ષ 2020માં બાળકી પર દુષ્કર્મ ગુજારનાર આરોપીને સાવલીની પોક્સો કોર્ટે દોષી ઠેરવીને 20 વર્ષની સખત કેદની સજા અને રૂપિયા 50 હજારનો દંડ ફટકાર્યો છે. આરોપી દંડ ન ભરે તો વધુ 6 માસની સજાનો હુકમ કર્યો છે. કોર્ટે ગઈકાલે વર્ષના અંતિમ દિવસે ચૂકાદો આપ્યો હતો.
મામાના ઘરે રહેતી બાળકી પર પાડોશીનું દુષ્કર્મ
સાવલી પોલીસ મથકે વર્ષ 2020માં પોતાના મામાના ઘરે રહેતી 17 વર્ષીય સગીરાને તેની પાડોશમાં રહેતો કરણ છગનભાઈ નાયકે સગીરાની મરજી વિરુદ્ધ પટાવી ફોસલાવી પ્રેમજાળમાં ફસાવીને અપહરણ કરીને વિવિધ જગ્યાએ લઈ જઈ દુષ્કર્મ ગુજાર્યું હતુ. આ બનાવની સાવલી પોલીસ મથકે ફરિયાદ નોંધાવતાં પોલીસેઆરોપીને ઝડપીને જેલ ભેગો કર્યો હતો.
20 વર્ષની સખત કેદ
જે કેસ સાવલીની અધિક પોક્સો કોર્ટના જજ જે.એ. ઠક્કરની કોર્ટર્માં ચાલી જતા આરોપીને દોષી ઠેરવીને 20 વર્ષની સખત કેદની સજા અને રૂપિયા 50,000નો દંડ ફટકાર્યો હતો. જ્યારે અપહરણ સહિતની અન્ય કલમોમાં 8 વર્ષની સજા અને રૂપિયા 8000નો દંડ ફટકાર્યો હતો. સાથે જ રૂપિયા 4 લાખનું વળતર પીડિતાના પરિવારને ચૂકવી આપવા જિલ્લા લીગલ ઓથોરિટીને ભલામણ કરી છે. તેમજ આરોપી જો દંડ ભરે તે રકમ પણ પીડિતાને ચૂકવી દેવા પણ આદેશ કરાયો છે.
