પૂર્વ વડાપ્રધાન ડો.મનમોહન સિંહના અંતિમ સંસ્કાર માટે સ્થળની પસંદગી અને તેમના નામે સ્મારકને લઈને રાજકીય ઘમાસાણ ચાલી રહ્યું છે. કોંગ્રેસ સાંસદ રાહુલ ગાંધીએ કેન્દ્ર સરકાર પર પૂર્વ વડાપ્રધાનની યાદનું ‘અપમાન’ કરવાનો આરોપ લગાવ્યો છે. બીજેપી અધ્યક્ષ જેપી નડ્ડાએ વળતો પ્રહાર કરતા કહ્યું કે રાહુલ ગાંધી અને કોંગ્રેસ અધ્યક્ષ મલ્લિકાર્જુન ખડગે પૂર્વ વડાપ્રધાનના દુઃખદ અવસાન પછી પણ રાજનીતિ કરવાનું છોડી રહ્યા નથી.
2004 થી 2014 સુધી ભારતના વડાપ્રધાન રહેલા ડૉ.મનમોહન સિંહનું 26 ડિસેમ્બરે 92 વર્ષની વયે અવસાન થયું હતું. તેમણે ગુરુવારે દિલ્હીની એઈમ્સમાં અંતિમ શ્વાસ લીધા હતા. તેમના અંતિમ સંસ્કાર શનિવારે નિગમબોધ ઘાટ ખાતે સન્માન સાથે કરવામાં આવ્યા હતા. લોકસભામાં વિપક્ષના નેતા રાહુલ ગાંધીએ સ્મશાન સ્થળની પસંદગીને ડૉ.સિંહનું અપમાન ગણાવ્યું હતું.
રાહુલના આરોપ પર નડ્ડાએ આપ્યો જવાબ
ભાજપના રાષ્ટ્રીય અધ્યક્ષ જેપી નડ્ડાએ ખુદ રાહુલ ગાંધીના આરોપોનો જવાબ આપ્યો છે. કોંગ્રેસના આરોપ પર આકરી પ્રતિક્રિયા આપતા તેમણે કહ્યું કે, ‘આ ખૂબ જ દુર્ભાગ્યપૂર્ણ છે કે રાહુલ ગાંધી અને વર્તમાન અધ્યક્ષ મલ્લિકાર્જુન ખડગેએ પૂર્વ વડાપ્રધાનના દુઃખદ અવસાન પછી પણ રાજકારણ કરવાનું છોડી રહ્યાં નથી.’
નડ્ડાએ કહ્યું કે કેન્દ્ર સરકારે પૂર્વ વડાપ્રધાન મનમોહન સિંહના સ્મારક માટે જગ્યા ફાળવી હતી અને તેમના પરિવારને પણ તેની જાણ કરી હતી. તેમણે કહ્યું કે, ‘કોંગ્રેસની આવી ક્ષુદ્ર વિચારસરણી માટે નિંદા કરવા માટે પૂરતી નથી. મનમોહન સિંહ જીવતા હતા ત્યારે તેમને ક્યારેય સાચુ સન્માન ન આપનાર કોંગ્રેસ હવે તેમના સન્માનના નામે રાજનીતિ કરી રહી છે.
જેપી નડ્ડાએ વધુમાં કહ્યું કે વડાપ્રધાન નરેન્દ્ર મોદીની આગેવાની હેઠળની કેન્દ્ર સરકારે મનમોહનના સ્મારક માટે જગ્યા ફાળવી હતી અને તેમના પરિવારને પણ તેની જાણ કરી હતી. તેમણે આરોપ લગાવ્યો કે, ‘આ હોવા છતાં કોંગ્રેસ જૂઠાણું ફેલાવી રહી છે.’ નડ્ડાએ કહ્યું, ‘રાહુલ ગાંધી, મલ્લિકાર્જુન ખડગે અને અન્ય કોંગ્રેસના નેતાઓએ આવી સસ્તી રાજનીતિ કરવાથી બચવું જોઈએ.’
રાહુલે શું આરોપ લગાવ્યા?
અગાઉ, કોંગ્રેસે કેન્દ્ર સરકાર પર દેશના પ્રથમ શીખ વડાપ્રધાન મનમોહન સિંહના અંતિમ સંસ્કાર માટે યોગ્ય સ્થાન ન આપવાનો આરોપ લગાવ્યો હતો. લોકસભામાં વિપક્ષના નેતા રાહુલ ગાંધીએ કહ્યું કે ભાજપની આગેવાની હેઠળની કેન્દ્ર સરકારે નિગમબોધ ઘાટ પર મનમોહન સિંહના અંતિમ સંસ્કાર કરાવીને ‘ભારત માતાના મહાન પુત્ર અને શીખ સમુદાયના પ્રથમ વડાપ્રધાન’નું અપમાન કર્યું છે.
તેમણે લખ્યું, ‘તેઓ એક દાયકા સુધી ભારતના વડાપ્રધાન હતા, તેમના સમય દરમિયાન દેશ આર્થિક મહાસત્તા બન્યો અને તેમની નીતિઓ આજે પણ દેશના ગરીબ અને પછાત વર્ગને સમર્થન આપી રહી છે. અત્યાર સુધી, તમામ પૂર્વવડા પ્રધાનોની ગરિમાને માન આપીને, તેમના અંતિમ સંસ્કાર અધિકૃત સમાધિઓમાં કરવામાં આવ્યા હતા. જેથી દરેક વ્યક્તિ કોઈપણ અસુવિધા વિના શ્રદ્ધાંજલિ આપી શકે. ડૉ. મનમોહનસિંહ આપણા સર્વોચ્ચ સન્માન અને સમાધિના હકદાર છે. દેશના આ મહાન સપૂત અને તેના ગૌરવશાળી સમુદાય પ્રત્યે સરકારે આદર દાખવવો જોઈતો હતો.
