ટ્રમ્પનું સતત ભારત વિરોધી વલણ: હવે Tesla ભારતમાં કાર નહીં બનાવે, કહ્યું રસ નથી

દિલીપ પટેલ

અજબોપતિ એલન મસ્કની કંપની ટેસ્લા(Tesla) ભારતમાં કાર નહીં બનાવે. જો કે માત્ર શોરુમ ખોલશે. કેન્દ્રીય ઉદ્યોગ મંત્રી એચડી કુમારસ્વામી કહે છે કે એલોન મસ્કની માલિકીની ટેસ્લા ભારતમાં કારનું ઉત્પાદન કરવામાં રસ ધરાવતી નથી.

ટ્રમ્પનું નકારાત્મક વલણ

અગાઉ યુએસ પ્રમુખ ડોનાલ્ડ ટ્રમ્પે કહ્યું હતુ કે જો ટેસ્લા ભારતીય ટેરિફથી બચવા માટે ત્યાં ફેક્ટરી સ્થાપે તો તે અમેરિકા માટે ‘અન્યાયી’ હશે.

એચડી કુમારસ્વામીનું આ નિવેદન એવા સમયે આવ્યું છે જ્યારે સરકાર ઇલેક્ટ્રિક વાહનો (EV) પર ખાસ ધ્યાન કેન્દ્રિત કરીને પેસેન્જર કારના સ્થાનિક ઉત્પાદનને પ્રોત્સાહન આપવા પર ભાર મૂકાઈ હ્યો છે.

કેન્દ્રીય મંત્રીએ કહ્યું, “ટેસ્લા… તેઓ ફક્ત શોરૂમ શરૂ કરવા જઈ રહ્યા છે. તેમને ભારતમાં કારનું ઉત્પાદન કરવામાં રસ નથી.”

ઉત્પાદન નહીં કરે માત્ર ટેસ્લા શોરુમ ખોલશે

થોડા દિવસો પહેલા સમાચાર આવ્યા હતા કે ટેસ્લાએ મુંબઈના બાંદ્રા કુર્લા કોમ્પ્લેક્સ (BKC) માં પોતાનો પહેલો શોરૂમ ખોલવા માટે એક સોદો અંતિમ સ્વરૂપ આપ્યું છે. આ અંતર્ગત, કંપનીએ BKC માં એક કોમર્શિયલ ટાવરના ગ્રાઉન્ડ ફ્લોર પર 4,000 ચોરસ ફૂટ જગ્યા ભાડે લીધી છે. એવું કહેવામાં આવી રહ્યું છે કે તેનું માસિક ભાડું પ્રતિ ચોરસ ફૂટ 900 રૂપિયા છે. જે દર મહિને લગભગ 35 લાખ રૂપિયા હશે.

ગુજરાતમાં ટેસ્લાની કાર બનાવવની યોજના નિષ્ફળ

અગાઉ 2023ના અંતમાં અને 2024ની શરૂઆતમાં એવા અહેવાલો હતા કે ટેસ્લા ગુજરાતમાં, ખાસ કરીને સાણંદ નજીક, ઈલેક્ટ્રિક કાર મેન્યુફેક્ચરિંગ પ્લાન્ટ સ્થાપવાની યોજના બનાવી રહી હતી. આ યોજનામાં ગુજરાતમાં કરોડો રુપિયાનું રોકાણ અને ગાંધીનગરમાં ટેસ્લાનું ભારતનું મુખ્ય મથક સ્થાપવાની વાતો પણ સામે આવી હતી. ગુજરાત સરકારે ટેસ્લાને આકર્ષવા માટે જમીન અને અન્ય સુવિધાઓ ઓફર કરી હોવાનું પણ જણાવાયું હતું, કારણ કે ગુજરાત ઓટોમોબાઈલ ઉદ્યોગ માટે જાણીતું હબ છે, જેમાં ટાટા, ફોર્ડ અને એમજી જેવી કંપનીઓ પહેલેથી હાજર છે.

જોકે, તાજેતરના અપડેટ્સ (2025 સુધી) મુજબ, કેન્દ્રીય મંત્રી એચ.ડી. કુમારસ્વામીએ જણાવ્યું છે કે ટેસ્લા હાલમાં ભારતમાં ઉત્પાદનમાં રસ ધરાવતી નથી અને માત્ર બે શોરૂમ ખોલવાની યોજના ધરાવે છે. આનાથી ગુજરાતમાં પ્લાન્ટની યોજના હાલ પૂરતી રદ થઈ હોવાનું સ્પષ્ટ થાય છે.