નવા વર્ષની ઉજવણી સાથે જ અમેરિકા અને યુરોપિયન દેશ મોન્ટેનેગ્રોના સેટિનજેમાં મસમોટા હુમલા થયા છે. આ હુમલાઓમાં મોટી સંખ્યામાં લોકોના મોત થયા છે.
યુરોપિયન દેશ મોન્ટેનેગ્રોના સેટિનજેમાં બુધવારે (પહેલી જાન્યુઆરી) ગોળીબારની ઘટનામાં બે બાળકો સહિત 10 લોકોના મૃત્યુ થયા છે. આ હુમલામાં અન્ય ચાર લોકો ગંભીર રીતે ઈજાગ્રસ્ત થયા હોવાના સમાચાર સામે આવી રહ્યાં છે. પોલીસે ફાયરિંગ કરનાર આરોપીની ઓળખ 45 વર્ષીય એકો માર્ટિનોવિચ તરીકે કરી છે, હાલમાં આરોપી ફરાર છે.
આરોપીને પકડવા પોલીસ એક્શન મોડમાં
પોલીસના જણાવ્યાનુસાર, એકો માર્ટિનોવિકે સેટિનજેમાં ગોળીબાર કર્યો હતો. જેમાં બાર માલિક, તેના બાળકો અને આરોપીના કેટલાક સંબંધીઓ માર્યા ગયા હતા. ગોળીબાર પછી આરોપી ઘટનાસ્થળેથી ભાગી ગયો હતો. પોલીસે આરોપીને પકડવા માટે સ્પેશિયલ ફોર્સ તૈયાર કરી છે.
મોન્ટેનેગ્રિનના પ્રધાનમંત્રી મિલોજકો સ્પાજિકે ઈજાગ્રસ્તની સ્થિતિ જાણવા હોસ્પિટલની મુલાકાત લીધી હતી. આ દુ:ખદ ઘટનાને ધ્યાનમાં રાખીને ત્રણ દિવસના શોકની જાહેરાત કરવામાં આવી હતી. તેમણે ‘X’ પર પોસ્ટ કરીને લખ્યું હતું કે, ‘ઘટનાએ સમગ્ર દેશને આંચકો આપ્યો છે.’ આ ઉપરાંત મોન્ટેનેગ્રિનના પ્રમુખ જેકોવ મિલાટોવિચે પણ આ ઘટના પર દુઃખ વ્યક્ત કર્યું છે. ઉલ્લેખનીય છે કે, આરોપી હજુ સુધી પોલીસના હાથે ઝડપાયો નથી. ફાયરિંગની ઘટના બાદ તે સ્થળ પરથી ફરાર થઈ ગયો હતો.
