Ajab Gjab:અનિલ કપૂર, શ્રીદેવી અને ઉર્મિલા માતોંડકરની ફિલ્મ જુદાઈ યાદ છે! તો એમાં પરેશ રાવલનું પાત્ર પણ યાદ જ હશે. એ બોલવાને બદલે પ્રશ્નો જ કર્યા કરે છે. આખી ફિલ્મમાં જે મળે એને પ્રશ્નો કરીકરીને ત્રસ્ત કરી મૂકે છે. એ તો ફિલ્મનું પાત્ર છે પણ અમેરિકામાં સાચ્ચે જ એવો એક માણસ છે જે પ્રશ્નો નથી પૂછતો પણ લોકો સામે કેસ ઠોકી દે છે. જોનાથન લી નામના આ માણસે 4000 લોકો સામે કેસ કર્યા છે અને વળતર પેટે લાખો ડૉલર મેળવે છે. આ માણસે કેસ કરવામાં પોતાની માતા અને પત્નીને પણ બાકાત નથી રાખી. અરે, ગિનીસ વર્લ્ડ રેકોર્ડ બુક સામે પણ દાવો ઠોક્યો છે અને પોતાની વિરુદ્ધ ચુકાદો આપનારા જજ સામે પણ કેસ કર્યો છે.
48 વર્ષના જોનાથનને સૌથી વિવાદાસ્પદ માણસ તરીકે ઓળખાવાય છે. લોકો સામે કેસ કરવા અને વળતરમાં કરોડો કમાવાનો એનો વ્યવસાય થઈ ગયો છે. જોનાથન લીએ એક વાર પોતાની માતા પર જ કેસ કર્યો હતો. જોનાથને કોર્ટમાં કહ્યું કે માતાએ તેનું યોગ્ય રીતે પાલન કર્યું નથી. અદાલતે પણ દલીલો સાંભળીને જોનાથનના પક્ષમાં ચુકાદો આપ્યો અને તેની માતાને 20 હજાર ડૉલરનું વળતર ચૂકવવું પડ્યું હતું. ચિત્રવિચિત્ર કારણોસર જોનાથન લીએ પત્ની, સગાંસંબંધીઓ, પડોશીઓ, પોલીસ અને મિત્રો સામે કેસ કર્યા છે. મોટી મોટી કંપનીઓ સામે પણ કેસ કરીને જંગી વળતર વસૂલ્યું છે. આ બધા જ કેસ સાંભળી આશ્ચર્ય થાય પણ એનાથી ય વધુ અચરજ થાય એવી વાત એ છે કે જોનાથને કેટલાક ન્યાયાધીશો સામે પણ કેસ કર્યા છે. જે જજ તેની વિરુદ્ધ કેસ કરે એની સામે જોનાથન કેસ કરતો હતો અને વળતરમાં લાખો ડૉલર મેળવ્યા છે.
આ માણસે એટલાબધા અંદાજે ચારેક હજાર જેટલા લોકો સામે કેસ કર્યા છે. અને એટલે વિશ્વમાં સૌથી વધુ કેસ કરનારો માણસ બની ગયો છે. નોખા પ્રકારના આ વિક્રમની નોંધ ગિનીસ બુક ઓફ વર્લ્ડ રેકોર્ડે લીધી તો જોનાથનથી એ પણ સહન ન થયું અને ગિનીસ બુક ઓફ વર્લ્ડમાં પોતાનું નામ આવ્યું છે એવી વાત મળતાં જ પૂછ્યા વિના મારા અંગત જીવન વિશે માહિતી જાહેર કેમ કરી, એવું કારણ આપીને કેસ કરી નાખ્યો.
લોકો સામે ચિત્રવિચિત્ર કારણોસર કેસ ઠોકી દેનારો જોનાથન ધીમેધીમે પ્રસિદ્ધ થવા લાગ્યો છે અને સોશિયલ મિડીયામાં વાઇરલ પણ થયો છે. એટલે એક ટીવી શૉમાં ઇન્ટરવ્યુ માટેનું જોનાથનને આમંત્રણ મળ્યું. એ ગયો ત્યારે હોસ્ટે એનો પ્રશ્ન પૂછ્યો, તમે આટલા બધા કેસ કરીને આટલી પ્રસિદ્ધિ અને પૈસા કમાયા છો પણ તમારી સાથે કોઈ રહેવા માગતું નથી. એવું શું કામ? હોસ્ટે સવાલ પૂરો કર્યો કે તરત જ જોનાથન અધવચ્ચેથી ટીવી શૉ પડતો મૂકીને નીકળી ગયો અને મને લાઇવ શૉમાં બોલાવીને મારી આબરૂના ધજાગરા ઉડાડો છો, એવું કહીને કેસ કરી નાખ્યો.
