BJP: હમણાં હમણાં આમ આદમી પાર્ટીની જાણે દશા બેઠી હોય તેવી ખબરો સામે આવી રહી છે,રાજ્યસભામાં રાઘવ ચઢ્ઢાથી લઈ ગુજરાતમાં રાજુ કરપડા,સાગર રબારી સુધીની વિકેટ પડવાનો સિલસિલો ચાલુ છે ત્યારે આમ આદમી પાર્ટીના ધારાસભ્ય ચૈતર વસાવાનું લાફા પ્રકરણ ફરી ચર્ચામાં છે, ભરૂચના ઝઘડિયામાં એક પીડિત પરિવારને મદદ કરવા પહોંચેલા ચૈતર વસાવાને પીડિત પરિવારના સભ્ય વચ્ચે થયેલી માથાકૂટ અને ‘લાફાકાંડ’ નો વિવાદ ભારે ચર્ચામાં આવ્યો છે અને હવે આ મુદ્દો રાજકીય બની ગયો છે.
મૃતકના પરિવારને વળતર અપાવવા માટે ચૈતર વસાવા મધ્યસ્થી કરવા ગયા અને ભેરવાઈ પડ્યા જેવો ઘાટ સર્જાયો છે, વળતર મુદ્દે ચૈતર વસાવા અને મૃતકના ભાઈ રોશન વસાવા વચ્ચે બોલાચાલી થઈ હતી. આ દરમિયાન ચૈતર વસાવાએ પિત્તો ગુમાવીને યુવકને લાફો મારી દીધો હતો, જેના જવાબમાં યુવકે પણ ધારાસભ્યને વળતો લાફો માર્યો હતો.આ ઘટના બાદ પીડિત રોશન વસાવાએ ઝઘડિયા પોલીસ સ્ટેશનમાં ચૈતર વસાવા વિરુદ્ધ ફરિયાદ નોંધાવી છે.પીડિત પરિવારનો આક્ષેપ છે કે ધારાસભ્ય માત્ર કંપની પાસેથી પૈસા ઉઘરાવવા માટે આવ્યા હતા.
ચૈતર વસાવાએ આ આરોપોને ફગાવી દીધા છે અને આ ઘટના પાછળ પોલીસ કે અન્ય તત્વોનો હાથ હોવાની શંકા વ્યક્ત કરી છે.આ મુદૂ હવે રાજકીય બની ગયો છે અને ભાજપના સાંસદ મનસુખ વસાવા અને ધવલ પટેલે આ ઘટના અંગે પોતાની પ્રતિક્રિયામાં જણાવ્યું છે કે ચૈતર વસાવાનું ધારાસભ્ય તરીકે આવું વર્તન યોગ્ય નથી તેમ કહી ચૈતર વસાવાની ઘેરાબંધી શરૂ કરી છે.
■ શુ હતો સમગ્ર મામલો
ભરૂચ જિલ્લાની ઝઘડિયા GIDCમાં મેટ્રોપોલિટન એક્ઝિકેમ કંપનીમાં 23 એપ્રિલે આગ લાગતા આ ગંભીર ઘટનામાં 2 કામદારોના મોત થયા હતા, જ્યારે 13 ઈજાગ્રસ્તો સારવાર હેઠળ છે.આ ઘટનાની જાણ થતાં પીડિતો અને અન્ય લોકો સાથે ધારાસભ્ય ચૈતર વસાવા સ્થળ ઉપર દોડી ગયા હતા જ્યાં કંપની પાસે વળતરની માગ ચાલતી હતી તે સમયે મૃતકના એક કહેવાતા રોશન વસાવા નામના સંબંધીએ ચૈતર વસાવાનો વિરોધ કરતા થયેલી રકઝક દરમિયાન ધારાસભ્યએ તેને લાફો ઝીંકી દીધો હતો,સામે તેણે પણ ચૈતર વસાવાને લાફો ઝીંક્યો હતો અને લાકડી અને જૂતું માર્યુ હતું.અપશબ્દોનો મારો ચલાવ્યો હતો આ ઘટના બની ત્યારે પીઆઈની હાજર હતા. આ માથાકૂટ બાદ કંપની પરિસરમાં તણાવનું વાતાવરણ સર્જાયું હતું.હવે સમગ્ર મામલે રાજકીય રંગ પકડવાનું ચાલુ થયું છે અને ચૈતર વસાવાની ફરી એકવાર મુશ્કેલીઓ વધી છે.
આ પણ વાંચો:
Japan: જાપાને હવામાંથી ‘એર પેટ્રોલ’ની શોધ કરી લીધી! છતાં આ ડ્રિમ પ્રોજેક્ટ કેમ પડતો મુકયો ? જાણો
