Gujarat Local Body Election: ગુજરાતમાં તાજેતરમાં સંપન્ન થયેલી સ્થાનિક સ્વરાજ્યની ચૂંટણીઓના પરિણામોએ રાજ્યના રાજકીય માળખામાં મોટા ઉલટફેરના સંકેતો આપ્યા છે. ખાસ કરીને વિપક્ષી પાર્ટીઓ માટે આ પરિણામો આત્મમંથન કરાવનારા છે, કારણ કે ભાજપના એકહથ્થુ શાસન સામે આમ આદમી પાર્ટી અને કોંગ્રેસના હજારો ઉમેદવારો પોતાની ડિપોઝિટ પણ બચાવી શક્યા નથી. જિલ્લા પંચાયત, તાલુકા પંચાયત, નગરપાલિકા અને મહાનગરપાલિકાઓના સંયુક્ત આંકડાઓ પર નજર કરીએ તો વિપક્ષની સ્થિતિ અત્યંત દયનીય જોવા મળી રહી છે. આ પરિણામો સ્પષ્ટ કરે છે કે મતદારોએ કાં તો સત્તાધારી પક્ષ પર સંપૂર્ણ ભરોસો મૂક્યો છે અથવા તો વિપક્ષી મતોનું એટલું મોટું વિભાજન થયું છે કે કોઈ એક પક્ષ ભાજપને મજબૂત ટક્કર આપી શક્યો નથી.
ડિપોઝિટ જપ્ત થવાના ચોંકાવનારા આંકડા: AAP ને મોટું નુકસાન
ચૂંટણી પંચ દ્વારા જાહેર કરવામાં આવેલા પક્ષવાર આંકડાઓ વિપક્ષી છાવણીમાં ચિંતા જન્માવે તેવા છે. આંકડા મુજબ, આમ આદમી પાર્ટીના કુલ 3,365 ઉમેદવારોની ડિપોઝિટ જપ્ત થઈ છે. જોકે ‘આપ’ દ્વારા આક્રમક પ્રચાર કરવામાં આવ્યો હતો, પરંતુ ઉમેદવારોની સંખ્યા વધારવા સામે જનમત મેળવવામાં પક્ષ નિષ્ફળ સાબિત થયો છે. બીજી તરફ, કોંગ્રેસના પણ 2,223 ઉમેદવારોની ડિપોઝિટ જપ્ત થઈ છે. મહાનગરપાલિકા અને નગરપાલિકા જેવા શહેરી વિસ્તારોમાં આમ આદમી પાર્ટીના ઉમેદવારો નોંધપાત્ર મતો મેળવવામાં નિષ્ફળ રહ્યા છે, જે પક્ષની રણનીતિ સામે સવાલો ઉભા કરે છે.
કોંગ્રેસના ગઢમાં ગાબડા અને ગ્રામીણ સ્તરે પછડાટ
માત્ર શહેરી જ નહીં, પણ ગ્રામીણ સ્તરે પણ વિપક્ષી પાર્ટીઓને મોટો ફટકો પડ્યો છે. ખાસ કરીને જિલ્લા અને તાલુકા પંચાયતોમાં કોંગ્રેસના પરંપરાગત ગઢ ગણાતા વિસ્તારોમાં પણ ભાજપે મોટા ગાબડા પાડ્યા છે. કોંગ્રેસના ૨૨૦૦થી વધુ ઉમેદવારોની ડિપોઝિટ જપ્ત થવી એ દર્શાવે છે કે પક્ષ માટે પોતાનું અસ્તિત્વ ટકાવી રાખવું પણ હવે એક મોટો પડકાર બની ગયો છે. ગ્રામીણ મતદારો જે એક સમયે કોંગ્રેસની મજબૂત કડી ગણાતા હતા, તેઓ હવે વિમુખ થયા હોય તેવું આ આંકડાઓ પરથી પ્રતીત થાય છે. આ હાર પક્ષના સંગઠન અને નેતૃત્વ માટે ગંભીર ચિંતાનો વિષય છે.
શું છે ડિપોઝિટ જપ્ત થવાનો નિયમ અને તેની અસરો?
ચૂંટણી પ્રક્રિયામાં ડિપોઝિટ જપ્ત થવી એ કોઈપણ ઉમેદવાર કે પક્ષ માટે શરમજનક સ્થિતિ ગણાય છે. ચૂંટણી પંચના નિયમ અનુસાર, જો કોઈ ઉમેદવાર જે-તે બેઠક પર પડેલા કુલ માન્ય મતોના ૧/૬ ભાગ (લગભગ ૧૬.૬૬ ટકા) કરતા ઓછા મતો મેળવે, તો તેની ડિપોઝિટ જપ્ત કરવામાં આવે છે. ગુજરાતની આ સ્થાનિક ચૂંટણીમાં અનેક ઉમેદવારો તો ૧૦ ટકા મતોનો આંકડો પણ સ્પર્શી શક્યા નથી. હજારો ઉમેદવારોની ડિપોઝિટ ડૂલ થતા પક્ષોની પ્રતિષ્ઠાને મોટું નુકસાન પહોંચ્યું છે. આ પરિણામો આગામી વિધાનસભા ચૂંટણીઓ માટે વિપક્ષી પાર્ટીઓ માટે લાલ બત્તી સમાન છે.
આ પણ વાંચો:
