Savarkundla Murder Case: અમરેલી જિલ્લાના સાવરકુંડલા તાલુકાના બાઢડા ગામે એક અત્યંત હચમચાવતી ઘટના સામે આવી છે, જેમાં કાયદો હાથમાં લઈને એક યુવકની હત્યા કરી દેવામાં આવી છે. સુરતમાં કડિયાકામ કરતો નિલેશ ચુડાસમા નામનો યુવક એક પરિણીત મહિલાને ભગાડી ગયો હતો, જેના કારણે સર્જાયેલા મનદુઃખમાં તેની ક્રૂરતાપૂર્વક હત્યા કરવામાં આવી હોવાનું બહાર આવ્યું છે. યુવકની શંકાસ્પદ હાલતમાં લાશ મળી આવતા સમગ્ર પંથકમાં સનસનાટી મચી ગઈ છે. આ મામલે સોશિયલ મીડિયા પર વાયરલ થયેલા વીડિયોએ પોલીસ તપાસમાં મહત્વની કડી પૂરી પાડી છે અને હત્યાના આ ગુનામાં જાણીતા યુટ્યુબર સહિત ત્રણ લોકો સામે ફરિયાદ નોંધાઈ છે.
યુટ્યુબર તરુણ બાંભણીયાની સંડોવણી: માફી મંગાવતો વીડિયો વાયરલ
આ સમગ્ર હત્યાકાંડમાં ભાવનગર જિલ્લાના જેસર તાલુકાના કરલા ગામના વિવાદાસ્પદ યુટ્યુબર તરુણ બાંભણીયા (તરુણ આહીર) નું નામ મુખ્ય આરોપી તરીકે ઉભરી આવ્યું છે. નિલેશ ચુડાસમાને અમદાવાદથી શોધી કાઢ્યા બાદ, તરુણ બાંભણીયાએ તેને પકડી પાડીને નીચે બેસાડ્યો હતો અને આહીર સમાજની દીકરીને ભગાડવા બદલ માફી મંગાવતો વીડિયો શૂટ કર્યો હતો. આ વીડિયોમાં યુટ્યુબર ધમકીભર્યા સ્વરે કહી રહ્યો હતો કે, “સમાજની દીકરીને જે પણ ભગાડશે તેને છોડવામાં આવશે નહીં”. આ પ્રકારના ભયાનક વીડિયો અને ધમકીઓ બાદ યુવકનો મૃતદેહ મળી આવતા આ મામલો વધુ ગંભીર બન્યો છે.
શારીરિક અને માનસિક ત્રાસ બાદ હત્યા: બે આરોપીઓની ધરપકડ
પોલીસ તપાસમાં સામે આવ્યું છે કે મૃતક નિલેશને માત્ર પકડવામાં જ નહોતો આવ્યો, પરંતુ તેને જીવલેણ માર મારીને ગંભીર શારીરિક અને માનસિક ત્રાસ આપવામાં આવ્યો હતો. આરોપીઓએ નિલેશના પરિવાર પર દબાણ લાવીને અન્ય વીડિયો પણ બનાવડાવ્યા હતા. આ અત્યાચાર બાદ યુવકની હત્યા કરી તેની લાશ ફેંકી દેવામાં આવી હતી. સાવરકુંડલા રૂરલ પોલીસે મૃતકના ભાઈ વિરલભાઈની ફરિયાદના આધારે હત્યાનો ગુનો નોંધ્યો છે. આ કેસમાં લોકલ ક્રાઈમ બ્રાન્ચે વિજય ઉર્ફે રાકેશ દાનાભાઈ નકુમ અને અમિત હડિયા નામના બે આરોપીઓની ધરપકડ કરી લીધી છે.
ફરાર યુટ્યુબરની શોધખોળ અને પોલીસની તપાસનો ધમધમાટ
હત્યાના આ કેસમાં મુખ્ય આરોપી યુટ્યુબર તરુણ બાંભણીયા હાલ પોલીસ પકડથી દૂર છે અને ફરાર થઈ ગયો છે. પોલીસે તેની શોધખોળ માટે સીસીટીવી ફૂટેજ અને ટેકનિકલ સર્વેલન્સની મદદ લીધી છે. પોલીસને આશંકા છે કે આ ક્રૂર હત્યાકાંડમાં માત્ર ત્રણ જ નહીં, પરંતુ હજુ પણ વધુ લોકોની સંડોવણી હોઈ શકે છે અને તપાસ દરમિયાન નવા નામો ખુલી શકે છે. સાવરકુંડલા પંથકમાં બનેલી આ ઘટનાએ સોશિયલ મીડિયા પર ‘ન્યાય’ કરવા નીકળતા લોકોની માનસિકતા અને કાયદાના ડર વગર કરાતા કૃત્યો સામે મોટા પ્રશ્નો ઊભા કર્યા છે.
આ પણ વાંચો:
