ગુજરાતભરમાં ઉત્તરાયણ પહેલા જ લોકો પતંગો ચગાવી રહ્યા છે. જો કે પોતાની પતંગ કપાઈ નહીં તે માટે પ્લાસ્ટિકની ચાઈનીઝ દોરીનો ઉપયોગ કરી રહ્યા છે. જેથી આવી દોરીનું વેચાણ પણ થતું રહે છે. જે લોકો માટે જીવલેણ સાબિત થઈ રહ્યું છે. ત્યારે અમદાવાદ શહેરના ઝોન-7 ડીસીપીની એલસીબી સ્ક્વોડને જુહાપુરા વિસ્તારમાં બે શખ્સ ચાઇનીઝ દોરીનું વેચાણ કરતા હોવાની બાતમી મળતાં 74 રીલ સાથે ઝડપી પાડ્યા છે.
અમદાવાદ શહેર પોલીસ કમિશનર માર્ગદર્શન હેઠળ શહેરના તમામ ઝોનમાં પ્રતિબંધિત ચાઇનીઝ દોરીની રીલ તથા ચાઇનીઝ તુક્કલોનો વેપાર કરતા અને ખરીદ, વેચાણ, સંગ્રહ અને વપરાશ કે ઉપયોગ કરવા ઉપર અંકુશ મેળવવા અને ચાઇનીઝ દોરીની રીલના વધુમાં વધુ કેસો શોધી કાઢવા સૂચના અપાઈ છે. ત્યારે નાયબ પોલીસ કમિશનર ઝોન-7ના શિવમ વર્માની સૂચનાથી ઝોન-7 કાર્યક્ષેત્ર વિસ્તારમાં એલસીબી સ્ક્વોડે જુહાપુરા વિસ્તારમાં ચાઇનીઝ દોરીનું વેચાણ કરતા 2 શખ્સને 74 ટેલર સાથે ઝડપી પાડ્યા છે.
ચાઈનીઝ દોરી કે તુક્કલના વપરાશ કે ખરીદ વેચાણ પર પ્રતિબંધ હોવા છતાં ઘણા લોકો પ્રતિબંધિત ઘાતક અને જીવણલેણ દોરીનું વેચાણ કરતા અને ઉપયોગ કરતાં ઝડપાઈ રહ્યા છે.
