• IND Vs ENG:  ભારતે ઈંગ્લેન્ડને કટકમાં ચટાવી 4 વિકેટે ધૂળ; રોહિતની સદી સાથે સિરીઝ પર કર્યો કબ્જો

IND Vs ENG: કટકમાં રમાયેલી બીજી વનડે મેચમાં ભારતે ઇંગ્લેન્ડને 4 વિકેટે માત આપી છે. આ સાથે ટીમ ઈન્ડિયાએ ત્રણ મેચની વનડે શ્રેણીમાં 2-0 ની અજેય લીડ મેળવી લીધી છે. ભારતીય ટીમની જીતનો સૌથી મોટો હીરો રોહિત શર્મા રહ્યો છે, જેણે 90 બોલમાં 119 રનની શાનદાર અને યાદગાર ઇનિંગ રમી હતી. તેમના ઉપરાંત શુભમન ગિલે પણ અડધી સદીની ઇનિંગ રમીને ટીમની જીતમાં મોટો ફાળો આપ્યો હતો.

કટકના બારાબતી મેદાન પર રમાયેલી આ મેચમાં ઇંગ્લેન્ડે ટોસ જીતીને પહેલા બેટિંગ કરવાનો નિર્ણય લીધો હતો. ઇંગ્લેન્ડની ટીમે પહેલા બેટિંગ કરીને 304 રનનો વિશાળ સ્કોર બનાવ્યો હતો. ઈંગ્લેન્ડ તરફથી જો રૂટ અને બેન ડકેટે અડધી સદી ફટકારી હતી, જ્યારે અંતિમ ઓવરોમાં લિયામ લિવિંગસ્ટને પણ 41 રનની ઝડપી ઇનિંગ રમી હતી અને પોતાની ટીમના સ્કોરને 300 રનથી વધુ લઈ જવામાં મોટી ભૂમિકા ભજવી હતી.

ભારતે મેચ 4 વિકેટથી જીતી લીધી

જ્યારે ભારતીય ટીમ 305 રનના મોટા લક્ષ્યનો પીછો કરવા ઉતરી ત્યારે રોહિત શર્મા અને શુભમન ગિલે ટીમને તોફાની શરૂઆત અપાવી હતી. બંનેએ મળીને માત્ર 15 ઓવરમાં ટીમનો સ્કોર 114 સુધી પહોંચાડી દીધો હતો. રોહિત અને ગિલ વચ્ચે 136 રનની ઓપનિંગ ભાગીદારી થઈ. હકીકતમાં, રોહિત અને ગિલે ભારતની જીતનો પાયો નાખ્યો હતો. વિરાટ કોહલી ફરી એકવાર મોટો સ્કોર કરવામાં નિષ્ફળ ગયો અને માત્ર 5 રન બનાવીને આઉટ થયો.

શ્રેયસ ઐયરે છેલ્લી મેચમાં ફિફ્ટી ફટકારી હતી અને કટકમાં પણ 44 રન બનાવીને ક્રીઝ પર સેટ થઈ ગયો હતો, પરંતુ અક્ષર પટેલ સાથે સંકલનના અભાવે તે રન આઉટ થઈ ગયો હતો. અક્ષર પટેલ 41 રન બનાવીને અણનમ રહ્યા અને રવિન્દ્ર જાડેજાએ ચોગ્ગો ફટકારીને ભારતીય ટીમનો વિજયી શોટ ફટકાર્યો. ટીમ ઈન્ડિયા તરફથી સારી બોલિંગ પણ થઈ, જ્યાં રવિન્દ્ર જાડેજાએ 3 વિકેટ લીધી, પરંતુ મોહમ્મદ શમી ખૂબ મોંઘો સાબિત થયો કારણ કે તેણે 7 ઓવરમાં 66 રન આપ્યા.

રોહિત શર્માની 32મી સદી

આ મેચમાં રોહિત શર્માએ પોતાના વનડે કરિયરની 32મી સદી ફટકારી હતી. તેણે 119 રનની ઇનિંગમાં 12 ચોગ્ગા અને 7 છગ્ગા ફટકાર્યા હતા. તમને જણાવી દઈએ કે આ રોહિતના આંતરરાષ્ટ્રીય કારકિર્દીની 49મી સદી પણ છે. તે હવે સદીઓની અડધી સદી ફટકારવાથી માત્ર એક મોટી ઇનિંગ્સ દૂર છે.

આ પણ વાંચો- Delhi Election 2025: વિજેતા ધારાસભ્યોને કેજરીવાલે સોંપ્યું મહત્વપૂર્ણ કામ; BJPને પાળવા પડશે વચન