China: આપણે ત્યાં બાંધકામ થતું હોય તો કન્સ્ટ્રક્શન સાઇટ પતરાંથી બંધ કરી દેવાય છે અને તોય કચરો, ધૂળ અને અવાજ ત્રાસ ગુજારી મૂકે છે. પણ ચીનમાં આ માટે અદ્ભુત આયોજન થાય છે. ચીનમાં બાંધકામ સ્થળને 50 મીટર ઊંચા અને વીસેક હજાર વર્ગમીટરના ડોમથી ઢાંકી દેવામાં આવે છે.
કન્સ્ટ્રક્શન સાઇટ પર થનારી પ્રવૃત્તિઓને કારણે ઊડતી ધૂળ મર્યાદિત કરવા અને આસપાસના વિસ્તારોમાં ઘોંઘાટ ઓછો કરવા માટે ચીને આ યુક્તિ અજમાવી છે. ખોદામ, ડ્રીલિંગ અને કોંક્રિટ મિશ્રિણ જેવી પ્રવૃત્તિઓથી નીકળનારી રજકણ આસપાસના વિસ્તારોને અસર કરતી હોય છે. મશીનોના અવાજને કારણે પણ ઘોંઘાટ થતો હોય છે.
આ કારણે બાંધકામ સ્થળને આ ડોમથી ઢાંકી દેવામાં આવે છે. એટલે ત્યાંથી નીકળતી ધૂળ બહાર જતી નથી અને આસપાસનાં સ્થળોને નુકસાન નથી થતું. સાથેસાથે એ અવાજનું પ્રદૂષણ પણ ઓછું કરે છે. આ કારણે ગીચ વિસ્તારમાં પણ સરળતાથી બાંધકામ થઈ શકે છે.
પાતળી પૉસિમર જાળીમાંથી આ ડોમ બનાવાય છે અને એને ઊભો કરવા માટે કોઈ થાંભલા કે ટેકાની પણ જરૂર પડતી નથી. એમાં ઔદ્યોગિક ગ્રેડ બ્લોઅરથી સતત હવાનું દબાણ ઉત્પન્ન કરીને ફુગ્ગા જેવો આકાર ધારણ કરે છે. પીલર ન હોવાને કારણે ડોમની અંદર કોઈ પણ જાતના અવરોધ વિના કામ થઈ શકે છે. એટલું જ નહીં, ક્રેન, ટ્રક અને કર્મચારી સ્વતંત્ર રીતે કામ કરી શકે છે. આ ડોમમાં પારદર્શક પેનલની સુવિધા પણ આપવામાં આવે છે. આ પેનલને કારણે કુદરતી રીતે દિવસનો પ્રકાશ અંદર આવે છે. આ કારણે દિવસે વીજળીનો વપરાશ પણ ઓછો થાય છે.
આ જિનાન ડોમ ચીનનાં બાંધકામ સ્થળે વ્યવસ્થાપન માટે મોડ્યુલર અને ઝડપથી સ્થાપિત થનારી પ્રણાલીઓના ઉપયોગના વધતા જતા ચલણનો ભાગ છે.
ચીનના વિદેશ મંત્રાલયના પ્રવક્તા માઓ નિંગે ફેસબુક પર આ ડોમની તસવીર મૂકી હતી અને એને નવું આયોજન ગણાવ્યું હતું. પર્યાવરણ અને આસપાસના લોકોની સુરક્ષાનો ચતુરાઈપૂર્વકનો પ્રયોગ ગણાવાયો હતો. આ ડોમ શહેરી સમસ્યાઓનું સમાધાન કરી શકે છે પણ કેટલીક ખામીઓ પણ છે. આ ડોમ માટે જંગી આર્થિક રોકાણ કરવું પડે છે અને તેમાં હવાનું દબાણ સતત રાખવા અને વેન્ટિલેશન સિસ્ટમ ટકાવી રાખવા માટે સતત વીજળીની જરૂર પડતી હોય છે. એ સિવાય આ ડોમ વંટોળ કે બરફવર્ષા ટાણે ઉપયોગી થશે કે નહીં, એ પણ સવાલ છે.
આ પણ વાંચોઃ
UP husband murder: 8 વિઘા જમીન માટે પ્રેમી સાથે મળી પતિને પૂરો કરી નાખ્યો, પછી લાશને….
Sabarkantha: ગાંજો રાખવા અને ઉગાડવા મામલે મંદિરના મહંત સહિત બેની ધરપકડ
Japan Heavy Rain: જાપાનમાં વરસાદે અને વાવાઝોડાએ મચાવી તબાહી, બાબા વેંગાની ભવિષ્યવાણી સાચી પડી!
