Gujarat: ભાજપના ધારાસભ્ય અને પાટીદાર નેતા હાર્દિક પટેલ સામે અમદાવાદ ગ્રામ્ય કોર્ટે શુક્રવારે 12 સપ્ટેમ્બર 2025ના રોજ ફરી બીજું એકવાર ધરપકડ વોરંટ જાહેર કર્યું છે. આ વોરંટ 2018માં નિકોલ વિસ્તારમાં પાટીદાર અનામત આંદોલન સમિતિ (PAAS) દ્વારા આયોજિત આંદોલન દરમિયાન નોંધાયેલા એક ગુનાહિત કેસ સાથે સંબંધિત છે. આ કેસમાં હાર્દિક પટેલ સહિતના આરોપીઓ વિરુદ્ધ ગેરહાજરીને કારણે કોર્ટે આ પગલું ભર્યું છે.

વર્ષ 2018માં પાટીદાર અનામત આંદોલન દરમિયાન અમદાવાદના નિકોલ વિસ્તારમાં પાટીદાર સમાજને અનામત આપવાની માગણી અને ખેડૂતોના દેવાં માફીની માગણી સાથે હાર્દિક પટેલના નેતૃત્વ હેઠળ પાટીદાર અનામત આંદોલન સમિતિ (PAAS) દ્વારા એક પ્રતીક ઉપવાસનું આયોજન કરવામાં આવ્યું હતું. આ આંદોલન દરમિયાન નિકોલ પોલીસ મથકે હાર્દિક પટેલ સહિત અન્ય આરોપીઓ વિરુદ્ધ ભારતીય દંડ સંહિતા (IPC)ની કલમ 143 (ગેરકાયદેસર સભા), 147 (બળવો), 149 (ગેરકાયદેસર સભાના સભ્યોની સામૂહિક જવાબદારી), 353 (સરકારી કર્મચારી પર હુમલો), 188 (સરકારી આદેશનો ભંગ), 186 (સરકારી કર્મચારીના કામમાં અવરોધ), 120 (ગુનાહિત કાવતરું), 294 (અશ્લીલ વર્તન), 34 (સામૂહિક ઈરાદો) અને 506 (ગુનાહિત ધમકી) હેઠળ ગુનો નોંધવામાં આવ્યો હતો.

પરવાનગી વગર રેલી કાઢી હતી

ફરિયાદ મુજબ આરોપીઓએ વગર પરવાનગીએ પૂર્વ આયોજિત કાવતરું કરીને નિકોલના મ્યુનિસિપલ ગ્રાઉન્ડ ખાતે રેલી કાઢી અને પ્રતીક ઉપવાસનું આયોજન કર્યું હતું. પોલીસે રેલીને અટકાવવાનો પ્રયાસ કરતાં આરોપીઓ ઉશ્કેરાયા હતા અને તેમણે પોલીસ સાથે ઝપાઝપી કરી, અપશબ્દો બોલ્યા, અને ધમકીઓ આપી હતી. આ ઉપરાંત, શહેરના પોલીસ કમિશનરના જાહેરનામાનો ભંગ કરવાનો પણ આરોપ લાગ્યો હતો.કોર્ટની કાર્યવાહી અને ધરપકડ વોરંટઆ કેસ અમદાવાદ ગ્રામ્ય કોર્ટમાં ચાલી રહ્યો છે અને હાલમાં તે આરોપીઓ સામે ચાર્જ ફ્રેમ કરવાના તબક્કે છે.

જોકે હાર્દિક પટેલ કોર્ટની મુદતોમાં વારંવાર ગેરહાજર રહ્યા હોવાને કારણે, અમદાવાદ ગ્રામ્ય કોર્ટે 10 સપ્ટેમ્બર 2025ના રોજ તેમની સામે ધરપકડ વોરંટ જાહેર કર્યું હતું. આ વોરંટ બાદ પણ હાર્દિક પટેલ કોર્ટમાં હાજર ન થતાં કોર્ટે 12 સપ્ટેમ્બર 2025ના રોજ ફરી એકવાર ધરપકડ વોરંટ જાહેર કર્યું છે.

હાર્દિક પટેલની રાજકીય સફરહાર્દિક પટેલ, જે એક સમયે પાટીદાર અનામત આંદોલનના પ્રમુખ નેતા તરીકે ઓળખાતા હતા, 2019માં ભારતીય જનતા પાર્ટી (BJP)માં જોડાયા હતા. હાલમાં તેઓ વિરમગામ વિધાનસભા બેઠકના ધારાસભ્ય છે. 2015થી 2018 દરમિયાન પાટીદાર સમાજને OBC કેટેગરીમાં અનામત આપવાની માગણી સાથે તેમણે ગુજરાતભરમાં મોટા પાયે આંદોલનોનું નેતૃત્વ કર્યું હતું. આ આંદોલનો દરમિયાન અનેક ગુનાહિત કેસો નોંધાયા હતા, જેમાંથી નિકોલનો આ કેસ પણ એક છે.

શું હાર્દિકની થશે?

કોર્ટ દ્વારા બીજી વખત ધરપકડ વોરંટ જાહેર થયા બાદ હવે હાર્દિક પટેલની આગામી રણનીતિ અને કોર્ટની કાર્યવાહી પર સૌની નજર રહેશે. જો તેઓ નિયત સમયમાં કોર્ટમાં હાજર નહીં થાય, તો પોલીસ દ્વારા તેમની ધરપકડની સંભાવના છે. આ ઘટના રાજકીય અને સામાજિક રીતે પણ ચર્ચાનો વિષય બની રહેશે, ખાસ કરીને પાટીદાર સમાજ અને ગુજરાતના રાજકારણમાં તેની અસર જોવા મળી શકે છે.

સવાલ એ થઈ રહ્યા કે ભાજપ નેતા કોર્ટની પણ અવગણના કરી રહ્યા છે. જે બતાવે છે કે તે કાયદા, કાર્ટને પણ માનતા નથી. બીજી તરફ AAP નેતાને નજીવી બાબતે છેલ્લા 1 મહિનાથી જેલમાં પૂર્યા છે. ત્યારે સવાલો થઈ રહ્યા છે કે ભાજપના નેતાઓને આશરો મળી જાય છે. જ્યારે વિપક્ષના નેતાઓને કાયદાની આટીઘૂટીમાં નાખી દેવામાં આવે છે.