Gujarat Rain Forecast: રાજ્યમાં ભારે ધબધબાટી બોલાવ્યા બાદ હાલ વરસાદે પોરો ખાધો છે ત્યારે હવામાન વિભાગ દ્વારા ફરી એક વાર રાજ્યના કેટલાક વિસ્તારોમાં ભારે વરસાદની આગાહી કરી છે.
રાજ્યમાં બે દિવસ ભારે વરસાદની આગાહી
ભારતીય હવામાન વિભાગે આગામી પાંચ દિવસ સુધી સમગ્ર ગુજરાતમાં ભારેથી અતિ ભારે વરસાદની આગાહી કરી છે, જેમાં 13 અને 14 જુલાઈના રોજ કેટલાક જિલ્લાઓમાં ઓરેન્જ એલર્ટ જારી કરવામાં આવ્યું છે. હવામાન વિભાગે ઘણા પ્રદેશોમાં સ્થાનિક ભારે વરસાદ, વાવાઝોડા, વીજળી અને 30-40 કિમી પ્રતિ કલાકની ઝડપે પવન ફૂંકવાની ચેતવણી આપી છે.
આ વિસ્તારોમાં ખાબકશે વરસાદ
રવિવારે સવારે 8: 30 વાગ્યા સુધી, સાબરકાંઠા, અરવલ્લી, પંચમહાલ, દાહોદ અને મહિસાગરમાં ભારે વરસાદ પડવાની સંભાવના છે, જ્યારે રાજ્યના બાકીના ભાગોમાં છૂટાછવાયા સ્થળોએ હળવો થી મધ્યમ વરસાદ પડી શકે છે.
13મી જુલાઈની આગાહી
13મી જુલાઈએ અરવલ્લી અને મહિસાગર જિલ્લાઓ માટે ભારે વરસાદ માટે ઓરેન્જ એલર્ટ જારી કરવામાં આવ્યું છે. આ ઉપરાંત બનાસકાંઠા, સાબરકાંઠા, ખેડા, આણંદ, પંચમહાલ, દાહોદ, ભાવનગર અને અમરેલીમાં પણ ભારે વરસાદ પડી શકે છે.
Gujarat Rain Forecast
14 જુલાઈની આગાહી
14 જુલાઈના રોજ, માત્ર સાબરકાંઠા અને અરવલ્લી જ ભારે વરસાદ માટે ઓરેન્જ એલર્ટ હેઠળ છે. બનાસકાંઠા, પાટણ, મહેસાણા, પંચમહાલ, દાહોદ, મહિસાગર, નવસારી, વલસાડ, તેમજ દમણ અને દાદરા નગર હવેલીમાં પણ ભારે વરસાદની સંભાવના છે.
15 જુલાઈની આગાહી
15મી જુલાઇએ ઓરેન્જ એલર્ટ જારી કરવામાં આવ્યું નથી, પરંતુ બનાસકાંઠા, પાટણ, મહેસાણા, પંચમહાલ, દાહોદ, મહિસાગર, સાબરકાંઠા અને અરવલ્લીમાં ભારે વરસાદની શક્યતા છે.
16 જુલાઈની આગાહી
16 જુલાઈના રોજ, ફક્ત બનાસકાંઠા અને સાબરકાંઠામાં ભારે વરસાદ પડવાની શક્યતા છે, જ્યારે રાજ્યના બાકીના ભાગોમાં હળવો થી મધ્યમ વરસાદ પડી શકે છે.
