Jagdish Panchal: ગુજરાત ભાજપના નવનિયુક્ત પ્રદેશ પ્રમુખ જગદીશ પંચાલે તેમના એક નિવેદનને લઈને સોશિયલ મીડિયા પર ભારે ટ્રોલિંગનો સામનો કરવો પડી રહ્યો છે. 4 ઓક્ટોબર, 2025ના રોજ ગાંધીનગરમાં યોજાયેલા એક કાર્યક્રમમાં જ્યાં તેમણે ગુજરાત ભાજપના પ્રમુખ તરીકેની જવાબદારી સંભાળી, પંચાલે આત્મનિર્ભર ભારત અને ‘વોકલ ફોર લોકલ’ અભિયાનને પ્રોત્સાહન આપવા માટે ભારતીય બનાવટની વસ્તુઓ વાપરવાનું આહ્વાન કર્યું હતું. જોકે, તેમના શબ્દોની પસંદગીએ તેમને મુશ્કેલીમાં મૂક્યા.
પંચાલે પોતાના સંબોધનમાં જણાવ્યું હતું, “એક ઘરેથી કદાચ એક વ્યક્તિ નિર્ધાર કરી લે કે, હું ભારતની બનાવટી વસ્તુ વાપરીશ. આપણે એક ડગલું આગળ ચાલીએ તો તમે પરિકલ્પના કરો કે 140 કરોડ ડગલાં આપણે આગળ ચાલીશું.” આ નિવેદનમાં ‘બનાવટી’ શબ્દનો ઉપયોગ, જેનો ગુજરાતીમાં સામાન્ય રીતે ‘નકલી’ કે ‘ખોટી’ વસ્તુ તરીકે અર્થ થાય છે, તેમના નિવેદનને વિવાદાસ્પદ બનાવી ગયો. જ્યાં તેમનો ઈરાદો ‘મેડ ઇન ઇન્ડિયા’ એટલે કે દેશી ઉત્પાદનોને પ્રોત્સાહન આપવાનો હતો, ત્યાં શબ્દની ભૂલે તેમનું નિવેદન ખોટી રીતે સમજાયું, જેના કારણે સોશિયલ મીડિયા પર ટીકાઓ અને મીમ્સનું ઘોડાપૂર આવ્યું.
ટ્રોલિંગનો શિકાર કેવી રીતે બન્યા?
સોશિયલ મીડિયા પ્લેટફોર્મ X પર યુઝર્સે પંચાલના આ નિવેદનની મજાક ઉડાવતાં અનેક પોસ્ટ્સ શેર કરી. એક યુઝરે લખ્યું, “જગદીશભાઈએ નકલી માલ વાપરવાનું કહીને આત્મનિર્ભર ભારતનું નવું વિઝન આપી દીધું!” આ ઘટનાએ રાજકીય વર્તુળોમાં પણ ચર્ચા જગાવી છે. વિપક્ષી નેતાઓએ આ તકનો લાભ લઈને ભાજપ પર કટાક્ષ કર્યા છે.
કોણ છે જગદીશ પંચાલ?
જગદીશભાઈ ઈશ્વરભાઈ પંચાલનો જન્મ 12 ઓગસ્ટ, 1973ના રોજ અમદાવાદમાં થયો હતો. એસ.વાય.બી.એ. અને એમ.બી.એ. (માર્કેટિંગ)ની ડિગ્રી ધરાવતા પંચાલ ટેક્સટાઈલ મશીનરીના વ્યવસાય સાથે સંકળાયેલા છે. વાંચન, સ્વિમિંગ, બેડમિન્ટન અને સમાજસેવા તેમના શોખ છે. રાજકીય કારકિર્દીની શરૂઆત એક સામાન્ય કાર્યકર્તા તરીકે કરનાર પંચાલે 2012 અને 2017માં નિકોલ વિધાનસભા બેઠક પરથી ધારાસભ્ય તરીકે ચૂંટણી જીતી. 2015થી 2021 સુધી તેમણે અમદાવાદ શહેર ભાજપ પ્રમુખ તરીકે કામગીરી કરી, અને 2021ની અમદાવાદ મ્યુનિસિપલ કોર્પોરેશનની ચૂંટણીમાં ભાજપના ઐતિહાસિક વિજયમાં મહત્વની ભૂમિકા ભજવી.
જગદીશ પંચાલની પ્રદેશ પ્રમુખ તરીકેની પસંદગી ભાજપની વ્યૂહાત્મક રણનીતિનો ભાગ માનવામાં આવે છે, કારણ કે ગુજરાતમાં OBC મતોનું પ્રભુત્વ નોંધપાત્ર છે. કોંગ્રેસે પોતાના પ્રદેશ અધ્યક્ષ તરીકે OBC નેતા અમિત ચાવડાની નિમણૂક કરી હોવાથી, ભાજપે પણ આ વર્ગના મતોને આકર્ષવા પંચાલને આગળ કર્યા છે. જોકે, આ નિવેદનની ભૂલે થયેલું ટ્રોલિંગ ભાજપની રણનીતિ પર કેટલો પ્રભાવ પાડશે, તે આગામી દિવસોમાં સ્પષ્ટ થશે.
આ પણ વાંચો:
Gujarat Jagdish Panchal: અમદાવાદના જગદીશ પંચાલ ગુજરાત ભાજપના 14મા પ્રદેશ પ્રમુખ બન્યા!
Gujarat Politics: જગદીશ પંચાલ ભાજપને મજબૂત કરશે કે, પાર્ટીનો રકાસ કાઢશે?
PM Modi: મોદીના સ્વાગત માટે વિદ્યાર્થીઓને વરસાદમાં ઉભા રાખ્યા, બાળકોના સ્વાસ્થ્યનું શું?
BJP Manifesto: ભાજપે વર્ષ 2002માં રજૂ કરેલો ચૂંટણી ઢંઢેરો અને 2025ની વાસ્તવિક સ્થિતિ
