- Israel Attacks on Gaza: ગાઝા પર ઇઝરાયલનો મહાવિનાશક હુમલો, 70થી વધારે લોકોના મોત
ઇઝરાયલી સેનાએ ગાઝા પર વિનાશક હુમલો કર્યો છે. આ હુમલામાં મોટી સંખ્યામાં લોકોના મોત થયાની આશંકા છે. એપીના અહેવાલ મુજબ, ગાઝામાં આ ઇઝરાયલી હુમલો બુધવારે રાતથી ગુરુવાર સવાર સુધી ચાલુ રહ્યો. આ હુમલાઓમાં મોટી સંખ્યામાં પેલેસ્ટિનિયનો માર્યા ગયા છે. ગાઝાના ડોક્ટરોએ ગુરુવારે આ માહિતી આપી.
તબીબી અધિકારીઓએ જણાવ્યું હતું કે દક્ષિણ ગાઝા શહેરો ખાન યુનિસ અને રફાહ અને ઉત્તરીય શહેર બેત લાહિયામાં ઘરોને નિશાન બનાવવામાં આવ્યા હતા. જોકે, તેમણે હજુ સુધી કુલ મૃત્યુઆંક જાહેર કર્યો નથી. અલ જઝીરાના અહેવાલ મુજબ, ઉત્તર અને દક્ષિણ ગાઝામાં વહેલી સવારે થયેલા આ હુમલામાં 70 થી વધુ લોકો માર્યા ગયા છે.
ઇઝરાયલ-હમાસ વચ્ચે યુદ્ધવિરામનો ભંગ
ઇઝરાયલ અને હમાસ વચ્ચેનો યુદ્ધવિરામ લગભગ એક અઠવાડિયા પહેલા તૂટી ગયો હતો. ત્યારથી ઇઝરાયલી સેના ગાઝા પર સતત ભીષણ હુમલાઓ કરી રહી છે. ત્રણ દિવસ પહેલા ઇઝરાયલે ગાઝા પર મોટો હુમલો કર્યો હતો, જેમાં 400થી વધુ લોકો માર્યા ગયા હતા. ઇઝરાયલી વડાપ્રધાન બેન્જામિન નેતન્યાહૂ ઇઝરાયલી બંધકોને મુક્ત ન કરવા બદલ હમાસથી ગુસ્સે છે. તેથી, તેમણે ફરીથી પોતાની સેનાને હમાસ પર મોટા હુમલાઓ શરૂ કરવાનો આદેશ આપ્યો છે. આ પછી ઇઝરાયલી સેનાએ ઉત્તર અને દક્ષિણ ગાઝામાં ભૂમિ કાર્યવાહી પણ શરૂ કરી દીધી છે.
