Rahawwur Rana Remand: 26/11 મુંબઈ હુમલાના આરોપી તહવ્વુર રાણાને આખરે અમેરિકાથી ભારત લાવવામાં આવ્યો છે. ગુરુવારે વિમાન દિલ્હીના પાલમ એરપોર્ટ પર પહોંચ્યું હતુ. રાણાનું મેડિકલ એરપોર્ટ પર જ કરવામાં આવ્યું હતું. આ પછી, NIA ટીમ તેને દિલ્હીની પટિયાલા હાઉસ કોર્ટમાં લઈ ગઈ, જ્યાં તેને NIAના ખાસ ન્યાયાધીશ સમક્ષ રજૂ કરવામાં આવ્યો. કોર્ટે રાણાની 18 દિવસની કસ્ટડી NIAને સોંપી છે.

કોર્ટે 18 દિવસની કસ્ટડીમાં મોકલી દીધો

તેહવુર રાણાને મોડી રાત્રે દિલ્હીની પટિયાલા હાઉસ કોર્ટમાં રજૂ કરવામાં આવ્યો હતો. NIAના વકીલ દયાન કૃષ્ણને કોર્ટ સમક્ષ રાણા વિરુદ્ધ પુરાવા રજૂ કર્યા હતા. NIA એ કોર્ટ પાસેથી તહવ્વુરના 20 દિવસના રિમાન્ડની માંગણી કરી હતી. ચર્ચા બાદ કોર્ટે નિર્ણય અનામત રાખ્યો. બપોરે લગભગ 2.10 વાગ્યે, કોર્ટે પોતાનો ચુકાદો આપ્યો અને રાણાની 18 દિવસની કસ્ટડી NIAને સોંપી દીધી હતી.

તહવ્વુર રાણાને તિહાર જેલમાં રાખી શકાય છે

ગુરુવારે સૂત્રોએ જણાવ્યું હતું કે, 64 વર્ષીય તહવ્વુર રાણાને દિલ્હીની તિહાર જેલમાં ઉચ્ચ સુરક્ષા વોર્ડમાં રાખવામાં આવશે. તેમણે કહ્યું કે આતંકવાદીને રાખવા માટે જેલમાં તમામ જરૂરી તૈયારીઓ પહેલાથી જ કરી લેવામાં આવી છે. 2008ના મુંબઈ આતંકવાદી હુમલામાં 166 લોકો માર્યા ગયા હતા.

લાંબી કાનૂની લડાઈ પછી પ્રત્યાર્પણ થયું

તહવ્વુર રાણાને અમેરિકાથી ભારત લાવવા માટે લાંબી કાનૂની લડાઈ બાદ, તેના પ્રત્યાર્પણને મંજૂરી આપવામાં આવી. તહવ્વુર 2008ના મુંબઈ આતંકવાદી હુમલાના મુખ્ય કાવતરાખોરોમાંના એક ડેવિડ કોલમેન હેડલી ઉર્ફે દાઉદ ગિલાનીનો નજીકનો સાથી છે. રાણા પર ગુનાહિત કાવતરું, ભારત સરકાર સામે યુદ્ધ છેડવું, હત્યા, બનાવટી બનાવટ અને ગેરકાયદેસર પ્રવૃત્તિઓ (નિવારણ) અધિનિયમ સહિત અનેક કલમો હેઠળ આરોપ મૂકવામાં આવ્યા છે.