West Bengal Election: પશ્ચિમ બંગાળમાં આજે સવારથી જ લોકશાહીના મહાપર્વનો બીજો તબક્કો શરૂ થઈ ગયો છે. કુલ ૧૪૨ બેઠકો પર યોજાઈ રહેલા આ મતદાનમાં સવારના ૯ વાગ્યા સુધીમાં ૧૮.૩૯ ટકા જેવું નોંધપાત્ર મતદાન થયું છે. આ તબક્કામાં પશ્ચિમ બંગાળના મુખ્યમંત્રી મમતા બેનર્જી સહિત અનેક દિગ્ગજ નેતાઓના રાજકીય ભવિષ્યનો ફેંસલો થવાનો છે. મમતા બેનર્જીએ પોતાની ભવાનીપુર બેઠક પરના વિવિધ મતદાન મથકોની મુલાકાત લીધી હતી. આ દરમિયાન તેમણે કેન્દ્રીય સુરક્ષા દળો (Central Forces) અને ચૂંટણી ઓબ્ઝર્વર પર ગંભીર આક્ષેપો લગાવ્યા છે. મમતાના મતે, આ સંસ્થાઓ નિષ્પક્ષ રીતે કામ કરવાને બદલે ભાજપના ઈશારે કાર્ય કરી રહી છે.
ભાજપ અને ટીએમસી વચ્ચે તીખા શાબ્દિક પ્રહારો
ભવાનીપુર બેઠક પર મમતા બેનર્જીના પ્રતિસ્પર્ધી અને ભાજપના નેતા શુભેંદુ અધિકારીએ મમતાની મુલાકાત પર વળતો પ્રહાર કર્યો છે. તેમણે કહ્યું કે એક ઉમેદવાર તરીકે બૂથ પર જવાનો અધિકાર સૌને છે, પરંતુ મમતા બેનર્જી જે રીતે મોટી ભીડ લઈને બૂથ પર જઈ રહ્યા છે, તે મતદારોમાં ડર ફેલાવવાનો એક પ્રયાસ છે. શુભેંદુએ ઉમેર્યું કે તેઓ પોતે માત્ર અંગરક્ષકો સાથે જ બૂથની મુલાકાત લઈ રહ્યા છે અને મમતાએ પણ લોકશાહીની મર્યાદા જાળવવી જોઈએ. આ તરફ, બારાનગર અને ખાનાકુલ જેવા વિસ્તારોમાં ઈવીએમ ખરાબ થવા અને નકલી પોલિંગ એજન્ટોની તહેનાતી બાબતે ટીએમસી અને આઈએસએફના સમર્થકો વચ્ચે ઘર્ષણના અહેવાલો પણ પ્રાપ્ત થયા છે.
બંગાળમાં પ્રથમ તબક્કાનું રેકોર્ડબ્રેક અને ઐતિહાસિક મતદાન
પશ્ચિમ બંગાળમાં ૨૩ એપ્રિલે યોજાયેલા પ્રથમ તબક્કાના મતદાનમાં રાજ્યના ઈતિહાસના તમામ રેકોર્ડ તૂટી ગયા છે. ચૂંટણી પંચના આંકડા મુજબ, પ્રથમ તબક્કામાં કુલ ૯૨.૮૮ ટકા મતદાન નોંધાયું છે, જે ૨૦૧૧ના ૮૪.૭૨ ટકાના રેકોર્ડને પણ પાર કરી ગયું છે. ખાસ કરીને મુસ્લિમ બહુમતીવાળા વિસ્તારોમાં ૯૫ ટકાથી વધુ મતદાન જોવા મળ્યું છે. સીતલકુચી અને ભગવાનગોલા જેવા વિસ્તારોમાં મતદાનની ટકાવારી ૯૭ ટકા સુધી પહોંચી હતી. આટલી મોટી સંખ્યામાં થયેલું મતદાન રાજકીય વિશ્લેષકો માટે પણ ચર્ચાનો વિષય બન્યું છે, કારણ કે તે રાજ્યમાં કોઈ મોટા પરિવર્તન અથવા તો વર્તમાન સત્તાને જાળવી રાખવા માટેનો મજબૂત જનાદેશ હોઈ શકે છે.
મતદાર યાદીનો વિવાદ અને પ્રવાસી શ્રમિકોની વાપસી
આ ચૂંટણી પહેલા મતદાર યાદીમાંથી અંદાજે ૯૧ લાખ જેટલા નામો કાઢી નાખવાના વિવાદને કારણે લોકોમાં એક પ્રકારનો ભય જોવા મળ્યો હતો. ઘણા મતદારોએ જણાવ્યું કે તેમને ડર હતો કે જો તેઓ આ વખતે મતદાન નહીં કરે, તો ભવિષ્યમાં તેમનું નાગરિકત્વ જોખમમાં મુકાઈ શકે છે. આ જ કારણથી અન્ય રાજ્યોમાં કામ કરતા હજારો પ્રવાસી શ્રમિકો ટ્રેન, બસ અને ફ્લાઈટ દ્વારા ખાસ મતદાન કરવા માટે પોતાના વતન પાછા ફર્યા છે. મમતા બેનર્જીએ આ મતદાનને લોકોના અધિકારોની રક્ષા માટેનું ‘યુદ્ધ’ ગણાવ્યું છે, જ્યારે અમિત શાહે દાવો કર્યો છે કે જનતા તૃણમૂલના ભ્રષ્ટાચારથી કંટાળીને પરિવર્તન માટે મોટી સંખ્યામાં બહાર આવી છે.
