• ટ્રેવિસ હેડનો શાનદાર કેચ લેનાર શુભમન ગિલને અમ્પાયરે કેમ આપી ચેતવણી?

ભારત અને ઓસ્ટ્રેલિયા વચ્ચેની સેમિફાઇનલમાં જે ખેલાડી પર વધુ નજર હતી તે ઓસ્ટ્રેલિયાનો ઓપનર ટ્રેવિસ હેડ હતો.

ભારતીય ચાહકો 2023ના ODI વર્લ્ડ કપની ફાઇનલ ભૂલ્યા નહતા. તેથી તેની વિસ્ફોટક બેટિંગને લઈને ભારતીય પ્રશંસકોમાં ડર બનેલો હતો.

ટુર્નામેન્ટમાં અપરાજિત રહેલી ભારતીય ટીમ ફાઇનલમાં ઓસ્ટ્રેલિયા સામે હારી ગઈ હતી. ઓસ્ટ્રેલિયાની ટાઇટલ જીતમાં ટ્રેવિસ હેડ મુખ્ય ભૂમિકા ભજવી હતી.

હેડે 137 રનની શાનદાર ઇનિંગ રમી. ત્યારથી જ્યારે પણ ભારતીય ટીમ ઓસ્ટ્રેલિયાનો સામનો કરે છે, ત્યારે ટ્રેવિસ હેડ ચોક્કસપણે ચર્ચામાં આવે છે.

ચેમ્પિયન્સ ટ્રોફીની સેમિફાઇનલમાં ભારત ઓસ્ટ્રેલિયા સામે ટકરાશે તે નક્કી થતાં જ સોશિયલ મીડિયા પર મીમ્સનો ભરમાર થઈ ગઈ હતી. મોટાભાગના મીમ્સ ટ્રેવિસ હેડ પર બનાવવામાં આવ્યા હતા.

સેમિફાઇનલ મેચમાં ઓસ્ટ્રેલિયાએ ટોસ જીતીને પહેલા બેટિંગ કરવાનો નિર્ણય લીધો હતો.

શરૂઆતના થોડી ધીમી રમત પછી ટ્રેવિસ હેડે હાથ ખોલીને રમવાનું શરૂ કર્યું. તેણે શાનદાર ચોગ્ગા અને છગ્ગા પણ ફટકાર્યા હતા.

ભારતીય છાવણીમાં પણ થોડો ગભરાટ દેખાવા લાગ્યો. ભારતીય કેપ્ટન રોહિત શર્માની કોઈ પણ રણનીતિ કામ કરી રહી ન હતી.

પરંતુ ન્યુઝીલેન્ડ સામેની મેચમાં પાંચ વિકેટ લેનાર વરુણ ચક્રવર્તીને બોલ મળતાની સાથે જ તેણે ટ્રેવિસ હેડને આઉટ કરી દેતા ભારતીય ટીમ સહિત દેશભરના પ્રશંસકોએ રાહતનો શ્વાસ લીધો હતો.

હેડ તેના બોલ પર શુભમન ગિલના હાથે કેચ આઉટ થયો. શુભમન ગિલે દોડીને આ શાનદાર કેચ પકડ્યો હતો.

આ સાથે ટીમ ઈન્ડિયા સાથે ભારતીય પ્રશંસકોમાં ખુશીની લહેર ફેલાઈ ગઈ. સ્ટેડિયમમાં હાજર ભારતીય દર્શકો ખુશીથી ઝૂમી ઉઠ્યા હતા.

ટ્રેવિસ હેડ માથું નમાવીને પેવેલિયન પરત ફર્યો. હેડે 39 રનની ઇનિંગ રમી, જેમાં તેણે પાંચ ચોગ્ગા અને બે છગ્ગા ફટકાર્યા હતા. તેણે ફક્ત 33 બોલનો સામનો કર્યો હતો.

કેમ કેચ ઉપર શરૂ થઈ ચર્ચા

પરંતુ શુભમન ગિલના શાનદાર કેચ પર ચર્ચા ત્યારે શરૂ થઈ જ્યારે ટ્રેવિસ હેડના આઉટ થયા પછી તરત જ અમ્પાયર રિચાર્ડ ઇલિંગવર્થ શુભમન ગિલ સાથે વાત કરતા જોવા મળ્યા.

તે સમયે કોમેન્ટ્રી કરી રહેલા હર્ષ ભોગલે, માઈક આથર્ટન અને મેથ્યુ હેડનને લાગ્યું કે અમ્પાયર શુભમન ગિલ સાથે કેચ વિશે વાત કરી રહ્યા છે.

ખરેખર તો શુભમન ગિલે ટ્રેવિસ હેડનો શાનદાર કેચ પકડ્યો હતો. પરંતુ બોલ પકડ્યા પછી તેણે તરત જ બોલ હવામાં ફેંક્યો અને પછી હેડના આઉટ થવાની ઉજવણી શરૂ કરી દીધી હતી.

ક્રિકેટના નિયમો અનુસાર, કોઈપણ ક્રિકેટરે કેચ લેતી વખતે સંપૂર્ણ નિયંત્રણ રાખવું પડે છે. નહિંતર તેને યોગ્ય પકડ ગણવામાં આવશે નહીં.

કોમેન્ટેટર્સને લાગ્યું કે અમ્પાયર ઇલિંગવર્થ શુભમન ગિલને કહી રહ્યા હતા કે તેણે સમયનું ધ્યાન રાખવું જોઈએ.

તે સમયે કોમેન્ટ્રી કરી રહેલા ઇંગ્લેન્ડના ભૂતપૂર્વ કેપ્ટન માઇક આથર્ટને શુભમન ગિલના કેચને યોગ્ય ઠેરવ્યો અને કહ્યું કે ગિલ સંપૂર્ણ નિયંત્રણમાં હતો.

તેમણે કહ્યું કે કેચ અંગે કોઈ શંકા ન હોવી જોઈએ. મેથ્યુ હેડને પણ કહ્યું કે ગિલનો કેચ સાચો હતો. પરંતુ તેમણે એમ પણ કહ્યું કે ગિલે સાવચેત રહેવું જોઈએ.

આ પણ વાંચો- કેન્દ્ર સરકારે ગોધરા કાંડના 14 સાક્ષીઓની સુરક્ષા હટાવી, સિક્યોરિટીમાં તૈનાત હતા 150 CISF જવાન