- વરૂણ ચક્રવર્તીએ 143 બોલરોને પાછળ છોડ્યા, ICC રેન્કિંગમાં કેપ્ટન રોહિતને નુકશાન; વિરાટ-અક્ષર પટેલને ફાયદો
ICC રેન્કિંગ અપડેટ્સ: પાકિસ્તાનની યજમાની હેઠળ રમાઈ રહેલી ICC ચેમ્પિયન્સ ટ્રોફી 2025 હવે અંતિમ રાઉન્ડમાં પહોંચી ગઈ છે. રોહિત શર્માની કેપ્ટનશીપ હેઠળ ભારતીય ટીમ અપરાજિત રહી અને ICC ચેમ્પિયન્સ ટ્રોફી 2025ની ફાઇનલમાં પ્રવેશ કર્યો. આ દરમિયાન આંતરરાષ્ટ્રીય ક્રિકેટ પરિષદ (ICC)એ બુધવારે (5 માર્ચ) ખેલાડીઓની નવીનતમ રેન્કિંગ જાહેર કરી છે.
આમાં ભારતીય ટીમના સ્ટાર લેગ સ્પિનર વરુણ ચક્રવર્તીએ ધમાલ મચાવી દીધી છે. તેણે ચેમ્પિયન્સ ટ્રોફીમાં શાનદાર પ્રદર્શન કર્યું, જેના કારણે તેને બમ્પર ફાયદો મળ્યો છે. બોલરોના રેન્કિંગમાં વરુણ 143 સ્થાનની છલાંગ લગાવીને ટોપ-100માં પ્રવેશ્યો છે. વરુણ હવે 97મા સ્થાને પહોંચી ગયો છે.
વરુણ ચક્રવર્તીએ ચેમ્પિયન્સ ટ્રોફી 2025માં અત્યાર સુધીમાં 2 મેચ રમી છે, જેમાં તેણે 7 વિકેટ લીધી છે. આ 7 વિકેટોમાંથી 5 વિકેટો એક જ મેચમાં લેવામાં આવી છે. તેણે ન્યૂઝીલેન્ડ સામેની મેચમાં આ 5 વિકેટ લીધી હતી. જ્યારે તેણે ઓસ્ટ્રેલિયા સામેની સેમિફાઇનલમાં 2 વિકેટ લીધી હતી.
બીજી તરફ શુભમન ગિલ બેટિંગ રેન્કિંગમાં ટોચ પર છે. જ્યારે વિરાટ કોહલી એક સ્થાનના ફાયદા સાથે ચોથા સ્થાને પહોંચી ગયો છે. આ ઉપરાંત કેપ્ટન રોહિત શર્માને બે સ્થાનનું નુકસાન થયું છે. તે પાંચમા ક્રમે સરકી ગયો છે.
વિરાટ કોહલી હાલમાં ચેમ્પિયન્સ ટ્રોફી 2025ના ટોપ સ્કોરર્સમાં ત્રીજા નંબરે છે. તેણે 4 મેચમાં 72.33 ની પ્રભાવશાળી સરેરાશથી 217 રન બનાવ્યા છે. આ સમયગાળા દરમિયાન તેણે પાકિસ્તાન સામે 100 રનની અણનમ સદી પણ ફટકારી હતી.
અક્ષરને 17 સ્થાનનો ફાયદો
કેપ્ટન રોહિત શર્માનું ફોર્મ ટુર્નામેન્ટમાં સારું રહ્યું નથી. તેણે અત્યાર સુધીમાં 4 મેચ રમી છે, જેમાં 26 ની ખૂબ જ નબળી સરેરાશથી 104 રન બનાવ્યા છે. તેમનો શ્રેષ્ઠ સ્કોર 41 રન રહ્યો છે. આના કારણે તેમને નુકસાન થયું છે. ગિલ, કોહલી અને રોહિત ઉપરાંત, શ્રેયસ ઐયર પણ ટોપ-10 બેટિંગ રેન્કિંગમાં સામેલ છે. તે એક સ્થાન ઉપર આવીને 8મા ક્રમે પહોંચી ગયો છે.
અક્ષરને ઓલરાઉન્ડરોની યાદીમાં પણ બમ્પર ફાયદો મળ્યો છે. તેણે 17 સ્થાનનો કૂદકો માર્યો છે. સ્પિન ઓલરાઉન્ડર અક્ષર પટેલ હવે 13મા ક્રમે પહોંચી ગયો છે. ટોપ-10 ઓલરાઉન્ડરોની યાદીમાં રવિન્દ્ર જાડેજા એકમાત્ર ભારતીય છે, જે નવમા ક્રમે છે.
આ પણ વાંચો- ડેટા સંરક્ષણ કાયદાની આડમાં મોદી સરકાર ‘લંગડો’ કરી રહી છે RTI એક્ટ
